റിബലുകളെ 
ലീഗ് പുറത്താക്കി

ഒഞ്ചിയം

ഏറാമല പഞ്ചായത്തിൽ ലീഗ് റിബലമായി മത്സരിച്ച എസ്‌ടിയു നേതാവായ അഷറഫ് കോറോത്തിനെ ലീഗ്‌ സംസ്ഥാന കമ്മിറ്റി പ്രാഥമിക അംഗത്വത്തിൽനിന്ന് പുറത്താക്കി. അച്ചടക്കം ലംഘിച്ചതിനെതിരെയാണ് നടപടി. തന്റെ വിജയം മുൻകൂട്ടി കണ്ടതുകൊണ്ടാണ് ഈ നടപടിയെന്നും ലീഗിലെ നൂറുണക്കിനാളുകളുടെ പിന്തുണയും സഹകരണവും തനിക്കുണ്ടെന്നും അഷറഫ് കോറോത്ത് പറഞ്ഞു. ഏറാമല പഞ്ചായത്തിലെ ഒമ്പതാം വാർഡായ എളങ്ങോളിയിലാണ് ലീഗ് സംസ്ഥാന നേതാവായ ഒ കെ കുഞ്ഞബ്ദുള്ളക്കെതിരെ എസ്ടിയുവിന്റെ ജില്ലാ നേതാവായ അഷറഫ് കോറോത്ത് റിബലായി മത്സര രംഗത്ത് എത്തിയത്. അഷറഫിനെ പിന്തിരിപ്പിക്കാൻ നിരവധി ശ്രമങ്ങൾ നടത്തിയെങ്കിലും പത്രിക പിൻവലിച്ച് അനുനയത്തിന് തയ്യാറായില്ല അഷറഫിന് പിന്തുണയുമായി ലീഗിലെ നിരവധി പേർ രംഗത്തെത്തിയിട്ടുണ്ട്. കഴിഞ്ഞദിവസം അഷറഫ് ലീഗല്ലെന്ന് ലീഗ് നേതാക്കൾ മാധ്യമങ്ങളിൽ കുറ്റപ്പെടുത്തി. ലീഗിന് സ്വാധീനമുള്ള എളങ്ങോളിയിൽ അഷറഫിന്റെ വെല്ലുവിളി ലീഗ് നേതൃത്വത്തെ കുഴക്കുന്നു. മുൻ എംഎൽഎയും ലീഗ് സംസ്ഥാന നേതാവുമായ പാറക്കൽ അബ്ദുള്ളക്കെതിരെയും ഏറാമലയിൽ പടയൊരുക്കമുണ്ട്. ലീഗ് വിമതരായി മത്സരിക്കുന്ന വടകര മുനിസിപ്പാലിറ്റിയിലെ വി സി വി നാസര്‍, കുറ്റ്യാടി നിയോജക മണ്ഡലം വേളം പഞ്ചായത്തിലെ നിസാര്‍ കുമികണ്ടി എന്നിവരെയും ലീഗിൽനിന്ന് സസ്‌പെൻഡ്‌ ചെയ്തു.