ഗ്രീൻ -– ക്ലീൻ 
തെരഞ്ഞെടുപ്പിന് ഒരുങ്ങി

കൊല്ലം

തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് പരിസ്ഥിതി സൗഹൃദമാക്കാൻ രാഷ്ട്രീയപാർടികളും സംസ്ഥാന തെരഞ്ഞെടുപ്പ് കമീഷനും നടപടി തുടങ്ങി. ബോര്‍ഡുകള്‍, ബാനറുകള്‍, ഹോര്‍ഡിങ്ങുകള്‍, പോസ്റ്ററുകള്‍ എന്നിവയ്ക്ക് പരിസ്ഥിതി സൗഹൃദ വസ്തുക്കൾ ഉപയോഗിക്കുന്നതിനാണ് മുൻതൂക്കം. പിവിസി ല്ക്സ്, പോളിസ്റ്റര്‍, നൈലോണ്‍, കൊറിയന്‍ ക്ലോത്ത്, പ്ലാസ്റ്റിക് കോട്ടിങ്ങുള്ള തുണി, പോളിസ്റ്റര്‍ കൊണ്ടുള്ള തുണി തുടങ്ങിയ പ്ലാസ്റ്റിക്കിന്റെ അംശമോ പ്ലാസ്റ്റിക് കോട്ടിങ്ങോ ഉള്ള പുനഃചംക്രമണം സാധ്യമല്ലാത്ത സാമഗ്രികളുടെ ഉപയോഗം ഒഴിവാക്കാനും രാഷ്ട്രീയപാർടികൾ നിർദേശിക്കുന്നുണ്ട്. പരിസ്ഥിതി സൗഹൃദം അല്ലാത്ത വസ്തുക്കൾക്ക് പകരമായി പേപ്പര്‍, സംസ്ഥാന മലിനീകരണ നിയന്ത്രണ ബോർഡ് അംഗീകരിച്ചിട്ടുള്ള പ്രചാരണ സാമഗ്രികൾ പരമാവധി ഉപയോഗിക്കുകയാണ്. കോട്ടണ്‍, പോളി എത്തിലീന്‍ തുടങ്ങിയ പരിസ്ഥിതി സൗഹൃദ വസ്തുക്കള്‍ക്കാണ് ഡിമാന്‍ഡ്. ഇത്തരം പ്രചാരണ സാമഗ്രികൾ മാത്രമേ പ്രചാരണ പരിപാടികള്‍ക്ക് ഉപയോഗിക്കാവൂ എന്ന് തെരഞ്ഞെടുപ്പ് കമീഷനും നിർദേശിച്ചിട്ടുണ്ട്. കൊടിതോരണങ്ങള്‍ പൂര്‍ണമായും പ്ലാസ്റ്റിക്, പിവിസി വിമുക്തമാക്കും. ഉദ്യോഗസ്ഥര്‍ക്കുള്ള പരിശീലന പരിപാടികളിലും ഔദ്യോഗിക പരസ്യങ്ങള്‍, സൂചകങ്ങള്‍, ബോര്‍ഡുകള്‍ തുടങ്ങിയവയും പ്രകൃതിസൗഹൃദ വസ്തുക്കൾ ഉപയോഗിച്ചാകും നിർമിക്കുക. പോളിങ് ബൂത്തുകള്‍, സാധനസാമഗ്രികളുടെ വിതരണ– സ്വീകരണ കേന്ദ്രങ്ങള്‍, വോട്ടെണ്ണല്‍ കേന്ദ്രങ്ങള്‍ എന്നിവിടങ്ങളില്‍ നിരോധിത വസ്തുക്കളുടെ ഉപയോഗം നിയന്ത്രിക്കും. ഉദ്യോഗസ്ഥരും ഏജന്റുമാരും ഭക്ഷണസാധനങ്ങള്‍, കുടിവെള്ളം മുതലായവ കൊണ്ടുവരാന്‍ സ്റ്റീല്‍, ചില്ല് പാത്രങ്ങള്‍ എന്നിവ ക്രമീകരിക്കണമെന്ന നിർദേശവുമുണ്ട്. പോളിങ് സ്റ്റേഷനിലും വിതരണ– സ്വീകരണ കേന്ദ്രങ്ങള്‍, വോട്ടെണ്ണല്‍ കേന്ദ്രങ്ങള്‍ എന്നിവിടങ്ങളില്‍ ഉണ്ടാകുന്ന പേപ്പര്‍, മറ്റ് പാഴ് വസ്തുക്കള്‍ സംഭരിക്കുന്നതിനും നീക്കംചെയ്യുന്നതിനും കേന്ദ്രങ്ങള്‍ ശുചീകരിക്കുന്നതിനും അതത് തദ്ദേശസ്വയംഭരണ സെക്രട്ടറിമാര്‍ നടപടി സ്വീകരിക്കണം. വോട്ടെടുപ്പ് അവസാനിച്ച ഉടന്‍ സ്ഥാനാര്‍ഥികളും രാഷ്ട്രീയകക്ഷികളും പ്രചാരണവുമായി ബന്ധപ്പെട്ട എല്ലാത്തരം സാമഗ്രികളും ശേഖരിച്ച് അതത് തദ്ദേശസ്ഥാപനങ്ങളിലെ ഹരിതകര്‍മസേനയ്ക്ക് യൂസര്‍ഫീ നല്‍കി കൈമാറണം.