കരുത്തോടെ കടുത്തുരുത്തി

കടുത്തുരുത്തി കടുത്തുരുത്തി പഞ്ചായത്തിലെ 20, ഞീഴൂരിലെ 15, മാഞ്ഞൂരിലെ ഏഴ്‌, മുളക്കുളത്തെ അഞ്ച്‌, തലയോലപ്പറമ്പിലെ രണ്ട്‌, കല്ലറയിലെ അഞ്ച്‌ ഉൾപ്പെടെ 54 വാർഡുകൾ ചേരുന്നതാണ് കടുത്തുരുത്തി ജില്ലാ പഞ്ചായത്ത് ഡിവിഷൻ. സൈനമ്മ ഷാജുവാണ് എൽഡിഎഫ് സ്ഥാനാർഥി. കേരള കോൺഗ്രസ് എം ജില്ലാ കമ്മിറ്റി അംഗം, ജില്ലാ സഹകരണ ആശുപത്രി ബോർഡംഗം, കുടുംബശ്രീ മിഷൻ ഗവേണിങ്‌ ബോർഡംഗം എന്നീ നിലകളിൽ പ്രവർത്തിച്ചിരുന്നു. കടുത്തുരുത്തി ഗവ. ഹയർ സെക്കൻഡറി സ്കൂൾ, പെരുവ ഗവ. വൊക്കേഷണൽ ഹയർ സെക്കൻഡറി സ്കൂളുകളിൽ അധ്യാപികയായിരുന്നു. കടുത്തുരുത്തി പഞ്ചായത്ത് എട്ടാംവാർഡ്‌ ജനറൽ സീറ്റിൽ മത്സരിച്ച് കന്നിയങ്കത്തിൽ വിജയിച്ചു. 2020 ൽ ഇതേവാർഡിൽ നിന്ന്‌ സ്ത്രീ സംവരണ സീറ്റിൽ വിജയിച്ച് ആദ്യ രണ്ടരവർഷം കടുത്തുരുത്തി പഞ്ചായത്ത് പ്രസിഡന്റായി. പദ്ധതിവിഹിതം മുഴുവൻ വിനിയോഗിച്ചതിന്‌ ജില്ലയിൽ ആറാംസ്ഥാനം നേടി. സംസ്ഥാനത്തെ ആദ്യത്തെ ടേക്‌ എ ബ്രേക്ക് കടുത്തുരുത്തി ജങ്‌ഷനിൽ സ്ഥാപിച്ചു. മുട്ടുചിറയിലും കപിക്കാടും കളിസ്ഥലങ്ങൾ നിർമിച്ചു. മധുരവേലി പിഎച്ച്‌സി എഫ്‌എച്ച്‌സിയായി ഉയർത്തി. ജില്ലാ പഞ്ചായത്ത് വൈസ് പ്രസിഡന്റ്‌ ജോസ് പുത്തൻകാല കടുത്തുരുത്തി ഡിവിഷനിൽ ആറുകോടിയുടെ വികസനമാണ്‌ നടത്തിയത്‌. മുട്ടുചിറ കുടിവെള്ള പദ്ധതി, കടുത്തുരുത്തി ഗവ. ഹയർ സെക്കൻഡറി സ്‌കൂൾ, മാഞ്ഞൂർ സൗത്ത് ഗവ. ഹൈസ്‌കൂൾ എന്നിവിടങ്ങളിൽ നവീകരണം നടത്തി. കടുത്തുരുത്തി തെക്കുംപുറം പാടശേഖരത്ത് വെള്ളംകയറി കൃഷി നശിക്കാതിരിക്കാൻ വെർട്ടിക്കൽ ആക്സിസ് ഫ്ലോ പമ്പ് സ്ഥാപിച്ചു. യുഡിഎഫ് സ്ഥാനാർഥി കെഎസ്‌യു ജില്ലാ ജനറൽ സെക്രട്ടറി ആൻ മരിയ ജോർജാണ്‌. ബിജെപി മണ്ഡലം സെക്രട്ടറി ബിന്ദു ഷാജിയാണ്‌ എൻഡിഎ സ്ഥാനാർഥി.