മുന്നേറ്റം തുടരാൻ ഭരണങ്ങാനം

ഭരണങ്ങാനം മീനച്ചിൽ, കടനാട്‌, ഭരണങ്ങാനം പഞ്ചായത്തുകൾ പൂർണമായും കരൂർ, വലവൂർ ബ്ലോക്ക്‌ ഡിവിഷനുകളും പാന്പാടി ബ്ലോക്കിലെ മഞ്ചക്കുഴി ഡിവിഷനും ഉൾപ്പെട്ട 63 വാർഡുകൾ ചേർന്നതാണ്‌ ജില്ലാ പഞ്ചായത്ത്‌ ഭരണങ്ങാനം ഡിവിഷൻ. 79,175 വോട്ടർമാർ. കേരള വനിതാ കോൺഗ്രസ്‌ എം സംസ്ഥാന പ്രസിഡന്റും സംസ്ഥാന വനിതാ വികസന കോർപറേഷൻ ഡയറക്ടർ ബോർഡംഗവും മുൻ ജില്ലാ പഞ്ചായത്ത്‌ അംഗവുമായ പെണ്ണമ്മ തോമസ്‌ പന്തലാനിയാണ്‌ എൽഡിഎഫ്‌ സ്ഥാനാർഥി. വിരമിച്ച പ്രധാനധ്യാപികയും അധ്യാപക അവാർഡ്‌ ജേതാവുമാണ്‌. കേരള കോൺഗ്രസ്‌ എം സംസ്ഥാന കമ്മിറ്റിയംഗവും മുൻ ജില്ലാ ബാങ്ക്‌ ഡയറക്ടർ, മീനച്ചിൽ കാർഷിക ഗ്രാമവികസന ബാങ്ക്‌ ഡയറക്ടർ, അധ്യാപക സഹകരണസംഘം മുൻ പ്രസിഡന്റ്‌‍, മുൻ രൂപത പാസ്‌റ്ററൽ ക‍ൗൺസിൽ അംഗം, കോർപറേറ്റ്‌ ഏജൻസി അക്കാദമിക്‌ ക‍ൗൺസിൽ എക്‌സിക്യൂട്ടീവംഗം എന്നീ നിലകളിലും ശ്രദ്ധേയയാണ്‌. 2015–20 കാലത്ത്‌ ഭരണങ്ങാനം ഡിവിഷനെ പ്രതിനിധീകരിച്ച പെണ്ണമ്മ നടപ്പാക്കിയ വികസന ക്ഷേമ പ്രർത്തനങ്ങൾ കൈമുതലാണ്‌. അടുത്തിടെ പാലായിൽ വനിത വികസന കോർപറേഷന്റെ വനിതാ മിത്ര ഹോസ്‌റ്റൽ സ്ഥാപിച്ചത്‌ പെണ്ണമ്മ മുൻകൈയെടുത്താണ്‌. നിലവിൽ ജില്ലാ പഞ്ചായത്തംഗമായ എൽഡിഎഫിലെ രാജേഷ്‌ വാളിപ്ലാക്കൽ അഞ്ച്‌ വർഷംകൊണ്ട്‌ 13.04 കോടി രൂപയുടെ സമാനതകളില്ലാത്ത വികസന പ്രവർത്തനങ്ങളാണ്‌ നടത്തിയത്‌. കുടിവെള്ളം, ശുചിത്വം, ആരോഗ്യമേഖല, തെരുവുവിളക്കുകൾ, റോഡുകളുടെ നവീകരണം, അങ്കണവാടികളുടെ നിർമാണവും പുനരുദ്ധാരണവും, ലൈഫ് ഭവന പദ്ധതി, പാലിയേറ്റീവ് കെയർ എന്നീ മേഖലകളിൽ മികച്ച നേട്ടങ്ങളുണ്ടാക്കി. കരൂർ, കടനാട്‌, മീനച്ചിൽ, എലിക്കുളം പഞ്ചായത്തുകൾ എൽഡിഎഫ്‌ ഭരിക്കുന്നത്‌ രാഷ്‌ട്രീയ മേൽക്കൈ നൽകുന്നു. വിരമിച്ച പ്രധാനാധ്യാപിക ലൈസമ്മ പുളിങ്കാടാണ്‌ യുഡിഎഫ്‌ സ്ഥാനാർഥി. മാഗി കല്ലറക്കൽ എൻഡിഎ സ്ഥാനാർഥി.