വികസന മുരടിപ്പിൽ ഒതുങ്ങി തെന്മല

പുനലൂർ

വികസന മുരടിപ്പിന്റെ യുഡിഎഫ് ഭരണമാണ് തെന്മല പഞ്ചായത്തിൽ കഴിഞ്ഞ അഞ്ചുവർഷം ജനങ്ങൾ അനുഭവിച്ചത്. വിമതനെയും ബിജെപി സ്വതന്ത്രനെയും കൂട്ടുപിടിച്ചായിരുന്നു യുഡിഎഫ് അധികാരത്തിലെത്തിയത്‌. വഞ്ചനാപരമായ നിലപാടിൽ ശക്തമായ പ്രതിഷേധത്തിലായിരുന്നു ജനങ്ങൾ. നാടിന്റെ വികസനത്തിനും ക്ഷേമത്തിനും ഇടതുപക്ഷത്തെ വമ്പിച്ച ഭൂരിപക്ഷത്തിൽ വിജയിപ്പിക്കുമെന്നും വോട്ടർമാർ ഒരേ സ്വരത്തിൽ പറയുന്നു. സാധാരണക്കാരും തൊഴിലാളികളും പട്ടികജാതി പട്ടികവർഗക്കാരും കൂടുതലായി അധിവസിക്കുന്ന ഇവിടെ ലൈഫിൽ പുതിയ വീടില്ല. കുടിവെള്ള പദ്ധതിയിൽ പുതിയ കണക്‍ഷനില്ല. ഗവ. ഫണ്ടുകൾ പകുതിയിൽ കൂടുതൽ നഷ്ടപ്പെടുത്തി. റോഡ് മെയിന്റനൻസ് ഫണ്ട് കാൽഭാഗം മാത്രം ഉപയോഗിച്ചതിന്റെ ഭാഗമായി റോഡുകൾ സഞ്ചാരയോഗ്യമല്ലാതായി. തൊഴിലുറപ്പ് പദ്ധതി വനപ്രദേശങ്ങളിലേക്ക്‌ മാറ്റിയതോടെ ഉറപ്പായ തൊഴിലും നഷ്ടമായി. ഗുണനിലവാരം ഇല്ലാത്ത തെരുവുവിളക്ക് ഉപകരണങ്ങൾ പഞ്ചായത്തിൽ കെട്ടിക്കിടക്കുന്നു. വന്യജീവി ശല്യത്തിനെതിരെ പ്രതിരോധ നടപടിയുമില്ല. പന്നിശല്യം കാരണം കൃഷി ചെയ്യാൻ കഴിയാത്ത അവസ്ഥ. കാർഷിക, ക്ഷീരമേഖലകൾ ഉൾപ്പെടെ സമസ്തമേഖലയും തകർന്നു. 2015– -20ലെ എൽഡിഎഫ് ഭരണ സമിതിയുടെ കാലത്ത് തെന്മല പഞ്ചായത്ത് ഐഎസ്ഒ നിലാവാരത്തിലേക്ക് ഉയർന്നു. ശുചിത്വ പഞ്ചായത്ത് പദവി, ലൈഫിൽ കൂടുതൽ വീടുകളുടെ പൂർത്തികരണം, പദ്ധതിതുക പൂർണ വിനിയോഗം, ക്ഷീരമേഖലയിലെ മുന്നേറ്റം എന്നിവയ്ക്ക് സർക്കാരിന്റെ അവാർഡ്‌ ലഭിച്ചിരുന്നു. സിപിഐ എമ്മിലെ ആർ ലൈലജയായിരുന്നു പഞ്ചായത്ത് പ്രസിഡന്റ്. നിലവിൽ 17വാർഡുള്ള പഞ്ചായത്തിൽ എൽഡിഎഫിൽ സിപിഐ എം –7, സിപിഐ –8, കേരള കോൺഗ്രസ് ബി –1, കേരള കോൺഗ്രസ് എം– 1 എന്നിങ്ങനെയാണ് മത്സരിക്കുന്നത്. യുഡിഎഫിൽ കോൺഗ്രസ് –15 ,ആർഎസ്‌പി– 2 എന്നിങ്ങനെ മത്സരരംഗത്തുണ്ട്. ബിജെപി 15 വാർഡിൽ മത്സരിക്കുന്നു. പഞ്ചായത്തിലെ ആകെ വോട്ടർമാർ -19651, പുരുഷൻ –9064, സ്ത്രീ –10586, ട്രാൻസ്ജെൻഡർ –-1.