വികസനച്ചേലിന്റെ അഞ്ചാണ്ട്‌

വികസനച്ചേലിന്റെ അഞ്ചാണ്ട്‌

സി പി മുഹമ്മദ്‌ന‍ൗഫൽ

ചെർപ്പുളശേരി

നഗരസഭയായശേഷമുള്ള ആദ്യ അഞ്ചുവർഷത്തെ അഴിമതിനിറഞ്ഞ യുഡിഎഫ് ഭരണം മാറിയപ്പോൾ ചെർപ്പുളശേരിക്ക്‌ വികസനപ്പൂക്കാലം. കഴിഞ്ഞ അഞ്ചുവർഷം എൽഡിഎഫ്‌ ഭരണസമിതി നടപ്പാക്കിയത്‌ സമഗ്രമുന്നേറ്റം. എതിരാളികൾക്ക് സമരംചെയ്യാനോ അഴിമതി ആരോപണം ഉന്നയിക്കാനോ കഴിയാത്ത മികവുറ്റ ഭരണം. ചെർപ്പുളശേരി നഗരത്തിന്റെ മുഖച്ഛായ മാറ്റി. ആധുനിക രീതിയിൽ നഗരനവീകരണം യാഥാർഥ്യമാക്കി. സമഗ്ര കുടിവെള്ള പദ്ധതി അന്തിമഘട്ടത്തിലാണ്. 1600 കുടുംബങ്ങൾക്ക് സൗജന്യമായി ഗാർഹിക കണക്ഷൻ നൽകി. വിദ്യാഭ്യാസ സ്ഥാപനങ്ങൾ നവീകരിച്ചു. ചെർപ്പുളശേരി സാമൂഹിക ആരോഗ്യകേന്ദ്രത്തിൽ കൂടുതൽ സ‍ൗകര്യമേർപ്പെടുത്തി. ഈവനിങ്‌ ഒ പിയിൽ രാത്രി ഏഴുവരെ ഡോക്ടർമാരുടെയും ജീവനക്കാരുടെയും സേവനമുറപ്പാക്കി. പുതിയ പുരുഷ വാർഡ് നവീകരിച്ചു. 1.79 കോടി രൂപയുടെ ഐസൊലേഷൻ വാർഡ് പണി പൂർത്തിയാക്കി. കാറൽമണ്ണയിലും വീരമംഗലത്തും നഗര ജനകീയ ആരോഗ്യ കേന്ദ്രങ്ങൾ പ്രവർത്തിക്കുന്നു. ചെർപ്പുളശേരിയിലെ പുതിയ ബസ്‌സ്റ്റാൻഡ് തുറന്നു. പഴയ ബസ്‌സ്റ്റാൻഡ് പൊളിച്ചുനീക്കി ആധുനികരീതിയിൽ വ്യാപാരസമുച്ചയവും ബസ്‌സ്റ്റാൻഡും നിർമിക്കാൻ പദ്ധതിയായി. ലൈഫ്‌ പദ്ധതിയിൽ 332 വീടുകൾ നിർമിച്ചുനൽകി. അങ്കണവാടികൾ സ്മാർട്ടാക്കി. അതിദരിദ്രരില്ലാത്ത നഗരസഭയായി പ്രഖ്യാപിച്ചു. കായികപാരമ്പര്യത്തിന് കരുത്തേകാൻ ആധുനിക സ്റ്റേഡിയത്തിന് രണ്ടുകോടി രൂപ വകയിരുത്തി. 10 ലക്ഷം രൂപ ചെലവിട്ട്‌ ഓപ്പൺ ജിം യാഥാർഥ്യമാക്കി. നഗരവികസനത്തിന്‌ പുതിയ മാസ്റ്റർ പ്ലാൻ കൊണ്ടുവന്നു. നെൽകൃഷി പ്രോത്സാഹിപ്പിക്കാനും വിത്ത്, വളം, ഉഴവുകൂലി എന്നിവയ്‌ക്കും വർഷം 50 ലക്ഷം രൂപവരെ വിലയിരുത്തി. 15 ഹെക്ടർ തരിശുഭൂമി കൃഷിഭൂമിയാക്കി മാറ്റി. അഞ്ചുവർഷത്തിനകം മാലിന്യസംസ്കരണത്തിൽ ബഹുദൂരം മുന്നോട്ടുപോയി. ഫാസ്റ്റസ്റ്റ് മൂവിങ് പുരസ്കാരം കരസ്ഥമാക്കി. ഒഡിഎഫ്പ്ലസ് നഗരസഭ, ജിഎഫ്സി നഗരസഭ എന്നീ അംഗീകാരങ്ങളും സ്വച്ഛ് സർവേക്ഷൺ റാങ്കിങ്ങിൽ ദേശീയതലത്തിൽ 151–ാം റാങ്കും സംസ്ഥാനതലത്തിൽ അഞ്ചാം റാങ്കും ജില്ലാതലത്തിൽ രണ്ടാം റാങ്കും നേടി. നഗരസഭയിൽ 33 ഡിവിഷനുകളാണുള്ളത്. നിലവിൽ 106 സ്ഥാനാർഥികൾ മത്സര രംഗത്തുണ്ട്‌.