തദ്ദേശപ്പോരിനൊരുങ്ങി 
കുടുംബശ്രീയുടെ 882 വനിതകൾ

കോട്ടയം

അയൽക്കൂട്ടങ്ങളിൽനിന്ന്‌ കേരളത്തിന്റെ ഭരണസിരാകേന്ദ്രങ്ങളിലേക്ക്‌ ഒരു പുതു കാൽവയ്‌പ്പിനൊരുങ്ങുകയാണ്‌ കുടുംബശ്രീ. ജില്ലയിൽനിന്ന്‌ 882 വനിതകളെ തദ്ദേശ തെരഞ്ഞെടുപ്പിലേക്ക്‌ മത്സരിപ്പിച്ച്‌ പുതുചരിത്രം കുറിക്കുന്നു. സിഡിഎസ് ചെയർപേഴ്സൺമാർ, സിഡിഎസ്, ഓക്സിലറി അംഗങ്ങൾ, ഹരിതകർമസേന പ്രവർത്തകർ, കമ്യൂണിറ്റി റിസോഴ്സ് പേഴ്സണന്മാർ, അയൽകൂട്ട അംഗങ്ങൾ എന്നിവരാണ്‌ പഞ്ചായത്ത്‌, ബ്ലോക്ക്‌, ജില്ലാ ഡിവിഷൻ കേന്ദ്രികരിച്ച്‌ വിവിധ രാഷ്ട്രീയ കക്ഷികളുടെ ഭാഗമായും സ്വതന്ത്ര സ്ഥാനാർഥികളുമായി മത്സരിക്കുന്നത്. ഇതിൽ ആറ്‌ ഓക്സിലറി അംഗങ്ങളും 12 ഹരിത കർമaസേന പ്രവർത്തകരും 24 കമ്യൂണിറ്റി റിസോഴ്സ് പേഴ്സൺമാരും മത്സരരംഗത്ത് ഉണ്ട്. 97 സിഡിഎസ് അംഗങ്ങൾ, 18 ചെയർപേഴ്സൺമാർ ഉൾപ്പെടെ 115 പേരാണ് പഞ്ചായത്തിലേക്ക് മത്സരിക്കുന്നത്. കുടുംബശ്രീ പ്രവർത്തനങ്ങളിലൂടെ സമൂഹത്തിന്റെ വിവിധ മേഖലകളിലുള്ള പ്രവർത്തന പരിചയമാണ് തദ്ദേശ തെരഞ്ഞെടുപ്പിലെ മത്സരരംഗത്തേക്ക് ഇവരെ എത്തിച്ചത്. സമൂഹവുമായി നേരിട്ട് ഇടപെട്ട് പ്രവർത്തിച്ച അനുഭവം ആത്മവിശ്വാസവും നൽകുന്നു.