വികസന വഴികളിൽ വിജയമുറപ്പ്

സ്വന്തം ലേഖകൻ ഫറോക്ക് സംസ്ഥാന സർക്കാരിന്റെയും തദ്ദേശ സ്ഥാപനങ്ങളുടെയും നേതൃത്വത്തിൽ വികസന വിപ്ലവം സാധ്യമാക്കിയ കടലുണ്ടി ഡിവിഷനിൽ വോട്ടഭ്യർഥിച്ച് എൽഡിഎഫ് സ്ഥാനാർഥി അഞ്ജിത ഷനൂബ്. പരമ്പരാഗത ഇടതുകോട്ടയായ കടലുണ്ടി ഇത്തവണയും ഇടതുപക്ഷത്തിന്‌ അഭിമാന വിജയം സമ്മാനിക്കുമെന്ന്‌ ഉറപ്പിക്കുന്നതായി ജനപിന്തുണ. മണ്ണൂർ അരുമനക്കണ്ടിയിൽ നിന്നാണ്‌ പര്യടനമാരംഭിച്ചത്. കടലുണ്ടി, ഒളവണ്ണ പഞ്ചായത്തുകളിലെ കൈതവളപ്പ്, പെരിങ്ങോട്ടുകുന്ന്, തീപ്പെട്ടിക്കമ്പനി, ആലുങ്ങൽ, വെട്ടുകാട്ടിൽ, കൊടൽനടക്കാവ്, ചാത്തോത്തറ, ചേരിപ്പാടം, കൊടിനാട്ടുമുക്ക്, മാവത്തുംപടി, ഒളവണ്ണ ബസാർ, കയറ്റി, കമ്പിളിപറമ്പ് എന്നിവിടങ്ങളിലെ ആവേശോജ്വല സ്വീകരണശേഷം ഒടുമ്പ്രയിൽ സമാപിച്ചു. ഓരോകേന്ദ്രത്തിലും വോട്ടർമാർ അഹ്ലാദത്തോടെയാണ്‌ വരവേറ്റത്. ബ്ലോക്ക് ഡിവിഷനുകളിലെയും വാർഡുകളിലെയും സ്ഥാനാർഥികളും പങ്കെടുത്തു. പര്യാടനം അരുമനക്കണ്ടിയിൽ സിപിഐ എം ജില്ലാ സെക്രട്ടറിയറ്റ് അംഗം എം ഗിരീഷ് ഉദ്ഘാടനംചെയ്തു. സിദ്ധാർഥൻ പുളിക്കൽ അധ്യക്ഷനായി. സിപിഐ എം ഏരിയാ കമ്മിറ്റി അംഗം ടി കെ ശൈലജ, ബ്ലോക്ക്–വാർഡ് സ്ഥാനാർഥികളായ കെ ഗീത, സി പ്രദീപ് കുമാർ എന്നിവർ സംസാരിച്ചു. എൻ ഭാസ്കരൻ നായർ സ്വാഗതം പറഞ്ഞു. രണ്ടാംദിവസമായ ഞായർ രാവിലെ 8.30ന് ചാലിയം ലൈറ്റ് ഹൗസ് പരിസരത്തുനിന്ന്‌ പര്യടനം ആരംഭിക്കും. വൈകിട്ട് ആറിന് ആലുംകുളത്താണ്‌ സമാപനം.