സംസ്ഥാനത്താകെ 85 സ്കൂൾ
ഹരിതവിദ്യാലയം റിയാലിറ്റി ഷോയിൽ 7 സ്കൂൾ

വിദ്യാഭ്യാസ റിയാലിറ്റി ഷോയിൽ തെരഞ്ഞെടുക്കപ്പെട്ട പ്രതിനിധികളുമായി കൈറ്റ് സിഇഒ കെ അൻവർ സാദത്ത് ഓൺലൈനിൽ ആശയവിനിമയം നടത്തുന്നു
സ്വന്തം ലേഖകൻ
Published on Nov 29, 2025, 01:19 AM | 1 min read
കൊല്ലം
കൈറ്റിന്റെ ‘ഹരിതവിദ്യാലയം' വിദ്യാഭ്യാസ റിയാലിറ്റി ഷോയുടെ നാലാം എഡിഷന്റെ പ്രാഥമിക പട്ടികയിൽ ജില്ലയിൽനിന്ന് 7 സ്കൂൾ ഇടംപിടിച്ചു. ഗവ. എച്ച്എസ് അഞ്ചാലുമൂട്, എസ്എംഎച്ച്എസ് പതാരം, വിവിഎച്ച്എച്ച്എസ് പോരേടം, ഗവ. എച്ച്എസ് കടയ്ക്കൽ, ഗവ. എൽപിഎസ് ഇരവിപുരം, ഗവ. എസ്എൻഡിപി യുപിഎസ് പട്ടത്താനം, വയല എൻവിയുപി സ്കൂളുകളാണ് പട്ടികയിൽ ഇടംപിടിച്ചത്. സ്കൂളുകൾ നടത്തുന്ന ക്രിയാത്മകവും മാതൃകാപരവുമായ പ്രവർത്തനങ്ങളെ അംഗീകരിക്കുകയും അത് മറ്റു വിദ്യാലയങ്ങൾക്കുകൂടി പങ്കുവച്ച് പൊതുവിദ്യാഭ്യാസത്തിന്റെ നിലവാരം ഉയർത്തുകയുമാണ് ഷോയുടെ പ്രധാന ലക്ഷ്യം. പരിപാടിയുടെ ഫ്ലോർ ഷൂട്ട് തിരുവനന്തപുരം കൈറ്റ് സ്റ്റുഡിയോയിൽ ഡിസംബർ 26ന് ആരംഭിക്കും. 2026 ജനുവരി ആദ്യം കൈറ്റ് വിക്ടേഴ്സിൽ സംപ്രേഷണം ചെയ്യും. അവസാന റൗണ്ടിൽ എത്തുന്ന 10 സ്കൂളിനും വിജയികൾക്കും ഫെബ്രുവരിയിൽ നടക്കുന്ന ഗ്രാന്റ് ഫിനാലെയിൽ പ്രത്യേക അവാർഡുകൾ നൽകും. ഓൺലൈൻ മീറ്റിങ്ങിൽ തെരഞ്ഞെടുത്ത സ്കൂളുകളുമായി സിഇഒ കെ അൻവർസാദത്ത് ആശയവിനിമയം നടത്തി. ഫ്ലോർ ഷൂട്ടിന് മുമ്പായി സ്കൂളുകൾ ചെയ്യേണ്ട കാര്യങ്ങളെ സംബന്ധിച്ചും ‘ഹരിതവിദ്യാലയം' ഷോയുടെ പ്രത്യേകതകളെ സംബന്ധിച്ചും വിശദീകരിച്ചു. ജില്ലാ കോ–- ഓർഡിനേറ്റർ ശോഭ ആന്റണി പങ്കെടുത്തു. പൊതുവിദ്യാഭ്യാസ മേഖലയിൽ വിദ്യാഭ്യാസ വകുപ്പ് നടപ്പാക്കിയ സമഗ്ര മുന്നേറ്റങ്ങൾ ഷോയിലൂടെ ചർച്ചചെയ്യും. സുസജ്ജമായ ഭൗതികസൗകര്യങ്ങളും മികച്ച അക്കാദമിക പിന്തുണയും എഐ, റോബോട്ടിക്സ് ഉൾപ്പെടെ സാങ്കേതിക പഠനവും ലഭ്യമാക്കുന്ന കേരളത്തിലെ സ്കൂളുകൾക്ക് ഈ വേദി ഒരു അംഗീകാരമാകും. 2010, 2017, 2022 വർഷങ്ങളിലെ റിയാലിറ്റി ഷോയുടെ തുടർച്ചയാണ് നാലാമത് എഡിഷൻ. 85 സ്കൂളാണ് തെരഞ്ഞെടുത്തിട്ടുള്ളത്.









0 comments