കൊട്ടാരക്കരയിൽ പുതിയ 
ട്രാഫിക് സിഗ്നൽ പരിഷ്കരണം

കൊട്ടാരക്കര

തിരുവനന്തപുരം –- അങ്കമാലി സംസ്ഥാന പാതയും കൊല്ലം -– തിരുമംഗലം ദേശീയപാതയും സംഗമിക്കുന്ന കൊട്ടാരക്കര പുലമൺ ജങ്ഷനിൽ പുതിയ ട്രാഫിക് സിഗ്നൽ സംവിധാനം. കൊട്ടാരക്കര നഗരത്തിലെ ഗതാഗതത്തിരക്കുമൂലം വാഹനാപകടം വർധിക്കുന്നതിനെ സംബന്ധിച്ച് ട്രാഫിക് അവലോകന യോഗത്തില്‍ ചർച്ചകളുണ്ടായിരുന്നു. പരിഹാരമായാണ് റൂറൽ എസ്പി, കലക്ടർ എന്നിവരുടെ നിർദേശപ്രകാരംപുതിയ പരിഷ്കരണം ഏർപ്പെടുത്തിയത്. ​സിഗ്നൽ പരിഷ്‌കരണം ഇപ്രകാരം അടൂർ – തിരുവനന്തപുരം പാതയിൽ സിഗ്നൽ തുറന്നുകൊടുത്ത് 15 സെക്കന്റുകൾക്ക് ശേഷം കൊല്ലം ഭാഗത്തേക്കുള്ള സിഗ്നൽ ഓഫായി അവിടേക്കുള്ള വാഹന ഗതാഗതം നിലയ്ക്കുകയും തിരുവനന്തപുരം ഭാഗത്തേക്ക് ചുവന്ന സിഗ്നൽ കാണുന്നതുവരെ വാഹന ഗതാഗതം തുടരാവുന്നതുമാണ്. ഈ സമയം ഇതേ റോഡിൽ വരുന്ന പുനലൂർ ഭാഗത്തേക്കുള്ള വാഹനങ്ങൾക്ക് ഇടതു ഫ്രീ ആയി കടന്നുപോകാം. തിരുവനന്തപുരം -– അടൂർ പാതയിൽ സിഗ്നൽ ആരംഭിച്ച് 15 സെക്കന്റുകൾക്ക് ശേഷം മാത്രമേ പുനലൂർ ഭാഗത്തേക്കുള്ള സിഗ്നൽ തെളിയൂ. ഈ സമയം മാത്രമേ പുനലൂർ ഭാഗത്തേക്കുള്ള വാഹനങ്ങൾ പോകാൻ പാടുള്ളൂ. അടൂർ ഭാഗത്തേക്കും കൊല്ലം ഭാഗത്തേക്കും വാഹന ഗതാഗതം തുടരാം. കൊല്ലം -– പുനലൂർ റോഡിൽ സിഗ്നൽ ആരംഭിച്ചു തിരുവനന്തപുരം ഭാഗത്തേക്ക് പോകുന്ന വാഹനങ്ങൾക്ക് 15 സെക്കന്റ് മാത്രമായിരിക്കും സമയമുണ്ടാവുക. ഈ സമയം പുനലൂർ ഭാഗത്തേക്കും അടൂർ ഭാഗത്തേക്കും സിഗ്നൽ അവസാനിക്കുന്നതുവരെ വാഹന ഗതാഗതം തുടരാം. പുനലൂർ -– കൊല്ലം റോഡിൽ സിഗ്നൽ ആരംഭിച്ച് 15 സെക്കന്റുകൾക്ക് ശേഷം മാത്രമേ അടൂർ ഭാഗത്തേക്കുള്ള സിഗ്നൽ ഓൺ ആവുകയുളളു. ഈ സമയം മാത്രമേ അടൂർ ഭാഗത്തേക്ക് വാഹനങ്ങൾ പോകുവാൻ പാടുള്ളൂ. ഈ സമയം തന്നെ സിഗ്നൽ ഓഫ് ആകുന്നതുവരെ കൊല്ലം, തിരുവനന്തപുരം ഭാഗങ്ങളിലേക്ക് തുടരാം. ​കാൽനട യാത്രക്കാർ ഏതു പാതയാണോ മുറിച്ചുകടക്കുവാൻ ആവശ്യമുള്ളത് ആ പാതയിലെ വാഹന ഗതാഗതം പൂർണമായും നിലച്ചു എന്ന് ഉറപ്പുവരുത്തി സിഗ്നൽ ശ്രദ്ധിച്ചു മാത്രമേ റോഡ് മുറിച്ചുകടക്കാവു. പുനഃസ്ഥാപിക്കപ്പെട്ട റോഡ് സിഗ്നൽ സംവിധാനത്തെപ്പറ്റി ഓട്ടോറിക്ഷാ, ടൂറിസ്റ്റ് ടാക്സി, സ്വകാര്യ, കെഎസ്ആർടിസി ബസ് മേഖലകളിലെ ഡ്രൈവർമാർക്ക് ട്രാഫിക് എൻഫോഴ്സ്മെന്റ് ബോധവൽക്കരണ പരിശീലന ക്ലാസ് നൽകും.