പച്ച പുതപ്പിക്കാൻ ജൈവവൈവിധ്യ ഉദ്യാനം

കോട്ടയം

ശാസ്‌ത്ര രഹസ്യങ്ങളിലേക്ക്‌ മിഴി തുറന്ന്‌ കോഴാ സയൻസ്‌ സിറ്റി നാടിന്‌ സമർപ്പിക്കുമ്പോൾ ഈ അത്‌ഭുതലോകത്തെ പച്ച പുതപ്പിക്കാൻ ജൈവ വൈവിധ്യ ഉദ്യാനവും ഒരുങ്ങുന്നു. വിവിധ ഇനം ഫലവൃക്ഷങ്ങൾ, ഔഷധ ചെടികൾ, ചെറുമരങ്ങൾ, മുളയിനങ്ങൾ, കുറ്റിച്ചെടികൾ, മണ്മറഞ്ഞു പോകുന്ന മറ്റ് വൃക്ഷങ്ങൾ എന്നിവ ഉദ്യാനത്തിന്റ ഭാഗമാകും. സയൻസ്‌ സിറ്റിയുടെ ഉദ്‌ഘാടനച്ചടങ്ങിൽ മുഖ്യമന്ത്രി പിണറായി വിജയൻ ഉദ്യാനത്തിന്റെ നിർമാണ ഉദ്ഘാടനം ചെയ്യും. ഉഴവൂർ ബ്ലോക്ക്‌ പഞ്ചായത്തിന്റെയും കുറവിലങ്ങാട് പഞ്ചായത്തിന്റെയും തൊഴിലുറപ്പ് പദ്ധതിയുടെ സഹകരണത്തോടെയാണ്‌ വിപുലമായമായ പാർക്ക്‌ ഒരുങ്ങുന്നത്‌. കുറവിലങ്ങാട് പഞ്ചായത്തിന്റെ വിവിധ വാർഡുകളിൽ നിന്നായി 85 ഓളം തൊഴിലുറപ്പ് തൊഴിലാളികളാണ് ഈ ദൗത്യത്തിന്റെ ഭാഗമായിരിക്കുന്നത്. നിലവിൽ ക്യാമ്പസിനുള്ളിൽ തട്ടുകളായി തിരിച്ച് പാർശ്വഭിത്തി സംരക്ഷിക്കാൻ കയർ ഭൂവസ്ത്രം വിരിച്ച് പുല്ലുവച്ച്‌ പിടിപ്പിച്ച് പ്രവർത്തനങ്ങൾ നടക്കുകയാണ്‌. 4000 സ്‌ക്വയർ മീറ്റർ കയർ ഭൂവസ്ത്രമാണ് ഇതിനായി ഉപയോഗിക്കുന്നത്. 30 ലക്ഷത്തിന്റെ പ്രവർത്തങ്ങളാണ്‌ നടക്കുന്നത്‌. 
ഈ സാമ്പത്തിക വർഷം അവസാനിക്കുമ്പോൾ പാർക്കിനൊപ്പം വലിയൊരു കുളം കൂടെ നിർമിക്കുന്നത്‌ ഉൾപ്പെടെ ഏകദേശം 60 ലക്ഷം രൂപയുടെ പ്രവർത്തനങ്ങളാണ്‌ തൊഴിലുറപ്പ് പദ്ധതിയിൽ ഏറ്റെടുക്കുന്നത്‌.