ഹരിതവിദ്യാലയം റിയാലിറ്റി ഷോ മികവുകൾ പറയാൻ
ജില്ലയിൽനിന്ന്‌ 7 സ്‌കൂളുകൾ

കോഴിക്കോട്‌

പൊതുവിദ്യാഭ്യാസ മേഖലയിലെ മികവുകൾ രാജ്യത്തിനുമുന്നിൽ അവതരിപ്പിക്കാൻ ജില്ലയിൽനിന്ന്‌ എഴു വിദ്യാലയങ്ങൾ. കേരള ഇൻഫ്രാസ്ട്രക്‌ചർ ആൻഡ്‌ ടെക്നോളജി ഫോർ എഡ്യൂക്കേഷൻ (കൈറ്റ്‌) സംഘടിപ്പിക്കുന്ന ഹരിതവിദ്യാലയം വിദ്യാഭ്യാസ റിയാലിറ്റി ഷോയുടെ നാലാം എഡിഷന്റെ പ്രാഥമിക പട്ടികയിലാണ്‌ ജില്ലയിലെ ഏഴു സ്‌കൂളുകൾ ഇടംപിടിച്ചത്‌. വില്യാപ്പള്ളി എംജെ വിഎച്ച്എസ്എസ്, കലിക്കറ്റ് ഗേൾസ് എച്ച്എസ്എസ്, കൊടുവള്ളി ജിഎച്ച്എസ്എസ്, മുക്കം എംകെ എച്ച്എംഎംഒവി എച്ച്എസ്എസ് ഗേൾസ്, വേനപ്പാറ എൽഎഫ്‌ യുപിഎസ്‌, മുണ്ടക്കര എയുപിഎസ്‌, കൊടൽ ജിയുപിഎസ്‌ എന്നീ വിദ്യാലയങ്ങളാണ്‌ തെരഞ്ഞെടുക്കപ്പെട്ടത്‌. സംസ്ഥാനതലത്തിൽ ആകെ 85 സ്‌കൂളുകളാണ്‌ പട്ടികയിലുള്ളത്‌. സ്കൂളുകൾ ഏറ്റെടുത്ത്‌ നടത്തുന്ന ക്രിയാത്മകവും മാതൃകാപരവുമായ പ്രവർത്തനങ്ങളെ അംഗീകരിക്കുകയും മറ്റു വിദ്യാലയങ്ങളുമായി പങ്കുവച്ച് പൊതുവിദ്യാഭ്യാസത്തിന്റെ നിലവാരം ഉയർത്തുകയുമാണ് റിയാലിറ്റി ഷോയിലൂടെ. പൊതുവിദ്യാഭ്യാസ മേഖലയിൽ വിദ്യാഭ്യാസ വകുപ്പ് നടപ്പാക്കിയ സമഗ്ര മുന്നേറ്റങ്ങൾ ചർച്ചചെയ്യും. സുസജ്ജമായ ഭൗതികസൗകര്യങ്ങളും മികച്ച അക്കാദമിക പിന്തുണയും എഐ റോബോട്ടിക്സ് ഉൾപ്പെടെയുള്ള സാങ്കേതിക പഠനവും ലഭ്യമാക്കുന്ന കേരളത്തിലെ സ്കൂളുകൾക്ക് വേദി വലിയ അംഗീകാരമാണ്‌. 2010, 2017, 2022 വർഷങ്ങളിലെ റിയാലിറ്റി ഷോയുടെ തുടർച്ചയാണിത്. ​സംപ്രേഷണം 2026 ജനുവരിയിൽ തിരുവനന്തപുരം കൈറ്റ് സ്റ്റുഡിയോയിൽ 26 മുതൽ പരിപാടിയുടെ ഷൂട്ട്‌ ആരംഭിച്ചു. കൈറ്റ് വിക്ടേഴ്സിൽ 2026 ജനുവരി ആദ്യംമുതലാണ്‌ ഷോയുടെ സംപ്രേഷണം തുടങ്ങുക. അവസാന റൗണ്ടിലേക്ക് തെരഞ്ഞെടുക്കപ്പെടുന്ന 10 സ്കൂളുകൾക്കും വിജയികൾക്കും ഫെബ്രുവരിയിൽ നടക്കുന്ന ഗ്രാൻഡ്‌ ഫിനാലെയിൽ പ്രത്യേക അവാർഡുകൾ സമ്മാനിക്കും. തെരഞ്ഞെടുക്കപ്പെട്ട വിദ്യാലയങ്ങളുമായി കൈറ്റ് സിഇഒ കെ അൻവർ സാദത്ത് ഓൺലൈനായി സംസാരിച്ചു. ജില്ലാ കോ ഓർഡിനേറ്റർ കെ മനോജ് കുമാർ പങ്കെടുത്തു.