രാഹുൽ എംഎൽഎ സ്ഥാനം 
രാജിവെക്കണം: ഡിവൈഎഫ്‌ഐ

പത്തനംതിട്ട
കേരളത്തിനാകെ അപമാനമായ രാഹുൽ മാങ്കൂട്ടത്തിൽ എത്രയും വേഗം എംഎൽഎ സ്ഥാനം രാജിവെക്കണമെന്ന് ഡിവൈഎഫ്ഐ ജില്ലാ കമ്മിറ്റി പ്രസ്‌താവനയിൽ ആവശ്യപ്പെട്ടു. നിരവധി പെൺകുട്ടികളെ പീഡിപ്പിച്ച കേസിൽ ഒരു ജനപ്രതിനിധി ഉൾപ്പെട്ടത് സംസ്ഥാന രാഷ്ട്രീയത്തിൽ ഇതുവരെ ഉണ്ടാകാത്തതാണ്. ഡിജിറ്റൽ തെളിവുകൾ ഉൾപ്പെടെയാണ് സംഭവം പുറത്തുവന്നിരിക്കുന്നത്.
രാഹുലിനെ ന്യായീകരിക്കാൻ ഇതുവരെ കോൺഗ്രസ് നേതാക്കൾ ചോദിച്ചിരുന്നത് എവിടെ പരാതി എന്നായിരുന്നു. ഇപ്പോൾ ഒരു യുവതി മുഖ്യമന്ത്രിയ്ക്ക്‌ പരാതി നൽകിക്കഴിഞ്ഞു. എന്നിട്ടും രാഹുലിനെ തള്ളിപ്പറയാൻ കോൺഗ്രസ് നേതാക്കൾ തയാറാകുന്നില്ല. അന്തസുള്ള ആരെങ്കിലും കോൺഗ്രസിലോ മഹിളാ കോൺഗ്രസിലോ ഉണ്ടെങ്കിൽ രാഹുൽ രാജിവെക്കാൻ പറയണം.
ക്രിമിനൽ കൂട്ടമായി കേരളത്തിലെ യൂത്ത് കോൺഗ്രസ്‌ മാറി. ഗർഭസ്ഥ ശിശുവിനെ പോലും കൊല്ലാൻ മടിയില്ലാത്ത കൊലപാതകിയാണ്‌ രാഹുൽ മാങ്കൂട്ടത്തിൽ. പീഡിപ്പിച്ച പെൺകുട്ടികളെ ഭീഷണിപ്പെടുത്തുകയും ഗർഭസ്ഥ ശിശുക്കളെ കൊല്ലാനുള്ള മരുന്നെത്തിക്കുകയും ചെയ്യുന്ന ക്രിമിനൽ ക്വട്ടേഷൻ സംഘങ്ങളാണ്‌ യൂത്ത്‌ കോൺഗ്രസുകാരെന്നും ജില്ലാ സെക്രട്ടറി ബി നിസാം, ജില്ലാ പ്രസിഡന്റ് എം സി അനീഷ് കുമാർ എന്നിവർ പ്രസ്താവനയിൽ പറഞ്ഞു.