നിമ്മതിയാ ഇറുക്കോം

സായൂജ്‌ ചന്ദ്രൻ

പാലക്കാട്‌

തമിഴ്‌നാട്‌ അതിർത്തിയായ എരുത്തേമ്പതി പഞ്ചായത്തിലെ വണ്ണാമട കുമാരനൂർ ഗ്രാമം. പൊളിഞ്ഞുവീഴാറായ കൂരയിൽനിന്ന്‌ കരകയറിയ കഥ ഓർക്കുകയാണ്‌ ഗൃഹനാഥ മാസിലാമണി. ""എൽഡിഎഫ്‌ കച്ചി ഇരുന്തതിനാലെ വീട്‌ കെടച്ചോം.തണ്ണി കെടച്ചോം.പെൻഷൻ കെടച്ചോം. നിമ്മതിയും കെടച്ചോം.'' 10 വർഷംമുന്പ്‌ യുഡിഎഫിന്റെ ദുർഭരണത്തിൽ നാട്‌ വരണ്ടുനിന്ന കാലം. കിടപ്പുരോഗിയായ ഭർത്താവ്‌ ദണ്ഡപാണിയുമായി പൊളിഞ്ഞുവീഴാറായ വീട്ടിലായിരുന്നു താമസം. കുടിവെള്ളത്തിന്‌ ടാങ്കർ ലോറി മാത്രം ആശ്രയം. ഒരു ദിവസം ലോറിയെത്തിയില്ലെങ്കിൽ തലേന്ന്‌ ബാക്കിയുള്ള അരക്കുടം വെള്ളത്തിന്‌ പൊന്നിന്റെ വില. ആ ദുരിതകാലം മാറിയ ആഹ്ലാദത്തിലാണവർ. ആറ്‌ വർഷംമുമ്പാണ്‌ മാസിലാമണിക്ക്‌ ലൈഫ്‌ ഭവന പദ്ധതിയിൽ വീടൊരുങ്ങിയത്‌. കൂടെ, പ്രത്യേകം കുടിവെള്ള കണക്ഷനും. കഴിഞ്ഞ മാസത്തെ പെൻഷൻ തുകകൊണ്ട്‌ ദണ്ഡപാണിയെ ആശുപത്രിയിൽ ചികിത്സിച്ചതും, പെൻഷൻ തുക വർധിപ്പിച്ചതും അഭിമാനത്തോടെ പറയുന്നു. തദ്ദേശ തെരഞ്ഞെടുപ്പിൽ ആര്‌ ജയിക്കുമെന്ന ചോദ്യത്തിന്‌ തലയിൽ കൈവച്ചുകൊണ്ടായിരുന്നു മറുപടി: ""എൽഡിഎഫ്‌ താൻ വരണം..മറ്റവങ്കൾ വന്താ എങ്കൾക്കുള്ളതും അവങ്കെ തിരുടും'' .