കിരീടം നിലനിർത്തി 
നാറാണംമൂഴി ബഡ്‌സ് സ്കൂൾ

പത്തനംതിട്ട
കുടുംബശ്രീ സംഘടിപ്പിച്ച "ബഡ്‌സ് ഒളിമ്പിയ'യിൽ 76 പോയിന്റോടെ  കിരീടം നേടി നാറാണംമൂഴി ബഡ്‌സ് സ്കൂൾ. 58 പോയിന്റോടെ കൊടുമൺ ബിആർസി രണ്ടാംസ്ഥാനവും പള്ളിക്കൽ ബഡ്‌സ് സ്കൂൾ 57 പോയിന്റോടെ മൂന്നാം സ്ഥാനവും നേടി. കഴിഞ്ഞ വർഷവും നാറാണംമൂഴി ബഡ്സ്‌ സ്കൂളിനായിരുന്നു കിരീടം.
കൊടുമൺ ഇഎംഎസ് സ്റ്റേഡിയത്തിൽ നടന്ന കായികമേളയിൽ 12 ബഡ്‌സ് സ്കൂളുകളിൽ നിന്നായി 300ഓളം കുട്ടികൾ പങ്കെടുത്തു. 34  ഇനങ്ങളിലായിരുന്നു മത്സരം നടന്നത്.
ബുദ്ധിപരമായും ശാരീരികമായും വെല്ലുവിളികൾ നേരിടുന്ന കുട്ടികളുടെ ശാരീരികക്ഷമത, ഏകാഗ്രത, ചലനസാമർഥ്യം എന്നിവ മെച്ചപ്പെടുത്താനും അവരെ സാമൂഹികമായി കൂടുതൽ ഉൾപ്പെടുത്താനും സഹായിക്കുക എന്നതാണ് ഈ കായികമത്സരത്തിന്റെ ലക്ഷ്യം.  
നാഷണൽ അത്‌ലറ്റിക് ചാമ്പ്യൻ എച്ച് അനാമിക കായികമേള ഉദ്ഘാടനം ചെയ്തു. കുടുംബശ്രീ ജില്ലാ മിഷൻ കോർഡിനേറ്റർ എസ് ആദില, ജില്ലാ പ്രോഗ്രാം മാനേജർ മേഘ ജെയിൻ, ബ്ലോക്ക് കോർഡിനേറ്റർമാർ എന്നിവരും പങ്കെടുത്തു.