ഫിറ്റ്‌നസ് പരിശോധന പുരോ​ഗമിക്കുന്നു

കോഴിക്കോട്

അധ്യയനവർഷം ആരംഭിക്കുന്നതിന് മുന്നോടിയായി സ്കൂൾ കെട്ടിടങ്ങളുടെ ഫിറ്റ്‌നസ് പരിശോധന പുരോ​ഗമിക്കുന്നു. ജില്ലയിലെ സർക്കാർ, എയ്ഡഡ്, അൺ എയ്ഡഡ് വിഭാഗങ്ങളിലായി 1298 വിദ്യാലയങ്ങളിലാണ് പരിശോധന നടക്കുന്നത്. ഫിറ്റ്‌നസ് സർട്ടിഫിക്കറ്റ് ഇല്ലാതെ സ്കൂളുകൾ തുറന്ന് പ്രവർത്തിക്കാൻ പാടില്ലെന്നാണ് സര്‍ക്കാര്‍ നിർദേശം.

ഓരോ സ്‌കൂളുകളിലും അതത് തദ്ദേശ സ്ഥാപനത്തിലെ എൻജിനിയറിങ് വിഭാഗം നേരിട്ടെത്തിയാണ് കെട്ടിടപരിശോധന . പഞ്ചായത്ത് പരിധിയിൽ അസി. എൻജിനിയർക്കും നഗരപരിധിയിൽ നഗരസഭ എൻജിനിയറിങ് വിഭാഗത്തിനുമാണ് ചുമതല.

അടിത്തറ മുതൽ *മേൽക്കൂര വരെ

ഓരോ അധ്യയനവർഷവും സ്കൂള്‍ കെട്ടിടങ്ങള്‍ക്ക് ഫിറ്റ്‌നസ് സർട്ടിഫിക്കറ്റ് നേടിയിരിക്കണമെന്നാണ് ചട്ടം. ഫർണി​ച്ചറുകൾ, ഇലക്ട്രോണിക് ഉപകരണങ്ങൾ, കിണറുകളിലെ സുരക്ഷാഭിത്തി, മുന്നറിയിപ്പ് ബോർഡ് സ്ഥാപിക്കൽ, ടോയ്‌‌ലെറ്റ്, അടിത്തറ, മേൽക്കൂര, കതക്, ജനൽ, തടിപ്പണികൾ, അ​ഗ്നിസുരക്ഷ ഉൾപ്പെടെ പരിശോധിക്കും. സ്കൂള്‍ വളപ്പിലെ മരത്തിലെ ചില്ലകള്‍ വെട്ടി സുരക്ഷ ഉറപ്പാക്കും. അവധിക്കാലത്താണ് അറ്റകുറ്റപ്പണി നടത്തുക. പരിശോധനകൾ വേഗത്തിൽ പൂർത്തിയായാൽ മാത്രമേ ആവശ്യമുള്ള മാറ്റങ്ങൾ വരുത്താൻ സ്കൂൾ അധികൃതർക്ക് സമയം കിട്ടൂ. ഇതിനുശേഷമാണ് ഫിറ്റ്നസ് സര്‍ട്ടിഫിക്കറ്റ് അനുവദിക്കുക.

വാഹനങ്ങളുടെ *പരിശോധന *വരുംദിവസങ്ങളില്‍

സ്കൂള്‍ വാഹനങ്ങളുടെ ഫിറ്റ്നസ് പരിശോധനയും വരുംദിവസങ്ങളില്‍ നടക്കും. വിവിധ സ്കൂളുകളുടെ അറുന്നൂറിലധികം വാഹനങ്ങളാണ് മോട്ടോര്‍ വാഹനവകുപ്പ് പരിശോധിക്കുക. വാഹ​നത്തിന്റെ പ്രവര്‍ത്തനക്ഷമത, ജിപിഎസ്, സ്പീഡ് ​ഗവേണര്‍, രേഖകള്‍, ഡ്രൈവറുടെ ലൈസന്‍സ് തുടങ്ങിയവ പരിശോധിച്ചാണ് ഫിറ്റ്നസ് ന‍ല്‍കുക. സ്കൂള്‍ വാഹനത്തിന്റെ ഡ്രൈവര്‍മാര്‍ക്കുള്ള പരിശീലനം കഴിഞ്ഞ ദിവസം നടന്നിരുന്നു.