‘നിങ്ങള്‌ ഞങ്ങടെ ആളല്ലേ’

സ്വന്തം ലേഖിക

കുുടമ്പിടി ഗ്രാമവഴികളിൽ, ചുവരെഴുത്തുകൾക്കും ചെങ്കൊടികൾക്കും ഇടയിൽ ആകാംക്ഷയോടെ ഒരുകൂട്ടം ആളുകൾ. നാൽപ്പത്‌ വർഷമായി നാടിന്‌ പ്രിയപ്പെട്ട ‘മോഹനേട്ട’നായാണ്‌ കാത്തിരിപ്പ്‌. ‘‘ദേ ആളെത്തി. നിങ്ങളിനി എങ്ങോട്ടാ. ഞങ്ങളുമുണ്ട്‌ പ്രചാരണത്തിന്‌’’– അവർ ഒപ്പംകൂടി. ‘‘ഇതുവരെ മറ്റുള്ളവർക്കാണ്‌ വോട്ട്‌ ചോദിച്ചത്‌, ആദ്യമായാണ്‌ എനിക്കുവേണ്ടി’’– കപ്പൂർ ജില്ലാ പഞ്ചായത്ത്‌ ഡിവിഷൻ എൽഡിഎഫ്‌ സ്ഥാനാർഥി പി എൻ മോഹനൻ കുമ്പിടി ജങ്‌ഷനിൽ വോട്ടഭ്യർഥനയ്‌ക്കിടെ പറഞ്ഞു. ‘‘അതല്ലേ, നിങ്ങള്‌ ഞങ്ങടെ ആളല്ലേ. വോട്ട്‌ ചോദിച്ചില്ലെങ്കിലും തരും’ ’– ഹരിതകർമ സേനയിലെ സുനിതയുടെ മറുപടി. ഭാരതപ്പുഴയുടെ തീരത്തേക്കാണ്‌ പ്രചാരണം നീങ്ങിയത്‌. നൂറുമീറ്റർ അകലെ തൃത്താലയുടെ വികസന അടയാളമായ കാങ്കപ്പുഴ റെഗുലേറ്റർ കം ബ്രിഡ്‌ജ്‌. ആനക്കര, കപ്പൂര്‍, പട്ടിത്തറ പഞ്ചായത്തുകളിലെ കുടിവെള്ള പ്രശ്നത്തിന്‌ പരിഹാരമാകുന്ന 118 കോടി രൂപ കിഫ്‌ബി ഫണ്ട്‌ ചെലവിട്ട്‌ പൂർത്തിയാകുന്ന പദ്ധതി. ഇവ കൂടാതെ, നാഗലശേരി, തിരുമിറ്റക്കോട്‌, തൃത്താല, ചാലിശേരി പഞ്ചായത്തുകളിലുൾപ്പെടെ 57 വാർഡുകളാണ്‌ ഡിവിഷനിലുള്ളത്‌. നാഗലശേരി ഡിവിഷനിൽനിന്ന്‌ ജില്ലാ പഞ്ചായത്ത്‌ അംഗമായ വി പി ഷാനിബയുടെ ഇടപെടലിൽ നടത്തിയ വികസനപ്രവർത്തനങ്ങളുടെ തുടർച്ചയാണ്‌ പി എൻ മോഹനനിലൂടെ എൽഡിഎഫ്‌ ലക്ഷ്യമിടുന്നത്‌. 255 റോഡുകൾക്കായി 330 കോടിയുടെ വികസന പ്രവർത്തനങ്ങളാണ് തൃത്താലയിൽ നടക്കുന്നത്. എംസിഎഫ്​ നിർമാണം​ (10 ലക്ഷം), പഞ്ചായത്ത് ഓഫീസ് (20 ലക്ഷം), ഹരിതകർമ സേന (17 ലക്ഷം), ഹോമിയോ ആശുപത്രി (10 ലക്ഷം), അങ്കണവാടികൾ (30 ലക്ഷം) തുടങ്ങിയവ പൂർത്തിയാക്കി. സിപിഐ എം ജില്ലാ കമ്മിറ്റി അംഗമായ പി എൻ മോഹനൻ സിഐടിയു ജില്ലാ പ്രസിഡന്റും ഹെഡ്‌ലോഡ്‌ ആൻഡ്‌ ജനറൽ വർക്കേഴ്‌സ്‌ യൂണിയൻ ജില്ലാ സെക്രട്ടറിയുമാണ്‌. തൃത്താല മണ്ഡലം എൽഡിഎഫ്‌ കൺവീനർ, ചുമട്ടുതൊഴിലാളി ഫെഡറേഷൻ സംസ്ഥാന വൈസ് പ്രസിഡന്റ്‌, മദ്യ വ്യവസായ തൊഴിലാളി യൂണിയൻ താലൂക്ക് പ്രസിഡന്റ്‌ എന്നീ നിലകളിലും പ്രവർത്തിക്കുന്നു.