അത്ഭുതകാഴ്ച്ചകളുമായി സയൻസ് സിറ്റി ഒരുങ്ങുന്നു

ഒന്നാംഘട്ട ഉദ്ഘാടനം നാളെ

Deshabhimani - ദേശാഭിമാനി ദിനപ്പത്രം
വെബ് ഡെസ്ക്

Published on Jul 02, 2025, 02:28 AM | 2 min read

കോട്ടയം

ഉന്നതവിദ്യാഭ്യാസ വകുപ്പിന്‌ കീഴിലുള്ള സംസ്ഥാന ശാസ്ത്ര സാങ്കേതിക മ്യൂസിയത്തിന്റെ ആഭിമുഖ്യത്തിൽ സ്ഥാപിച്ച സയൻസ് സിറ്റിയുടെ ഒന്നാംഘട്ട ഉദ്ഘാടനം വ്യാഴാഴ്‌ച നടക്കും. വൈകിട്ട് അഞ്ചിന് മുഖ്യമന്ത്രി പിണറായി വിജയൻ ഉദ്ഘാടനംചെയ്യും. മന്ത്രി ഡോ. ആർ ബിന്ദു അധ്യക്ഷയാകും. കേന്ദ്ര സാംസ്‌കാരിക മന്ത്രി ഗജേന്ദ്രസിങ്‌ ശെഖാവത്ത്, മന്ത്രി വി എൻ വാസവൻ എന്നിവർ മുഖ്യാതിഥികളാകും. കുറവിലങ്ങാട് പഞ്ചായത്തിലെ കോഴായിൽ സംസ്ഥാന സർക്കാർ അനുവദിച്ച 30 ഏക്കർ ഭൂമിയിലാണ് സയൻസ് സിറ്റിയുടെ നിർമാണം. ശാസ്ത്രഗാലറികൾ, ത്രിമാന പ്രദർശന തിയറ്റർ, ശാസ്ത്ര പാർക്ക്, സെമിനാർ ഹാൾ, ഇന്നോവേഷൻ ഹബ് എന്നിവ ഉൾക്കൊള്ളുന്ന സയൻസ് സെന്ററാണ് ഇതിലെ പ്രധാനഭാഗം. പദ്ധതി പ്രദേശത്ത് 47,147 അടി വിസ്തൃതിയിലുള്ള സയൻസ് സെന്റർ കെട്ടിടത്തിൽ ഫൺ സയൻസ്, മറൈൻ ലൈഫ് ആൻഡ് സയൻസ്, എമർജിങ് ടെക്നോളജി എന്നീ ശാസ്ത്രഗാലറികളും, ത്രിമാന തിയറ്റർ, ടെമ്പററി എക്സിബിഷൻ ഏരിയ, ആക്ടിവിറ്റി സെന്റർ, സെമിനാർ ഹാൾ, കോൺഫറൻസ് ഹാൾ, വർക്ക്ഷോപ്പുകൾ എന്നിവയും സജീകരിച്ചിട്ടുണ്ട്‌. സയൻസ് സെന്ററിന് ചുറ്റുമായി സയൻസ് പാർക്ക്, ദിനോസർ എൻക്ലേവ്, വാനനിരീക്ഷണത്തിനുവേണ്ട ടെലിസ്‌കോപ്പ് എന്നിവയും ഒരുക്കിയിട്ടുണ്ട്. കുറവിലങ്ങാട് പഞ്ചായത്തിന്റെയും ഉഴവൂർ ബ്ലോക്ക് പഞ്ചായത്തിന്റെയും സഹകരണത്തോടെ ജൈവവൈവിധ്യ പാർക്ക് സ്ഥാപിക്കാനുള്ള നടപടികളും പുരോഗമിക്കുകയാണ്. ഉദ്യാനത്തിന്റെ നിർമാണ ഉദ്ഘാടനവും മുഖ്യമന്ത്രി നിർവഹിക്കും.


ഉദ്ഘാടനചടങ്ങിൽ മൂവായിരം പേർ പങ്കെടുക്കും

കുറവിലങ്ങാട്

മുഖ്യമന്ത്രി പിണറായി വിജയൻ വ്യാഴം വൈകിട്ട്‌ നാലിന്‌ ഉദ്ഘാടനംചെയ്യുന്ന കോഴാ സയൻസ് സിറ്റിയുടെ ഉദ്ഘാടനചടങ്ങ് വിജയിപ്പിക്കുന്നതുമായി ബന്ധപ്പെട്ട് മന്ത്രി വി എൻ വാസവന്റെ നേതൃത്വത്തിൽ സംഘാടക സമിതിയോഗംചേർന്നു. ഉദ്‌ഘാടനച്ചടങ്ങിൽ മൂവായിരം പേരെ പങ്കെടുപ്പിക്കുവാൻ തീരുമാനിച്ചു. സംഘാടക സമിതി ചെയർമാൻ ബ്ലോക്ക് പഞ്ചായത്ത് പ്രസിഡന്റ്‌ രാജു ജോൺ നടന്ന പ്രവർത്തനങ്ങൾ വിശദീകരിച്ചു. മോൻസ്‌ ജോസഫ്‌ എംഎൽഎ അടക്കമുള്ള ജനപ്രതിനിധികളും രാഷ്ട്രീയകക്ഷി നേതാക്കളും പങ്കെടുത്തു. വിവിധ പഞ്ചായത്തുകളിൽ നിന്നായി പങ്കെടുക്കുന്നവർക്ക് വാഹന സൗകര്യം ഏർപ്പെടുത്തിയിട്ടുണ്ടെന്ന് പഞ്ചായത്ത്‌ പ്രസിഡന്റുമാർ പറഞ്ഞു. വാഹനങ്ങൾക്ക് പാർക്കിങ്‌ സൗകര്യങ്ങളും ട്രാഫിക്ക് നിയന്ത്രണങ്ങളും ഏർപ്പാടാക്കിയിട്ടുണ്ടെന്ന് വൈക്കം ഡിവൈഎസ്‌പി അറിയിച്ചു. ബുധനാഴ്ച മന്ത്രി വി എൻ വാസവൻ സയൻസ് സിറ്റിയിൽ എത്തി ഉദ്ഘാടനവുമായി ബന്ധപ്പെട്ട മുന്നൊരുക്കങ്ങൾ വിലയിരുത്തും.



deshabhimani section

Related News

View More
0 comments
Sort by

Deshabhimani

Subscribe to our newsletter

Quick Links


Home