കോൺഗ്രസ് VS കേരള കോൺഗ്രസ്
കോട്ടയം ജില്ലയിൽ യുഡിഎഫിലെ പ്രധാന കക്ഷികൾ തമ്മിൽ നടക്കുന്നത്‌ കനത്തപോര്‌. കോൺഗ്രസും കേരള കോൺഗ്രസ് ജോസഫ്‌ വിഭാഗവും സീറ്റ്‌ വിഭജനത്തിൽ തുടങ്ങിയ തർക്കം പോർക്കളത്തിലേക്കുമെത്തി. നിരവധി വാർഡുകളിൽ ഇരുപാർടികളും നേർക്കുനേർ ഏറ്റുമുട്ടുന്നു. ഇത്‌ യുഡിഎഫിനുണ്ടാക്കുന്ന തലവേദന ചെറുതല്ല. വാകത്താനം പഞ്ചായത്തിലെ ഏഴാംവാർഡിൽ യുഡിഎഫ്‌ സ്ഥാനാർഥി പി സി രവീന്ദ്രനെതിരെ കേരള കോൺഗ്രസിലെ സിബി പാറപ്പ വിമതനായി മത്സരിക്കുന്നു. കേരള കോൺഗ്രസിന്‌ സീറ്റ്‌ നൽകിയില്ലെന്നതാണ്‌ കാരണം. എലിക്കുളം പഞ്ചായത്ത്‌ നാലാംവാർഡിൽ കോൺഗ്രസിലെ ജോസഫ്‌ തോമസിനെതിരെ കേരള കോൺഗ്രസിലെ സാവിച്ചൻ പാംപ്ലാനി മത്സരിക്കുന്നു. ചിലയിടത്ത്‌ കേരള കോൺഗ്രസ് പ്രവർത്തകർ സ്വതന്ത്രരുടെ വേഷത്തിൽ കോൺഗ്രസിനെതിരെ മത്സരിക്കുന്നുണ്ട്‌. ഇതിൽ പ്രാദേശിക നേതൃത്വങ്ങൾ തമ്മിൽ കടുത്തതർക്കം നിലനിൽക്കുന്നുണ്ട്‌. തലയാഴം, വെച്ചൂർ, മുളക്കുളം, കോരുത്തോട്‌ എന്നീ പഞ്ചായത്തുകളിലും കോൺഗ്രസ് – കേരള കോൺഗ്രസ് പോരാട്ടം നടക്കുന്നുണ്ട്‌. ജില്ലാ പഞ്ചായത്തിൽ കഴിഞ്ഞതവണത്തേക്കാൾ ഒരു സീറ്റ്‌ കുറവാണ്‌ ഇത്തവണ കേരള കോൺഗ്രസിന്‌ ലഭിച്ചത്‌. സ്വാധീനം കുറഞ്ഞ സീറ്റ്‌ തന്നുവെന്ന പരാതി കേരള കോൺഗ്രസിനുണ്ട്‌. ഇതിനു പിന്നാലെയാണ്‌ വിമതന്മാർ തലപൊക്കിയത്‌. ഇതേ രീതിയിൽ, മുസ്ലിംലീഗിനും ജയസാധ്യത തീരെയില്ലാത്ത സീറ്റ്‌ നൽകി, ആ സീറ്റ്‌ കോൺഗ്രസ് പിടിച്ചെടുത്തിരുന്നു. തെരഞ്ഞെടുപ്പ്‌ കഴിഞ്ഞാലും പടലപ്പിണക്കങ്ങൾ യുഡിഎഫിൽ തലവേദനയായി തുടരുമെന്ന്‌ ഇപ്പോഴേ നേതാക്കൾക്ക്‌ ബോധ്യമായിട്ടുണ്ട്‌.
Related News
Dont Miss it
0 comments