ഓർമയിൽ സഖാക്കളുടെ ആരവം

കൊല്ലം

‘തെരഞ്ഞെടുപ്പുകളിലെ വലിയ അനുഭവവും കരുത്തും വനിതകൾ ഉൾപ്പെടെ സാധാരണ പ്രവർത്തകർ കാട്ടുന്ന ആവേശവും ആത്മാർഥതയുമാണ്‌. പ്രചാരണത്തിൽ അവർ ഓരോരുത്തരും സ്ഥാനാർഥികളായി മാറുന്നു. ഒരു സ്ഥാനവും മോഹിക്കാതെയുള്ള അവരുടെ പ്രവർത്തനങ്ങളുടെ ഫലമാണ്‌ എന്റെ തെരഞ്ഞെടുപ്പ്‌ വിജയങ്ങൾ’– കൊല്ലം കോർപറേഷനിൽ പലവട്ടം മത്സരിച്ച്‌ വിജയിച്ച മുൻ മേയറും സിപിഐ എം ജില്ലാ കമ്മിറ്റി അംഗവുമായ പ്രസന്ന ഏണസ്റ്റ്‌ തെരഞ്ഞെടുപ്പ്‌ അനുഭവങ്ങൾ പങ്കുവയ്‌ക്കുന്നു. 1987ൽ എസ്‌എഫ്‌ഐ പാനലിൽ കൊല്ലം ഫാത്തിമ മാതാ കോളേജ്‌ യൂണിയനിലേക്ക്‌ മത്സരിച്ചതാണ്‌ ആദ്യാനുഭവം. ഞാൻ ഉൾപ്പെടെ എസ്‌എഫ്‌ഐ പാനൽ വിജയിച്ചു. കോളേജിൽനിന്ന്‌ ഇറങ്ങിയപ്പോൾത്തന്നെ രാജമ്മ ഭാസ്‌കരൻ സഖാവ്‌ മുൻകൈയെടുത്ത്‌ മഹിളാ അസോസിയേഷൻ വടക്കുംതല യൂണിറ്റ്‌ സെക്രട്ടറിയാക്കി. ഇതിനൊപ്പം കരുനാഗപ്പള്ളി എൻഎസ്‌എസ്‌ കോളേജിൽ എംഎയ്‌ക്കും ചേർന്നു. പഠനം തുടരവെ പാർടി മുൻകൈയെടുത്ത്‌ എക്‌സ്‌ ഏണസ്റ്റുമായുള്ള കല്യാണാലോചന വന്നത്‌. കല്യാണം നടക്കുന്പോൾ മഹിളാ അസോസിയേഷൻ ചവറ ഏരിയ പ്രസിഡന്റായിരുന്നു. തുടർന്ന്‌ മഹിളാ അസോസിയേഷൻ കൊല്ലം ഏരിയ സെക്രട്ടറിയായി. കോർപറേഷനിലേക്ക്‌ ആദ്യമത്സരം 2000ൽ പട്ടത്താനം ഡിവിഷനിൽ. യുഡിഎഫ്‌ സ്ഥാനാർഥി രണ്ടുതവണ ക‍ൗൺസിൽ അംഗമായിരുന്ന ലതികാഭായി. ആദ്യം അങ്കലാപ്പുണ്ടായെങ്കിലും സഖാക്കൾ പകർന്ന ധൈര്യം ആത്മവിശ്വാസത്തിൽ വിജയം. എസ്‌ സബിതാബീഗം ആയിരുന്നു മേയർ. 2005ൽ മത്സരിപ്പിച്ചത്‌ മുണ്ടയ്‌ക്കൽ ഡിവിഷനിലാണ്‌. വലിയ ഭൂരിപക്ഷത്തിൽ വിജയിച്ചു. എൻ പത്മലോചനൻ മേയറായ ക‍ൗൺസിലിൽ സ്ഥിരംസമിതി അധ്യക്ഷയായി. 2010ൽ താമരക്കുളം ഡിവിഷനിൽനിന്ന്‌ വിജയിച്ച്‌ ആദ്യമായി മേയറായി. 2020ൽ വീണ്ടും അവിടെനിന്ന്‌ ജയിച്ച്‌ മേയറായി. 2014ൽ തെക്കേ ഇന്ത്യയിലെ മികച്ച വനിതാ മേയറായി തെരഞ്ഞെടുത്ത്‌ റോട്ടറി ക്ലബ്‌ അവാർഡ്‌ നൽകിയ പ്രസന്ന ഏണസ്റ്റ് പറഞ്ഞുനിർത്തി.