കോൺഗ്രസിന്‌ വിമതപ്പട

പാലക്കാട്‌

നാമനിർദേശപ്പത്രിക പിൻവലിക്കാനുള്ള സമയം കഴിഞ്ഞതോടെ നേതൃത്വത്തെ വെല്ലുവിളിച്ച്‌ നിരവധി കോൺഗ്രസ്‌ നേതാക്കൾ വിമതരായി മത്സരരംഗത്ത്‌. തിങ്കൾ പകൽ മൂന്നുകഴിഞ്ഞാൽ വിമതർ പാർടിക്ക്‌ പുറത്താണെന്ന കെ മുരളീധരന്റെ മുന്നറിയിപ്പ്‌ വെറുതെയായി. വിമതർ പത്രിക പിൻവലിക്കുമെന്ന്‌ അവസാന നിമഷംവരെ കോൺഗ്രസ്‌ നേതൃത്വം പ്രതീക്ഷിച്ചെങ്കിലും അതെല്ലാം അസ്ഥാനത്തായി. ജില്ലയിൽ 15 വാർഡുകളിൽ ഇതിനകം കോൺഗ്രസ്‌– യുഡിഎഫ്‌ വിമതർ രംഗത്തുണ്ട്‌. ആലത്തൂർ ബ്ലോക്ക് കോൺഗ്രസ്‌ സെക്രട്ടറിയും വാർഡ് മെമ്പറുമായ ഡിനോയ് കോമ്പാറ വണ്ടാഴി 13–-ാം വാർഡ് മംഗലംഡാമിലും കോൺഗ്രസ് മണ്ഡലം വൈസ് പ്രസിഡന്റ്‌ കെ എ രാജേഷ്‌ കുത്തനൂർ അഞ്ചാം വാർഡ്‌ നടുത്തറയിലും വിമതനാണ്‌. മാത്തൂർ പഞ്ചായത്ത്‌ ഒന്നാം വാർഡിൽ റഷീദ്, നാലാം വാർഡിൽ മുൻ പഞ്ചായത്ത് അംഗം രത്നാമണി നാരായണൻ, 11–ാം വാർഡിൽ യൂത്ത് കോൺഗ്രസ് മുൻ മണ്ഡലം പ്രസിഡന്റ്‌ പവിത്രൻ, തേങ്കുറുശി പഞ്ചായത്തിലെ നാലാം വാർഡിൽ കോൺഗ്രസിന്റെ സജീവ പ്രവർത്തകൻ എ ചന്ദ്രദാസ്, കുഴൽമന്ദം പഞ്ചായത്തിലെ 10– കളപ്പെട്ടി വാർഡിൽ ഷിജില ഹുസൈനും കോൺഗ്രസ്‌ വിമത സ്ഥാനാർഥികളാണ്‌. ഒറ്റപ്പാലം നഗരസഭയിൽ മുൻ മണ്ഡലം പ്രസിഡന്റും ഒറ്റപ്പാലം ബ്ലോക്ക്‌ ജനറൽ സെക്രട്ടറിയുമായ എം ഉണ്ണിക്കൃഷ്ണൻ മീറ്റ്‌ന വാർഡിൽ വിമതനാണ്‌. പാലക്കാട്‌ നഗരസഭയിൽ കോൺഗ്രസ്‌ മുൻ ക‍ൗൺസിലറും ബ്ലോക്ക്‌ കോൺഗ്രസ്‌ ജനറൽ സെക്രട്ടറിയുമായിരുന്ന എം കെ മുകേഷ്‌ കുമാർ ശെൽവപാളയം 23 –ാം വാർഡിൽ വിമതനായി രംഗത്തുണ്ട്‌. കോൺഗ്രസ് തരൂർ ബ്ലോക്ക് സെക്രട്ടറി എം സഹദ് മത്സരിക്കുന്ന തോടുകാട് ഏഴാം വാർഡിൽ മുസ്ലിംലീഗ് പ്രവർത്തകൻ മുജീബ് മാട്ടുമല വിമതനാണ്‌. ആലത്തൂർ ബാങ്ക് റോഡ് മൂന്നാം വാർഡിൽ കോൺഗ്രസിന്റെ ബുഷറ നൗഷാദ്‌ വിമതയായി രംഗത്തുണ്ട്‌. ആനക്കര പഞ്ചായത്ത്‌ പ്രസിഡന്റ്‌ കെ മുഹമ്മദിന്റെ സഹോദരൻ അബ്ദുൾ മജീദ്‌ കോണിക്കൽ 12 –ാം വാർഡിൽ കോൺഗ്രസ്‌ സ്ഥാനാർഥിക്കെതിരെ വിമതനാണ്‌.