തൊഴിൽ ലഭിച്ചത്‌ 
269 യുവജനങ്ങൾക്ക്

കൊല്ലം

സാങ്കേതിക വിദ്യാഭ്യാസം പൂർത്തിയാക്കിയ പട്ടികജാതിക്കാരായ ഉദ്യോഗാർഥികൾക്ക് വൈദഗ്ധ്യവും വരുമാനവും ഉറപ്പാക്കാൻ ജില്ലാ പഞ്ചായത്ത്‌ നടപ്പാക്കിയ സ്കിൽടെക് പദ്ധതിയിൽ തൊഴിൽ ലഭിച്ചത്‌ 269 യുവാക്കൾക്ക്‌. എൻജിനിയറിങ്‌, ഐടിഐ, പോളിടെക്നിക് പാസായ പട്ടികജാതി യുവതി–--യുവാക്കൾക്ക് ജില്ലയിലെ സർക്കാർ ഓഫീസുകളിൽ രണ്ടുവർഷത്തെ അപ്രന്റിസ്ഷിപ് പരിശീലനം നൽകുന്ന പദ്ധതിയാണിത്‌. ജില്ലയിലെ തദ്ദേശസ്ഥാപന എൻജിനിയറിങ്‌ വിഭാഗം, വിവിധ ഫാമുകൾ, ആശുപത്രികൾ, ജലഅതോറിറ്റി, കെൽ, മണ്ണുസംരക്ഷണം, പൊതുമരാമത്ത് വകുപ്പ് തുടങ്ങിയ വിവിധ ഓഫീസുകളിലാണ്‌ ഇവർക്ക്‌ നിയമനം നൽകിയത്‌. ഐടിഐ പാസായവർക്ക് 7000, പോളിടെക്നിക്കുകാർക്ക് 8000, എൻജിനിയറിങ്‌ ബിരുദധാരികൾക്ക് 10,000 രൂപ വീതം പ്രതിമാസ ഓണറേറിയം നൽകിയാണ്‌ ഇവർക്ക്‌ പ്രോത്സാഹനം നൽകിവരുന്നത്‌. ജില്ലാ പഞ്ചായത്ത് ഓഫീസിൽ നടക്കുന്ന അഭിമുഖത്തിൽ നൂറുകണക്കിനു കുട്ടികളാണ്‌ പങ്കെടുക്കുന്നത്‌. ആദ്യഘട്ടത്തിൽ പ്രതിമാസം 30 ലക്ഷം രൂപയാണ് ഓണറേറിയം ഇനത്തിൽ ജില്ലാ പഞ്ചായത്ത് വിനിയോഗിച്ചത്‌. പ്രവൃത്തിപരിചയ സർട്ടിഫിക്കറ്റ് നൽകുന്നതിനാൽ വിദേശത്തടക്കം ജോലി ലഭിക്കാൻ സഹായമാണ്‌ പദ്ധതി. ഉദ്യോഗാർഥികൾക്ക്‌ അവർ പഠിച്ച മേഖലയിൽ മികച്ച പ്രായോഗിക പരിശീലനത്തിനാണ്‌ അവസരം ലഭിക്കുക. രാജ്യത്ത് ആദ്യമായാണ് ‘സ്‌കിൽടെക്‌’ മാതൃകയിലുള്ള പദ്ധതി നടപ്പാക്കിയത്‌.