ഊരിൽനിന്ന് ഉരുവിന്റെ നാട്ടിലേക്ക്

മുക്കം

നഗരക്കാഴ്‌ചകളിൽ മനം നിറഞ്ഞ്‌ കോടഞ്ചേരി പാത്തിപ്പാറ ഉന്നതിയിലെ വിദ്യാർഥികൾ. നെല്ലിപ്പൊയിൽ സെന്റ് തോമസ് എൽപി സ്കൂൾ വിദ്യാർഥികളാണ്‌ കോഴിക്കോട്‌ നഗരത്തിലെത്തിനാടിന്റെ വിസ്മയ കാഴ്ചകളിൽ അഭിരമിച്ചത്. "ഊരിൽനിന്ന് ഉരുവിന്റെ നാട്ടിലേക്ക്’ എന്ന പ്രോജക്ടിന്റെ ഭാഗമായാണ് ഉന്നതിയിലെ മാതാപിതാക്കളില്ലാത്ത കുട്ടികളടക്കം വിദ്യാർഥികളെ സ്കൂൾ നേതൃത്വത്തിൽ നഗരക്കാഴ്ച കാണിക്കാൻ കൊണ്ടുപോയത്. തൂക്കുപാലത്തിലൂടെയുള്ള സഞ്ചാരം, ട്രെയിൻ യാത്ര, ബേപ്പൂരിലെ ബോട്ടിങ്‌, എസ്കലേറ്റർ, കടൽ, വെള്ളയിലെ മത്സ്യബന്ധന തുറമുഖം എന്നിവ കുട്ടികൾക്ക് അവിസ്മരണീയ അനുഭവമായി. തങ്ങളുടെ നാട്ടിലെ സാധാരണ കാഴ്ചകളിൽ നിന്നും വ്യത്യസ്തമായ ഓരോ കാര്യങ്ങളും കുട്ടികൾക്ക് പുത്തൻ അനുഭവമായി മാറിയെന്ന് അധ്യാപകർ പറയുന്നു. ആദ്യമായാണ് കുട്ടികൾ ഇതെല്ലാം കാണുന്നത്. പ്രധാനാധ്യാപിക എം ടി ഗീത, അധ്യാപിക ശാലു ഏലിയാസ് എന്നിവരുടെ നേതൃത്വത്തിലായിരുന്നു ഉരുവിന്റെ നാട്ടിലേക്കുള്ള യാത്ര