ആദ്യം ആശങ്ക പിന്നെ ആശ്വാസം

സ്വന്തം ലേഖകൻ കോഴിക്കോട്‌ ശനിയാഴ്‌ച രാവിലെ ഒന്പതരയാകുന്നതേയുള്ളൂ. കറുത്തിരുണ്ട പുക ഉയർന്നതോടെ നഗരം മുൾമുനയിലായി. തീ ആളിപ്പടർന്നതും കനത്ത ആശങ്കയ്‌ക്കിടയാക്കി, ആളുകൾ പരിഭ്രാന്തരായി. ബേബി മെമ്മോറിയൽ ആശുപത്രിയുടെ പുതിയ കെട്ടിടമായ സി ബ്ലോക്കിൽ ഒമ്പതാംനിലയിലായിരുന്നു തീപടർന്നത്‌. ഇതറിഞ്ഞതോടെ ആശങ്കകൂടി. നഗരത്തിന്റെ വിവിധ ഭാഗങ്ങളിൽനിന്നായി അഗ്നിരക്ഷാസേന മണയടിച്ചെത്തി. മീഞ്ചന്ത നിലയത്തിൽനിന്ന്‌ മൂന്നും ബീച്ചിൽനിന്ന്‌ ഒന്നും വെള്ളിമാടുകുന്നിൽനിന്ന്‌ രണ്ടും ചേർന്ന്‌ ആകെ ആറ്‌ യൂണിറ്റ്‌. തുടർന്ന്‌ രക്ഷാപ്രവർത്തനം ദ്രുതഗതിയിലായി. എട്ടാം നിലയിലുണ്ടായിരുന്ന രോഗികളെയും കൂട്ടിരിപ്പുകാരെയും അപകട സൈറൺ മുഴങ്ങിയ ഉടൻ ആശുപത്രി അധികൃതരും മറ്റും ചേർന്ന്‌ സുരക്ഷിത സ്ഥാനത്തേക്ക്‌ മാറ്റിയിരുന്നു. ഒപി വിഭാഗത്തിലുള്ളവരും ജീവനക്കാരും താഴെനിലകളിലുണ്ടായിരുന്ന രോഗികളും ഉൾപ്പെടെ ആശുപത്രയുടെ പുറത്തിറങ്ങി. തീപടർന്ന ഭാഗത്ത് രോഗികളെയോ മറ്റ് ആളുകളെയോ പ്രവേശിപ്പിച്ചിരുന്നില്ല എന്നതും വലിയ ആശ്വാസമായി. പ്രാഥമികഘട്ടത്തിൽതന്നെ തീ നിയന്ത്രണ വിധേയമാക്കാനായതും രക്ഷയായി. അതിനാൽ താഴെനിലയിലേക്ക്‌ പടർന്നില്ല. എസി പ്ലാന്റിൽ ഇൻസ്റ്റലേഷൻ പ്രവൃത്തി നടക്കുന്നതിനിടെ വെൽഡിങ്‌ മെഷീനിൽനിന്ന്‌ തീപ്പൊരി ചിതറിയാണ്‌ തീപിടിത്തമുണ്ടായതെന്നാണ്‌ പ്രാഥമിക നിഗമനം. സംഭവത്തെക്കുറിച്ച് കൂടുതൽ അന്വേഷണം നടത്തുമെന്ന്‌ പൊലീസ്‌ അറിയിച്ചു. പരിശോധനകൾക്കുശേഷമേ കൃത്യമായ കാരണം പറയാനാകൂ എന്ന്‌ അധികൃതർ വ്യക്തമാക്കി. എം കെ രാഘവൻ എംപി, അഹമ്മദ്‌ ദേവർകോവിൽ എംഎൽഎ, സിറ്റി പൊലീസ്‌ കമീഷണർ ടി നാരായണൻ, ഡെപ്യൂട്ടി കമീഷണർ അരുൺ കെ പവിത്രൻ എന്നിവർ സംഭവസ്ഥലത്തെത്തിയിരുന്നു. ട‍ൗൺ, മെഡിക്കൽ കോളേജ്‌, സ്‌പെഷ്യൽ ബ്രാഞ്ച്‌ ഉൾപ്പെടെയുള്ള പൊലീസ്‌ ഉദ്യോഗസ്ഥരും സംഭവസ്ഥലത്തെത്തി. ​മന്ത്രി ആശുപത്രി അധികൃതരുമായി സംസാരിച്ചു സംഭവം നടന്നയുടൻ ആശുപത്രി അധികൃതരുമായി ആരോഗ്യ മന്ത്രി വീണാ ജോർജ് സംസാരിച്ചു. രോഗികളെ ഷിഫ്റ്റ് ചെയ്യേണ്ട ആവശ്യമുണ്ടെങ്കിൽ മെഡിക്കൽ കോളേജിൽ ഐസിയു, വെന്റിലേറ്റർ ഒരുക്കാനുള്ള നിർദേശവും മന്ത്രി നൽകി. രോഗികൾ സുരക്ഷിതരെന്ന് ആശുപത്രി അധികൃതർ അറിയിച്ചു.