ജനമനസ്സുകളിലേക്ക്‌

പ്രത്യേക ലേഖകൻ

പാലക്കാട്‌

തെരഞ്ഞെടുപ്പ്‌ ആവേശത്തിന്‌ ചൂടേറുന്പോൾ പ്രചാരണത്തിൽ വ്യക്തമായ മേൽക്കൈനേടി എൽഡിഎഫ്‌. സ്ഥാനാർഥി പ്രഖ്യാപനവും കൺവൻഷനുകളും മുന്നണിയിൽ അസ്വാരസ്യമില്ലാതെ സീറ്റ്‌ വിഭജനവും പൂർത്തിയാക്കി. സ്ഥാനാർഥികൾ മൂന്ന്‌ ഘട്ട പര്യടനം നടത്തി. ഒന്നും രണ്ടും പിണറായി സർക്കാരുകളുടെ വികസനനേട്ടങ്ങളാണ്‌ പ്രധാനമായും പ്രചാരണത്തിൽ ഉയർത്തുന്നത്‌. എല്ലാവർക്കും വീട്‌, തൊഴിൽ, വിദ്യാഭ്യാസം, ആരോഗ്യം, ക്ഷേമം തുടങ്ങി എൽഡിഎഫ്‌ പ്രകടനപത്രികയിലെ വാഗ്‌ദാനങ്ങൾ കൃത്യമായും നടപ്പാക്കുമെന്ന്‌ ഉറപ്പാക്കുകയാണ്‌ ജനത. ആത്മവിശ്വാസത്തോടെയാണ്‌ എൽഡിഎഫ്‌ വോട്ടർമാരെ സമീപിക്കുന്നത്‌. തദ്ദേശ തെരഞ്ഞെടുപ്പിൽ മുന്നോട്ടുവച്ച വാഗ്‌ദാനങ്ങൾ യാഥാർഥ്യമാകുമെന്ന ഉറച്ച വിശ്വാസത്തിലാണ്‌ നാട്‌. അതേസമയം, യുഡിഎഫും ബിജെപിയും ആഭ്യന്തരപ്രശ്‌നങ്ങളിൽ ഉഴലുകയാണ്‌. സ്ഥാനാർഥി നിർണയത്തിലെ അതൃപ്‌തി പുകയുകയാണ്‌ യുഡിഎഫിൽ. മത രാഷ്ട്രവാദികളായ ജമാഅത്തെ ഇസ്ലാമിയുമായുള്ള പരസ്യകൂട്ടും പ്രതിസന്ധിയാകുന്നു. ഇതിൽ പ്രതിഷേധമുള്ളവരും സീറ്റ്‌ കിട്ടാത്തവരും വ്യാപകമായി വിമതരായി രംഗത്തെത്തി. നേതൃത്വത്തിനെതിരെ തുറന്ന നിലപാടുമായാണ്‌ പല നേതാക്കളും സ്ഥാനാർഥിത്വം പ്രഖ്യാപിച്ചത്‌. രാഹുൽ മാങ്കൂട്ടത്തിലിനെതിരായ ലൈംഗിക പീഡന പരാതിയിൽ പൊലീസ്‌ നടപടി തുടങ്ങിയതോടെ കോൺഗ്രസ്‌ പ്രതിരോധത്തിലായി. ജനങ്ങളുടെ ചോദ്യങ്ങൾക്ക്‌ മറുപടി പറയാനാകാതെ യുഡിഎഫ്‌ പ്രവർത്തകർ അങ്കലാപ്പിലാണ്‌. തകർച്ചയിലേക്ക്‌ കൂപ്പുകുത്തുന്ന യുഡിഎഫിന്‌ ആശ്വാസം പകരാൻ പലയിടത്തും സ്ഥാനാർഥികളെ നിർത്താതെ പിന്തുണ നൽകുകയാണ്‌ ബിജെപി. പരസ്യമായ ഗ്രൂപ്പിസം ബിജെപിയെയും പ്രതിരോധത്തിലാക്കി. പാലക്കാട്‌ നഗരസഭയിൽ ചരിത്രത്തിലില്ലാത്തവിധമാണ്‌ പാർടിയിലെ പ്രശ്‌നങ്ങൾ. മുൻ നഗരസഭാ ചെയർപേഴ്‌സൺമാരെ തഴഞ്ഞതിൽ പ്രതിഷേധിച്ച്‌ പ്രമീള ശശിധരൻ, പ്രിയ അജയൻ എന്നിവർ നേതൃത്വത്തിനെതിരെ രംഗത്തുവന്നിരുന്നു.