ഡബിളാ ഡബിൾ...

എഴുകോൺ

എൽഡിഎഫ് സ്ഥാനാർഥികളായി ഇരട്ട സഹോദരിമാർ. മൺറോതുരുത്ത് പെരിങ്ങാലം കിടപ്രം സുജിത് ഭവനിൽ എ വിനിതയും എ സുനിതയുമാണ് മത്സര രംഗത്തുള്ളത്. മൺറോതുരുത്ത് പഞ്ചായത്തിലെ കിടപ്രം വടക്ക് വാർഡിൽ എ വിനിത മത്സരിക്കുമ്പോൾ സുനിത സ്ഥാനാർഥിയായത് പവിത്രേശ്വരം പഞ്ചായത്തിലെ പഴയചിറ വാർഡിലാണ്. ക്ഷീരസംഘം സെക്രട്ടറിയായ വിനിത സിപിഐ മൺറോതുരുത്ത് ലോക്കൽ കമ്മിറ്റി അംഗവുമാണ്. ചെമ്മീൻ കർഷകനും സിപിഐ എം പ്രവർത്തകനുമായ സോമന്റെയും അംബികയുടെയും മക്കളാണ് ഇരുവരും. കിടപ്രം ദേവാനന്ദത്തിൽ എം വിനോദ് കുമാറാണ് വിനിതയുടെ ഭർത്താവ്. പുത്തൂർ പാങ്ങോട് സ്വദേശി സുനിൽ ബാബുവാണ് സുനിതയുടെ ഭര്‍ത്താവ്. ഓട്ടോ ഡ്രൈവറായ സുജിത് സഹോദരനാണ്.