കരിമാൻതോട് അപകടം:  ചൈൽഡ് വെൽഫയർ കമ്മിറ്റി റിപ്പോർട്ട്‌ തേടി

പത്തനംതിട്ട
കരിമാൻതോട്- തൂമ്പാക്കുളത്ത്‌ കുട്ടികൾ സഞ്ചരിച്ചിരുന്ന ഓട്ടോറിക്ഷ തോട്ടിലേക്ക് മറിഞ്ഞുണ്ടായ അപകടത്തിൽ തണ്ണിത്തോട് ശ്രീനാരായണ പബ്ലിക് സ്കൂൾ അധികൃതരോട് റിപ്പോർട്ട് തേടി പത്തനംതിട്ട ചൈൽഡ് വെൽഫെയർ കമ്മിറ്റി.
സ്കൂളിന്റെ നിയന്ത്രണത്തിൽ പ്രവർത്തിക്കുന്ന വാഹനങ്ങൾ സംബന്ധിച്ചും കുട്ടികളുടെ സുരക്ഷ ഉറപ്പാക്കുന്നതിൽ സ്കൂൾ സ്വീകരിച്ചിട്ടുള്ള നടപടികളെ സംബന്ധിച്ചുമുള്ള റിപ്പോർട്ടാണ് ആവശ്യപ്പെട്ടത്.
വിദ്യാർഥികളുടെ യാത്ര സുരക്ഷിതമാക്കാൻ ജില്ലയിലെ സ്കൂളുകൾ കേന്ദ്രീകരിച്ച് ആവശ്യമായ നടപടികൾ/മുൻകരുതലുകൾ കൈക്കൊള്ളണമെന്ന് പത്തനംതിട്ട റീജിയണൽ വെഹിക്കിൾ ഓഫീസറോടും കമ്മിറ്റി ആവശ്യപ്പെട്ടു. ചെയർപേഴ്സൺ അഡ്വ. ലീന കെ സുബാഷ്,  ഡോ. ആർ വിജയമോഹനൻ, രാജേഷ് ആക്ലേത്ത്, ഡേവിഡ് റെജി മാത്യു എന്നിവരടങ്ങുന്ന ചൈൽഡ് വെൽഫെയർ കമ്മിറ്റിയുടേതാണ്‌ തീരുമാനം.