ചാന്പ്യൻസ് ബോട്ട് ലീഗ് മത്സരം ഇന്ന്

കൊല്ലം
ഓളപ്പരപ്പിൽ ഇന്ദ്രജാല പ്രകടനം തീർക്കാൻ ചാന്പ്യൻസ് ബോട്ട് ലീഗ് മത്സരം കല്ലടയാറ്റിൽ വീണ്ടുമെത്തുന്നു. സിബിഎൽ അഞ്ചാം സീസൺ സെമി ഫൈനൽ മത്സരമാണ് ശനി പകൽ 2.30ന് കല്ലടയാറ്റിൽ കാരൂത്രക്കടവ് –മുതിരപ്പറന്പ് നെട്ടായത്തിൽ നടക്കുക. സീസണിന്റെ ഒന്പതാം മത്സരത്തിൽ ഒന്പത് ചുണ്ടൻ വള്ളങ്ങൾ മൂന്നു ഹീറ്റ്സുകളിലായി മാറ്റുരയ്ക്കും. എട്ട് മത്സരത്തിലും തുടർച്ചയായി വിജയം നേടിയ കൈനകരി വില്ലേജ് ബോട്ട് ക്ലബ്ബിന്റെ വീയപുരമാണ് പോയിന്റ് നിലയിൽ ഒന്നാമൻ. കഴിഞ്ഞ വർഷം സിബിഎൽ ജേതാക്കളായ പള്ളാത്തുരുത്തി ബോട്ട് ക്ലബ്ബിന്റെ മേൽപ്പാടം ചുണ്ടനാണ് രണ്ടാം സ്ഥാനത്ത്. നിരണം (നിരണം ബോട്ട് ക്ലബ്), നടുവിലെ പറമ്പൻ (ഇമ്മാനുവൽ ബോട്ട് ക്ലബ്, കുമരകം), നടുഭാഗം (പുന്നമട ബോട്ട് ക്ലബ്), കാരിച്ചാൽ (കാരിച്ചാൽ ചുണ്ടൻ ബോട്ട് ക്ലബ്, കുമരകം), ചെറുതന (തെക്കേക്കര ബോട്ട് ക്ലബ്, മങ്കൊമ്പ്), പായിപ്പാട് (കുമരകം ടൗൺ ബോട്ട് ക്ലബ്), ചമ്പക്കുളം (ചങ്ങനാശേരി ബോട്ട് ക്ലബ്)എന്നീ ചുണ്ടനുകളാണ് മത്സരത്തിൽ പങ്കെടുക്കുന്ന മറ്റ് വള്ളങ്ങൾ. അഞ്ചാം സീസൺ പ്രസിഡന്റ്സ് ട്രോഫിയോടെ കൊല്ലത്ത് സമാപിക്കും. ഡിസംബർ ആറിന് നിശ്ചയിച്ചിരുന്ന പ്രസിഡന്റ്സ് ട്രോഫി മത്സരം തെരഞ്ഞെടുപ്പിനെ തുടർന്ന് മാറ്റിവച്ചു.









0 comments