ഡിസിസി ഓഫീസ് 
ഉപരോധിച്ച് കെഎസ്‍യു

കൊല്ലം

തദ്ദേശ തെരഞ്ഞെടുപ്പില്‍ ജില്ലയില്‍ അര്‍ഹമായ പ്രാതിനിധ്യം നല്‍കാത്തതില്‍ പ്രതിഷേധിച്ച് കെഎസ്‍യു ഡിസിസി ഓഫീസ് ഉപരോധിച്ചു. ജില്ലാ പ്രസിഡന്റ് അന്‍വര്‍ സുല്‍ഫിക്കറിന്റെ നേതൃത്വത്തിലായിരുന്നു പ്രതിഷേധം. കെഎസ്‍യുവിനെ പൂര്‍ണമായി തഴഞ്ഞ കോണ്‍ഗ്രസ് നേതൃത്വത്തിനെതിരെ രൂക്ഷവിമര്‍ശനമാണ് അന്‍വര്‍ സമൂഹമാധ്യമങ്ങളിലൂടെ ഉന്നയിച്ചത്. ‘പണിയെടുക്കാനും പോസ്റ്റർ ഒട്ടിക്കാനും കൊടികെട്ടാനും പാർടി പരിപാടികൾക്ക് ആളെണ്ണം തികയ്ക്കാനും വേണ്ടി മാത്രമുള്ള ഒരു പ്രത്യേക ആൾക്കൂട്ടമല്ല കെഎസ്‍യു എന്ന് നിങ്ങൾ മനസ്സിലാക്കണം, മനസ്സിലാകാത്തവരെ മനസ്സിലാക്കാനുള്ള ശേഷിയും ഈ സംഘടനയ്ക്ക് ഉണ്ട്' – അന്‍വര്‍ ഫെയ്സ്ബുക്കില്‍ കുറിച്ചു. തദ്ദേശ തെരഞ്ഞെടുപ്പില്‍ പരിഗണിക്കണമെന്ന് ആവശ്യപ്പെട്ട് കെഎസ്‍യു ഭാരവാഹികളായ 14പേരുടെ പട്ടിക ഡിസിസി പ്രസിഡന്റ് പി രാജേന്ദ്രപ്രസാദിന് അന്‍വര്‍ നല്‍കിയിരുന്നു. അന്‍വറിന്റെ പേരും പട്ടികയിലുണ്ട്. എന്നാല്‍, നല്‍കിയ പട്ടികയിലെ ആരെയും സ്ഥാനാര്‍ഥികളായി നേതൃത്വം പരിഗണിച്ചില്ല. ലിസ്റ്റിന് ബദലായി നേതൃത്വം സ്വയം തെരഞ്ഞെടുത്ത സ്ഥാനാര്‍ഥികളെയാണ് കെഎസ്‍യുവിന്റെ പ്രതിനിധികളായി ഉയര്‍ത്തിക്കാണിക്കുന്നത്. ഇതില്‍ വലിയ അമര്‍ഷമാണ് കോണ്‍ഗ്രസ് നേതൃത്വത്തിനെതിരെ ഉയരുന്നത്. ‘ഉറങ്ങുന്നവരെ ഉണർത്താം, ഉറക്കം നടിക്കുന്നവരെയോ? ഉണരുന്നില്ലെങ്കിൽ ചെവിട്ടിൽ പടക്കം പൊട്ടിച്ചിട്ട് ആണെങ്കിലും ഉണർത്തും' – അന്‍വര്‍ കുറിച്ചു.