വിദ്യാഭ്യാസ റിയാലിറ്റി ഷോ
ജില്ലയിൽനിന്ന് 4 സ്കൂൾ

പത്തനംതിട്ട
പൊതുവിദ്യാഭ്യാസ മേഖലയിലെ മികവുകൾ രാജ്യത്തിനുമുന്നിൽ അവതരിപ്പിക്കാൻ കൈറ്റ് സംഘടിപ്പിക്കുന്ന "ഹരിതവിദ്യാലയം' വിദ്യാഭ്യാസ റിയാലിറ്റി ഷോയുടെ നാലാം എഡിഷൻ പ്രാഥമിക പട്ടികയില് ഇടംപിടിച്ച 85 വിദ്യാലയങ്ങളിൽ നാലെണ്ണം ജില്ലയിൽനിന്ന്.
എഎംഎം എച്ച്എസ്എസ് ഇടയാറൻമുള, സെന്റ് തോമസ് എച്ച്എസ്എസ് ഇരുവെള്ളിപ്ര, ബദനി ആശ്രമം എച്ച്എസ് ചെറുകുളഞ്ഞി, ജിയുപിഎസ് പൂഴിക്കാട് എന്നീ വിദ്യാലയങ്ങളാണ് തെരഞ്ഞെടുക്കപ്പെട്ടത്.
സ്കൂളുകൾ നടത്തുന്ന ക്രിയാത്മകവും മാതൃകാപരവുമായ പ്രവർത്തനങ്ങളെ അംഗീകരിക്കുകയും അത് മറ്റു വിദ്യാലയങ്ങൾക്ക് കൂടി പങ്കുവെച്ച് പൊതുവിദ്യാഭ്യാസത്തിന്റെ നിലവാരം ഉയർത്തുകയുമാണ് വിദ്യാഭ്യാസ റിയാലിറ്റിഷോയുടെ പ്രധാന ലക്ഷ്യം.
പരിപാടിയുടെ ചിത്രീകരണം തിരുവനന്തപുരത്തുള്ള കൈറ്റ് സ്റ്റുഡിയോയില് ഡിസംബര് 26ന് തുടങ്ങും. കൈറ്റ് വിക്ടേഴ്സിൽ ഷോയുടെ സംപ്രേഷണം ജനുവരി ആദ്യം ആരംഭിക്കും. അവസാന റൗണ്ടിലേക്ക് തെരഞ്ഞെടുക്കപ്പെടുന്ന പത്ത് സ്കൂളുകൾക്കും വിജയികൾക്കും ഫെബ്രുവരിയിൽ നടക്കുന്ന ഗ്രാന്റ് ഫിനാലെയിൽ പ്രത്യേക പുരസ്കാരങ്ങൾ സമ്മാനിക്കും. ഓൺലൈൻ യോഗത്തിൽ തെരഞ്ഞെടുക്കപ്പെട്ട വിദ്യാലയങ്ങളുമായി കൈറ്റ് സിഇഒ കെ അന്വർ സാദത്ത് ആശയവിനിമയം നടത്തി.








0 comments