പ്രചാരണം വഴിതെറ്റി 
യുഡിഎഫും ബിജെപിയും

കൊല്ലം

പോരാട്ടം കൊടുന്പിരിക്കൊണ്ടപ്പോൾ കരുനാഗപ്പള്ളി, പരവൂർ‍, കൊട്ടാരക്കര, പുനലൂർ മുനിസിപ്പാലിറ്റികളിൽ ചർച്ചയായ രാഷ്ട്രീയം വികസനം മാത്രം. വിവാദവിഷയങ്ങളിൽ തദ്ദേശ തെരഞ്ഞെടുപ്പിനെ കെട്ടിയിടാൻ ശ്രമിച്ച യുഡിഎഫും ബിജെപിയും ചെന്നുപെട്ടത്‌ പ്രചാരണം മുന്നോട്ടുകൊണ്ടുപോകാൻ കഴിയാത്ത അവസ്ഥയിലും. സർക്കാർ നടപ്പാക്കുന്ന വികസന പ്രവർത്തനങ്ങളും ക്ഷേമ പദ്ധതികളും തദ്ദേശ സ്ഥാപനങ്ങളുടെ മികവാർന്ന സാമൂഹ്യ ഇടപെടലുകളുമാണ്‌ ചർച്ച. സമൂഹത്തിന്റെ നാനാതുറകളിൽ പ്രവർത്തിക്കുകയും വ്യത്യസ്‌ത മേഖലകളിൽ കഴിവ്‌ തെളിയിക്കുകയും ചെയ്‌തവരാണ്‌ മുനിസിപ്പാലിറ്റികളിലും എൽഡിഎഫ്‌ സ്ഥാനാർഥികൾ. കരുനാഗപ്പള്ളി മുനിസിപ്പാലിറ്റിയിൽ ആകെ വോട്ടർമാർ 43,576 ആണ്‌. ഇതിൽ പുരുഷ വോട്ടർമാർ 20,625. സ്‌ത്രീ വോട്ടർമാർ 22,951. പാളയത്തിലെ പടയിൽ യുഡിഎഫ്‌ നിലയില്ലാക്കയത്തിലാണ്‌. കോൺഗ്രസ്‌ അവഗണിച്ചുവെന്ന വികാരത്തിലാണ്‌ ലീഗും. ലീഗിനെതിരെ കോൺഗ്രസും സ്ഥാനാർഥിയെ നിർത്തിയിട്ടുണ്ട്‌. വാർഡ്‌ 32ൽ യുഡിഎഫ് സ്ഥാനാർഥി മുസ്ലിംലീഗിലെ തേവറ നൗഷാദിനെതിരെ കോൺഗ്രസിലെ പുതുക്കാട് താഹ മത്സരിക്കുന്നു. വാർഡ്‌ 29ൽ കോൺഗ്രസിലെ സിംലാലിനെതിരെ കോൺഗ്രസ് ബ്ലോക്ക് വൈസ് പ്രസിഡന്റ് ജയദേവൻ മത്സരിക്കുന്നു. ഇവിടെ ബിജെപിയും ആത്മവിശ്വാസക്കുറവിലാണ്‌ . ​പരവൂരിൽ തെക്കുംഭാഗം, വടക്കുംഭാഗം, പുതിയകാവ്‌ വാർഡുകളിൽ ബിജെപിക്ക്‌ സ്ഥാനാർഥിയില്ല. റിബലുകൾ ഉയർത്തുന്ന വെല്ലുവിളി അതിജീവിക്കാൻ കഴിയില്ലെന്ന തിരിച്ചറിവിലാണ്‌ കോൺഗ്രസ്‌. പുഞ്ചിറക്കുളം വാർഡിൽ കോൺഗ്രസിലെ മുൻ ചെയർമാൻ സുധീർ ചെല്ലപ്പനും ഒല്ലാൽ വാർഡിൽ ജയപ്രകാശും കല്ലുംകുന്നിൽ മഹേഷും പെരുന്പുഴയിൽ സുലോചനയും കോൺഗ്രസ്‌ റിബലാണ്‌. 16–ാം വാർഡിൽ സരള, 17–ാം വാർഡിൽ സഫീസത്ത്‌, 23–ാം വാർഡിൽ ലത്തീഫ്‌ എന്നിവർ ലീഗ്‌ സ്ഥാനാർഥികളായും രംഗത്തുണ്ട്‌. മുനിസിപ്പാലിറ്റിയിലെ ആകെ വോട്ട്‌ 31657 ആണ്‌. മുപ്പത്താറ്‌ വാർഡുള്ള പുനലൂർ മുനിസിപ്പാലിറ്റിയിൽ ബിജെപി 23 വാർഡിൽ മാത്രം. 13 വാർഡിൽ യുഡിഎഫിനായി വോട്ട് കച്ചവടമാണ്‌ ലക്ഷ്യം. ആകെ വോട്ടർമാർ– 42094. പുരുഷ വോട്ടർമാർ–19338, സ്ത്രീ വോട്ടർമാർ– 22756. കൊട്ടാരക്കരയിലും യുഡിഎഫ്‌ പല ചേരിയിലാണ്‌. ആർഎസ്‍പിക്ക് നൽകിയ പാലമൂട് വാർഡിൽ കോൺഗ്രസിലെ പ്രശാന്ത് കാവുവിള കൈപ്പത്തി ചിഹ്നത്തിൽ മത്സരിക്കുന്നു. കോൺഗ്രസ് നേതാവും കൗൺസിലറുമായ തോമസ് മാത്യൂ കടലാവിളയിൽ വിമതനായി മത്സരിക്കുന്നു. മറ്റൊരു കോൺഗ്രസ് കൗൺസിലർ സൂസമ്മ കെഎസ്ആർടിസി വാർഡിൽ താമര ചിഹ്നത്തിലാണ് രംഗത്തുള്ളത്‌. എൻഡിഎ മുന്നണിയിൽ ബിജെപിയാകട്ടെ സഖ്യകക്ഷികൾക്കൊന്നും സീറ്റ് നൽകിയില്ല. ആകെ വോട്ടർമാർ 26864.