‘വൃത്തി’യോടെ ഭരിക്കാൻ അവരിറങ്ങുന്നു

കോഴിക്കോട്

നാടും വീടും മാത്രമല്ല, ഭരണരംഗം വരെ വൃത്തിയോടെ കൊണ്ടുപോകാൻ ഹരിതകർമ സേനയ്‌ക്കാവും. സംശയമുള്ളവരെ അത്‌ ബോധ്യപ്പെടുത്താൻ അവർ ഒരുങ്ങിയിട്ടുണ്ട്‌. ഹരിത കർമ സേനാംഗങ്ങളായ 38 പേരാണ്‌ തദ്ദേശ തെരഞ്ഞെടുപ്പ്‌ ഗോദയിൽ അങ്കം കുറിയ്‌ക്കുന്നത്‌. കട്ടിപ്പാറ, അരിക്കുളം, കാവിലുംപാറ, കുന്നുമ്മൽ പഞ്ചായത്തുകളിൽ മൂന്ന്‌ വീതം സേനാംഗങ്ങൾ മത്സരിക്കുന്നു. വില്ല്യാപ്പള്ളി, മേപ്പയൂർ, ചെക്യാട്‌, കുരുവട്ടൂർ, കുന്നമംഗലം, കായണ്ണ, വേളം, പുറമേരി, ഫറോക്ക്‌, കോടഞ്ചേരി, മുക്കം, കാക്കൂർ, ബാലുശേരി, നരിപ്പറ്റ, ചെങ്ങോട്ട്‌ കാവ്‌, അത്തോളി, നടുവണ്ണൂർ, ചാത്തമംഗലം, ചക്കിട്ടപ്പാറ, കായക്കൊടി, പെരുമണ്ണ, രാമനാട്ടുകര, കോഴിക്കോട്‌ കോർപറേഷൻ എന്നിവയാണ്‌ മത്സരിക്കുന്ന മറ്റ്‌ തദ്ദേശ സ്ഥാപനങ്ങൾ. ജില്ലയിൽ മൊത്തം 2994 ഹരിതകർമ സേനാംഗങ്ങളുണ്ട്‌. 2020ലെ തെരഞ്ഞെടുപ്പിലും അംഗങ്ങൾ മത്സരിച്ചിരുന്നുവെങ്കിലും കുറവായിരുന്നു. ഹരിത കേരള മിഷൻ പദ്ധതിയുടെ ഭാഗമായി 2017–ലാണ്‌ വീടുകൾ, പൊതുഇടങ്ങൾ എന്നിവ വൃത്തിയാക്കാനായി ഹരിത കർമ സേനാംഗങ്ങളെ രൂപീകരിച്ചത്‌. .