സ്‌റ്റേഷനിലേക്ക്‌ കൊണ്ടുപോയ പ്രതി പൊലീസുകാരനെ ആക്രമിച്ചു

കോഴഞ്ചേരി

ജില്ലാ സ്കൂൾ കലോത്സവത്തിനെത്തിയ പെൺകുട്ടികളെ പിന്തുടർന്ന് ശല്യപ്പെടുത്താൻ ശ്രമിച്ചതിന് കസ്റ്റഡിയിലെടുത്ത പ്രതി പൊലീസുകാരന്റെ തലയ്ക്ക് അടിച്ച് പരിക്കേൽപ്പിച്ചു. ആറന്മുള സ്‌റ്റേഷൻ സിവിൽ പൊലീസ് ഓഫീസർ ആകേഷ് (26) നെയാണ് നാരങ്ങാനം വലിയകുളം നെടിയമഞ്ഞപ്ര വീട്ടിൽ അജു (20) കൈവിലങ്ങ് കൊണ്ട് തലയ്ക്ക് അടിച്ച് പരിക്കേൽപ്പിച്ചത്.

സെന്റ്‌ തോമസ് ഹയർസെക്കൻഡറി സ്കൂളിൽ നടന്ന ജില്ലാ സ്കൂൾ കലോത്സവത്തിന് എത്തിയ പെൺകുട്ടികളെ പിന്തുടർന്ന് ശല്യപ്പെടുത്തിയതിന് സ്കൂൾ പ്രിൻസിപ്പലിന്റെ പരാതി പ്രകാരം കേസെടുത്ത പൊലീസ് ഇയാളെ ആറന്മുള സ്റ്റേഷനിൽ എത്തിച്ചിരുന്നു. സ്റ്റേഷനിൽ ആക്രമാസക്തനായ പ്രതിയും ഇയാളെ വിട്ടുകിട്ടണമെന്ന് ആവശ്യപ്പെട്ട് ബഹളമുണ്ടാക്കിയ അർജുൻ എന്നയാളെയും മെഡിക്കൽ പരിശോധനയ്ക്കായി കോഴഞ്ചേരി ജില്ലാ ആശുപത്രിയിലേക്ക് കൊണ്ടുപോകും വഴിയാണ് ആക്രമണം. തലയിൽ പരിക്കേറ്റ പൊലീസുദ്യോഗസ്ഥൻ കോഴഞ്ചേരി ജില്ലാ ആശുപത്രിയിൽ ചികിത്സ തേടി.

പോലീസുകാരനെ ദേഹോപദ്രവമേല്പിച്ചതിനും ഡ്യൂട്ടിക്ക് തടസ്സം സൃഷ്ടിച്ചതിനും ഇയാൾക്കെതിരെ കേസെടുത്തു. നിരവധി മോഷണക്കേസുകളിൽ വിചാരണ നേരിടുന്നയാളും പെട്രോൾ പമ്പ് ജീവനക്കാരനെ പമ്പിലെത്തി ദേഹോപദ്രവമേൽപ്പിച്ചതിന് ചെങ്ങന്നൂർ പൊലീസ് രജിസ്റ്റർ ചെയ്ത കേസിലെയും പ്രതിയാണ്. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി.