അത്രമേൽ പ്രിയം

സ്വന്തം ലേഖകൻ

പാലക്കാട്‌

മുതുവല്ലി നാലുസെന്റ് ഉന്നതിയിലെ കൊച്ചുവീടിനുമുന്നിൽ കാത്തിരിപ്പിലായിരുന്നു പാർവതി. അവിടെ ജില്ലാ പഞ്ചായത്ത്‌ തെങ്കര ഡിവിഷൻ എൽഡിഎഫ്‌ സ്ഥാനാർഥി പ്രിയ വരുന്നുണ്ട്‌. അവരെ സ്വീകരിക്കണം. നാടിന്റെ വികസനത്തിനും ക്ഷേമപ്രവർത്തനങ്ങൾക്കും നേതൃത്വം നൽകുന്ന എൽഡിഎഫിന്റെ സ്ഥാനാർഥിക്ക്‌ പിന്തുണ അറിയിക്കണം. വീടിന്റെ ഉമ്മറത്തെത്തിയ സ്ഥാനാർഥി നേരെ ചെന്ന്‌ ആ അമ്മയ്‌ക്കരികിലിരുന്നു. ഇരുകൈകളും ചേർത്തുപിടിച്ച്‌ കുശലാന്വേഷണം. പെൻഷൻ കിട്ടാറില്ലേ എന്ന്‌ സ്ഥാനാർഥി ചോദിച്ചപ്പോൾ ആ എഴുപതുകാരിയുടെ കണ്ണുകളിൽ തിളക്കം. ഉണ്ടെന്ന മറുപടിയോടെ പുത്രവാത്സല്യത്തോടെ സ്ഥാനാർഥിയെ ചേർത്തുപിടിച്ചു. ഇത്‌ നാലുസെന്റ്‌ ഉന്നതിയിലെമാത്രം അനുഭവമല്ല. എൽഡിഎഫ്‌ സ്ഥാനാർഥിയെ നെഞ്ചോടുചേർക്കുകയാണ്‌ നാട്‌. തെങ്കര മുണ്ടക്കണ്ണി പൊക്കാളത്തിൽ പ്രിയ (43) സിപിഐ പ്രവർത്തകയാണ്‌. പ്രീ പ്രൈമറി അധ്യാപികയായിരുന്നു. നിലവിൽ മണ്ണാർക്കാട്‌ ട‍ൗണിൽ പിഎസ്‌സി കോച്ചിങ് സെന്റർ നടത്തുന്നു. നാടിന്‌ സുപരിചിത. തെങ്കര, 14, 15 വാർഡുകൾ, ഭീമനാട് ശ്രീ വെള്ളിലാക്കുന്ന്‌ ഭഗവതി ക്ഷേത്രം, എട്ടാം വാർഡിലെ വേങ്ങ, ഒമ്പതാം വാർഡിൽ രാജീവ്‌ ഗാന്ധി ഉന്നതി പടുവിൽ, ആനമൂളി തുടങ്ങിയ സ്ഥലങ്ങളിലെ വീടുകളിലാണ്‌ ബുധനാഴ്‌ച സന്ദർശനം നടത്തിയത്‌. കുമരംപുത്തൂർ, തെങ്കര, തച്ചനാട്ടുകര, കോട്ടോപ്പാടം പഞ്ചായത്തുകൾ അടങ്ങുന്നതാണ്‌ ഡിവിഷൻ. നിലവിൽ ലീഗ്‌ ഭരിക്കുന്ന ഡിവിഷനിലെ റോഡ്‌ തകർച്ച, കുടിവെള്ളക്ഷാമം, തെരുവുവിളക്കില്ലായ്‌മ എന്നിവ ചർച്ചയാകുന്നു. സംസ്ഥാന സർക്കാരിന്റെ വികസന പ്രവർത്തനങ്ങൾ ഇ‍ൗ പഞ്ചായത്തുകൾ ഏറ്റെടുക്കാത്തതും പരാതികളായി എൽഡിഎഫ്‌ സ്ഥാനാർഥിക്ക്‌ മുന്നിലെത്തുന്നു.