നിലവറയിലെ ഇരുമ്പുപെട്ടി ശൂന്യം

വടകര

ബ്രിട്ടീഷ് ഭരണകാലത്ത് സ്ഥാപിച്ച വടകര സബ് ട്രഷറിയുടെ നിലവറയിൽനിന്ന്‌ കണ്ടെത്തിയത്‌ ശൂന്യമായ ഇരുമ്പ് പെട്ടി. വെള്ളിയാഴ്ച പകൽ 11.20–ഓടെയാണ് റവന്യു ഉദ്യോഗസ്ഥരും പൊലീസ് ഉൾപ്പെടെയുള്ള സംഘവുമെത്തി നിലവറ പൊളിച്ച് പരിശോധന നടത്തിയത്. നിലവറയുടെ മധ്യത്തിലായി കുഴിച്ചിട്ട നിലയിലാണ്‌ ഇരുമ്പ് പെട്ടി കണ്ടെത്തിയത്‌. ഏകദേശം ഒരു മീറ്റർ നീളവും മുക്കാൽ മീറ്ററോളം വീതിയുമുള്ള പെട്ടി ശൂന്യമായിരുന്നു. ബ്രിട്ടീഷ് ഭരണകാലത്ത് താലൂക്കിന്റെ ആസ്ഥാനമായിരുന്നു സബ് ട്രഷറി പ്രവർത്തിച്ചിരുന്ന കെട്ടിടം. കറൻസികളും മറ്റ് വിലപിടിപ്പുള്ള വസ്തുക്കളും സൂക്ഷിക്കുന്നതിനാണ് ഇത്തരം ഇരുമ്പറകൾ നിർമിച്ചിരുന്നത്. വടകര ട്രഷറിയിലെ പതിറ്റാണ്ടുകൾ പഴക്കമുള്ള ഈ നിലവറ ഇതുവരെ തുറന്നിരുന്നില്ല. വടകര താലൂക്ക് ഓഫീസ് ഉൾപ്പെടെ പ്രവർത്തിച്ചിരുന്ന കെട്ടിടം തീപിടിച്ച് നശിച്ചിരുന്നു. പുതിയ റവന്യു ടവർ നിർമിക്കുന്നതിന്റെ ഭാഗമായി പഴയ കെട്ടിടം പൊളിച്ചുമാറ്റുന്നതിന്റെ ഭാഗമായാണ് പഴയ ട്രഷറി കെട്ടിടം പൊളിച്ചത്. അമൂല്യ വസ്തുക്കൾ ഉൾപ്പെടെ നിലവറയ്‌ക്കുള്ളിൽ ഉണ്ടായിരിക്കുമെന്ന പ്രതീക്ഷയിലായിരുന്നു ഏവരും. കോഴിക്കോട് പുതിയറ, വയനാട് വൈത്തിരി, ഇടുക്കി ദേവികുളം എന്നിവിടങ്ങളിലെ ട്രഷറി ഓഫീസുകളിൽ ഇത്തരം ഭൂഗർഭ നിലവറ ഉണ്ടായിരുന്നു. വിലപിടിപ്പുള്ള വസ്തുക്കൾ സൂക്ഷിക്കാൻ ഇരുമ്പു പെട്ടികൾ നിർമിച്ചിരുന്ന ‘ഡിണ്ടിഗൽ'എന്ന കമ്പനിയാണ്‌ ഇ‍ൗ പെട്ടി നിർമിച്ചിട്ടുള്ളത്‌. വടകരയിൽനിന്ന്‌ കണ്ടെടുത്ത ഇരുമ്പ് പെട്ടി തിരുവനന്തപുരത്ത് ട്രഷറി ഡിപ്പാർട്ട്മെന്റിന്റെ പുരാവസ്തു ശേഖരത്തിലേക്ക് മാറ്റുമെന്ന്‌ അസി. ജില്ലാ ട്രഷറി ഓഫീസർ ടി അബ്ദുൾ റഷീദ് പറഞ്ഞു. വടകര ആർഡിഒ അൻവർ സാദത്ത്, ആർക്കിയോളജിസ്റ്റ് ജീവ മോൾ, വടകര സബ് ട്രഷറി ഓഫീസർ അജിത്ത് കുമാർ, തഹസിൽദാർ ഡി രഞ്ജിത്ത്, വടകര എസ്ഐ വിനീത് കുമാർ തുടങ്ങിയവരുടെ നേതൃത്വത്തിലാണ് നിലവറ തുറന്നത്.