സിബിഎൽ കല്ലട ജലോത്സവം
ട്രിപ്പിള്‍ ഹാട്രിക്കുമായി വീയപുരം
സ്വന്തം ലേഖകൻ
Published on Nov 30, 2025, 01:35 AM | 1 min read
കൊല്ലം
ചാമ്പ്യന്‍സ് ബോട്ട് ലീഗ് അഞ്ചാം സീസണില്‍ കല്ലടയില്‍ നടന്ന ഒമ്പതാം മത്സരത്തില്‍ വില്ലേജ് ബോട്ട് ക്ലബ് കൈനകരി (3:35:545 മിനിറ്റ്)തുഴഞ്ഞ വീയപുരം ചുണ്ടന്‍ ജേതാക്കളായി. സിബിഎല്‍ അഞ്ചാം സീസണിലെ ട്രിപ്പിള്‍ ഹാട്രിക്കാണ്‌ വീയപുരം നേടിയത്. പള്ളാത്തുരുത്തി ബോട്ട് ക്ലബ് തുഴഞ്ഞ മേല്‍പ്പാടം ചുണ്ടന്‍ രണ്ടാമതും (3:36:997 മിനിറ്റ്)നിരണം ചുണ്ടന്‍ (നിരണം ബോട്ട് ക്ലബ്) മൂന്നാമതും (3:38:750 മിനിറ്റ്)ഫിനിഷ് ചെയ്തു. അമ്പത് മീറ്റര്‍ പിന്നിട്ടപ്പോൾ വീയപുരം തുഴപ്പാട്‌ മുന്നിലെത്തി. മേല്‍പ്പാടവും നിരണവും ഒപ്പത്തിനൊപ്പമായിരുന്നു. അവസാന പാദത്തില്‍ വീയപുരം അനിഷേധ്യ ലീഡോടെ ഫിനിഷ് ചെയ്തു. അവസാന നൂറുമീറ്ററില്‍ നിരണത്തെ പിന്നിലാക്കി. മേല്‍പ്പാടം രണ്ടാമതെത്തി. നടുവിലേപറമ്പന്‍ (ഇമ്മാനുവേല്‍ ബോട്ട് ക്ലബ്), നടുഭാഗം ചുണ്ടന്‍ (പുന്നമട ബോട്ട് ക്ലബ്), കാരിച്ചാല്‍ (കാരിച്ചാല്‍ ചുണ്ടന്‍ ബോട്ട് ക്ലബ്-കെസിബിസി), ചെറുതന (തെക്കേക്കര ബോട്ട് ക്ലബ്), പായിപ്പാടന്‍ (കുമരകം ടൗണ്‍ ബോട്ട് ക്ലബ്), ചമ്പക്കുളം (ചങ്ങനാശേരി ബോട്ട് ക്ലബ്) എന്നിവർ പിന്നിലായി ഫിനിഷ് ചെയ്തു. കലക്ടര്‍ എന്‍ ദേവിദാസ് ഉദ്ഘാടനംചെയ്തു. സിബിഎല്‍ നോഡല്‍ ഓഫീസർ ടി ജി അഭിലാഷ് കുമാര്‍, സംസ്ഥാന കോ -–ഓര്‍ഡിനേറ്റര്‍ എ അന്‍സാര്‍, ഡെപ്യൂട്ടി ഡയറക്ടര്‍ എ ആര്‍ ഷാനവാസ്ഖാന്‍ തുടങ്ങിയവര്‍ പങ്കെടുത്തു. കലക്ടര്‍ എന്‍ ദേവിദാസ് സമ്മാനം വിതരണംചെയ്‌തു.
Tags
0 comments