ഗ്രാമം നന്മ മാത്രം അളക്കുന്നു

അഖില ബാലകൃഷ്‌ണൻ

പാലക്കാട്‌

മിനി ടീച്ചർക്ക്‌ (മിനി എസ്‌ നമ്പൂതിരിപ്പാട്‌) തെരഞ്ഞെടുപ്പും സാമൂഹ്യ പ്രവർത്തനമാണ്‌. ‘‘ജീവിതത്തിൽ മറ്റുള്ളവർക്കുവേണ്ടി എന്തെങ്കിലും ചെയ്യണം. അത്രേ ഉള്ളൂ’’ – അവരുടെ വാക്കുകൾ. ഇതേ ചിന്തയിലാണ്‌ ഏഴുവർഷം മുമ്പ്‌ ആകെയുള്ള പത്ത്‌ സെന്റ്‌ ഭൂമിയിൽ അഞ്ച്‌ സെന്റ്‌ ദുരിതാശ്വാസ നിധിയിലേക്ക്‌ നൽകിയത്‌. നന്മ മാത്രം കൈമുതലാക്കിയാണ്‌ എൽഡിഎഫ്‌ സ്വതന്ത്രയായി ചിറ്റൂർ നഗരസഭയിലെ തെക്കേഗ്രാമം ഡിവിഷനിൽ മത്സരിക്കുന്നതും. അധ്യാപികയായിരുന്ന മിനി ഡിവൈഎഫ്‌ഐയുടെ പൊതിച്ചോർ വിതരണത്തിലൂടെയാണ്‌ സാമൂഹ്യ പ്രവർത്തനരംഗത്തേക്ക്‌ വരുന്നത്‌. അഞ്ചുവർഷമായി തെക്കേഗ്രാമത്തിൽനിന്ന്‌ ഡിവൈഎഫ്‌ഐ വിതരണംചെയ്ത പൊതിച്ചോറിന്റെ നല്ലൊരു പങ്കും ഇവരുടെ വീട്ടിൽനിന്നാണ്‌. 2018ൽ കേരളം പ്രളയക്കെടുതിയിലായപ്പോൾ വിദ്യാർഥിയായ മകൻ അമർനാഥ്‌ ആലുവയിൽ വെള്ളപ്പൊക്കത്തിൽ കുടുങ്ങിയിരുന്നു. ദുരിതം നേരിട്ടറിഞ്ഞതോടെയാണ്‌ കൊഴിഞ്ഞാമ്പാറ ഇരട്ടക്കുളത്തുള്ള അഞ്ച്‌ സെന്റ്‌ ഭൂമി ദുരിതാശ്വാസനിധിയിലേക്ക്‌ നൽകാൻ തീരുമാനിച്ചത്‌. കോവിഡ്‌കാലത്ത്‌ അധ്യാപകനായ ഭർത്താവ്‌ ശ്രീധര നമ്പൂ‍തിരിപ്പാടുമായിചേർന്ന്‌ 1.85 ലക്ഷം രൂപ വിദ്യാർഥികൾക്ക്‌ ഓൺലൈൻ പഠനോപകരണം വാങ്ങാൻ നൽകി. തെക്കേഗ്രാമത്തെ എല്ലാ പൊതുപരിപാടികളിലും നിറസാന്നിധ്യമാണ്‌ മിനി. മക്കളായ അമർനാഥ്‌ മാധ്യമ പ്രവർത്തകനും കേദാർനാഥ്‌ അധ്യാപകനുമാണ്‌. കഴിഞ്ഞ തെരഞ്ഞെടുപ്പിൽ 34 വോട്ടിന്‌ എൽഡിഎഫിന്‌ നഷ്ടമായ ഡിവിഷനാണിത്‌.