എന്നും ചുവക്കുന്ന കുമ്മിൾ

കടയ്ക്കൽ ​

പഞ്ചായത്ത്‌ രൂപീകരണം മുതൽ ഹൃദയപക്ഷത്താണ്‌ കുമ്മിൾ. കഴിഞ്ഞ തവണ 14 ൽ 10 സീറ്റും നേടിയാണ്‌ എൽഡിഎഫ് കുമ്മിളിന്റെ അമരത്തെത്തിയത്. ഇക്കുറി തൃക്കണ്ണാപുരം, പുല്ലുപണ എന്നീ രണ്ട്‌ വാർഡുകൾ ചേർന്ന്‌ 16 വാർഡിലാണ് മത്സരം. എല്ലാ സീറ്റും നേടി കുമ്മിളിനെ കൂടുതൽ ചുവപ്പിക്കാൻ ജനകീയ മുഖങ്ങളെയാണ് എൽഡിഎഫ് രംഗത്തിറക്കിയത്‌. ​ തൊഴിലുറപ്പ് തൊഴിലാളി, കുടുംബശ്രീ പ്രവർത്തക, ഹരിതകർമ സേനാ അംഗം, ആശാവർക്കർ, യുവാക്കൾ ഉൾപ്പടെയുള്ള പുതുമുഖങ്ങളും പരിചയ സമ്പന്നരുമായാണ് എൽഡിഎഫ്‌ കളം പിടിച്ചിരിക്കുന്നത്. വിമത സ്ഥാനാർഥി ഉൾപ്പെടെ പ്രശ്നം സൃഷ്ടിച്ചതോടെ യുഡിഎഫ് സംവിധാനം ആകെ തകർന്നുപോയ സ്ഥിതിയാണ്‌. ദർപ്പക്കാടിലെ പ്രധാന നേതാവായ കുന്നിൽ നാസറിനെ കോൺഗ്രസ് പ്രവർത്തകൻതന്നെ മർദിച്ചത് വിവാദമായിട്ടുണ്ട്. നേതാവിനെ മർദിച്ച പുനയം സുധീറിനെ സംരക്ഷിക്കുന്ന നിലപാട് മണ്ഡലം, ബ്ലോക്ക് നേതാക്കൾ സ്വീകരിച്ചതിൽ പ്രദേശത്തെ കോൺഗ്രസ് പ്രവർത്തകർക്ക് എതിർപ്പുണ്ട്. ഇത് തെരഞ്ഞെടുപ്പ്‌ റിസള്‍ട്ടിനെ തന്നെ ബാധിക്കുമെന്നാണ് വിലയിരുത്തൽ. യുഡിഎഫ് പേരിനു മാത്രം മത്സരിക്കുന്ന ഇടങ്ങളുമുണ്ട്. ബിജെപിക്കാകട്ടെ ഭൂരിപക്ഷം വാർഡിലും സ്ഥാനാർഥിയുമില്ല. സംസ്ഥാനസർക്കാരിന്റെ വികസന പ്രവർത്തനങ്ങളും ത്രിതല പഞ്ചായത്തുകളുടെ നേട്ടങ്ങളും എൽഡിഎഫിന്‌ കൂടുതൽ കരുത്തുപകരും. വാഗ്‌ദാനങ്ങൾ പാലിച്ചും സാധാരണക്കാരന്റെ ജീവിതം തൊട്ടറിഞ്ഞും നാടിന്റെ മുഖച്ഛായ മാറ്റിയുമുള്ള ഭരണം കൂടുതൽ കരുത്തോടെതന്നെ നിലനിർത്താൻ കഴിയുമെന്ന ഉറച്ച വിശ്വാസം നാടിനൊന്നാകെയുണ്ട്. ജില്ലയിൽതന്നെ ഏറ്റവും കൂടുതൽ വികസന പദ്ധതികൾ നടപ്പാക്കിയ പഞ്ചായത്തെന്ന പേരും കുമ്മിളിനുണ്ട്.