സബാഷ്‌ ടോമി,
നീന്തിയെടുത്ത 
നേട്ടങ്ങൾക്ക്‌

പൊൻകുന്നം

കാഴ്‌ച പരിമിതിയെ തുഴഞ്ഞ്‌ തോൽപ്പിച്ചാണ്‌ ടോമി ചിരിച്ചു നിൽക്കുന്നത്‌. തെലങ്കാനയിൽ നടന്ന ദേശീയ പാരാ സ്വിമ്മിങ് ചാമ്പ്യൻഷിപ്പിൽ സീനിയർ വിഭാഗം 50 മീറ്റർ ബാക്ക് സ്‌ട്രോക്കിൽ വെങ്കലമെഡൽ നേടി പൊ ൻകുന്നം കുരീക്കാട്ട് ടോമി ജോസഫ് (41). ഗ്വാളിയാർ അടൽ ബിഹാരി സെന്റർ ഫോർ ഡിസെബിലിറ്റി സ്‌പോർട്സിൽ പരിശീലനംനേടിയാണ് ദേശീയ മത്സരത്തിൽ പങ്കെടുത്തത്. കഴിഞ്ഞവർഷം ഗോവയിൽനടന്ന ചാമ്പ്യൻഷിപ്പിൽ ഇതേഇനത്തിൽ സ്വർണം നേടിയിരുന്നു. ചെറുപ്പം മുതൽ വീടിന്റെ സമീപത്തെ തോടുകളിലാണ്‌ നീന്തൽ പഠിച്ചത്. തൃശൂരിൽ നടന്ന ഓൾ കേരള പാരാ സ്വിമ്മിങ് ചാമ്പ്യൻഷിപ്പിൽ 100 മീറ്റർ ഫ്രീസ്റ്റൈൽ, 50 മീറ്റർ ഫ്രീസ്റ്റൈൽ, 50 മീറ്റർ ബാക്ക് സ്‌ട്രോക്ക് എന്നിവയിൽ സ്വർണംനേടിയിരുന്നു. കാഞ്ഞിരപ്പള്ളി മുനിസിഫ് കോടതിയിൽ പ്രോസസ് സർവറായി ജോലിചെയ്യുന്നു. ആർ ജയന്തിയാണ് ഭാര്യ. കാതറിൻ, സാവിയോ എന്നിവർ മക്കളാണ്‌.​​