ഉറപ്പാണ് മേലില

കുന്നിക്കോട്

ജില്ലയുടെ കിഴക്കൻ മലയോര മേഖലയിലെ ഇടനാട് കേന്ദ്രീകരിച്ച് നിലനിൽക്കുന്ന പഞ്ചായത്താണ് മേലില. കേരള കോൺഗ്രസ് ബിയുടെ ശക്തികേന്ദ്രം. പഞ്ചായത്ത് രൂപീകരണത്തിൽ വലതുപക്ഷം ചേർന്നെങ്കിലും പിന്നീടങ്ങോട്ട് ഇടതോരമായിരുന്നു മേലില. കർഷകരും വ്യാപാരികളുമാണ്‌ പഞ്ചായത്തിൽ കൂടുതൽ. നിരവധി വികസന പ്രവർത്തനങ്ങളാണ്‌ പഞ്ചായത്തിൽ നടന്നിട്ടുള്ളത്‌. ഉറവിട മാലിന്യസംസ്കരണത്തിന് മുൻതൂക്കം നൽകിയ ഭരണസമിതി സീറോവേസ്റ്റ് പഞ്ചായത്തായി മേലിലയ്ക്ക് മാറാൻ കഴിഞ്ഞു. ജൽ ജീവൻ പദ്ധതിയിലൂടെ ശുദ്ധജലം എത്തിച്ചു. ലൈഫ്‌ പദ്ധതിയിൽ നിരവധി വീടുകൾ നിർമിച്ചു. പഞ്ചായത്തിൽ 16 വാർഡാണുള്ളത്‌. നാട്ടുകാർക്ക്‌ ചിരപരിചിതരും ജനസേവനരംഗത്ത് സജീവമായിട്ടുള്ളവരെയുമാണ്‌ എൽഡിഎഫ് രംഗത്ത്‌ ഇറക്കിയത്‌. തമ്മിലടി രൂക്ഷമായി യുഡിഎഫ് ശിഥിലമായി. വീടുകയറിയുള്ള ആക്രമണവും ക്ഷേത്രത്തിന്‌ എതിരെ സമൂഹമാധ്യമം വഴി വ്യാജ പ്രചാരണം നടത്തിയ ബിജെപി തെരഞ്ഞെടുപ്പ് കളം വിട്ടു.