പുതുമാറ്റത്തിനായി അതിരമ്പുഴ

കോട്ടയം നാലു പഞ്ചായത്തിലെ 56 വാർഡുകൾ അടങ്ങുന്നതാണ് ജില്ലാ പഞ്ചായത്തിലെ അതിരമ്പുഴ ഡിവിഷൻ. അതിരമ്പുഴ പഞ്ചായത്തിലെ 24 വാർഡുകളും ആർപ്പൂക്കര പഞ്ചായത്തിലെ 16 വാർഡുകളും അയ്മനം പഞ്ചായത്തിലെ ഒമ്പത് വാർഡുകളും നീണ്ടൂർ പഞ്ചായത്തിലെ ആറു വാർഡുകളും ഇതിൽ ഉൾപ്പെടുന്നു. ആകെ 86748 വോട്ടർമാർ. എൽഡിഎഫ് സ്ഥാനാർഥിയായി മത്സരിക്കുന്നത് കേരള കോൺഗ്രസ് എം നേതാവ് ജിം അലക്സാണ്. രണ്ടു പതിറ്റാണ്ടിലേറെയായി മെഡിക്കൽ കോളേജ്, ഏറ്റുമാനൂർ, അതിരമ്പുഴ പ്രദേശങ്ങളിലെ രാഷ്ട്രീയ പൊതുപ്രവർത്തന രംഗത്തെ സജീവ സാന്നിധ്യം. നാടിന്‌ സുപരിചിതൻ. എംകോം എംബിഎ ബിരുദധാരിയാണ്. നിലവിൽ എസ്എച്ച് മൗണ്ടിലെ പോപ്പുലർ വെഹിക്കിൾസ് ആൻഡ്‌ സർവീസ് ലിമിറ്റഡിന്റെ ട്രൂ വാല്യൂ ഡിവിഷനിൽ അഡ്മിനിസ്‌ട്രേഷൻ മാനേജരുമാണ്‌. അതിരമ്പുഴ മുൻ പഞ്ചായത്തംഗം, മാന്നാനം സർവീസ് സഹകരണ ബാങ്ക് ബോർഡംഗം, സബർമതി ചാരിറ്റബിൾ ട്രസ്റ്റിന്റെ ചെയർമാനായും പ്രവർത്തിക്കുന്നു. എൽഡിഎഫ്‌ ഭരണത്തിൽ അതിരമ്പുഴയിലും മറ്റ് പഞ്ചായത്തുകളിലുമായി നടന്ന വികസന പെരുമഴയുടെയും ഉ‍ൗർജത്തിലാണ്‌ പോരാട്ടം. ഇടുങ്ങിയ അതിരമ്പുഴ ജങ്ഷനെ മന്ത്രി വി എൻ വാസവന്റെ നേതൃത്വത്തിൽ നവീകരിച്ച്‌ വലിയ മാറ്റങ്ങൾക്ക് തുടക്കംകുറിച്ചു. വർഷങ്ങളായി മുടങ്ങിക്കിടന്ന കാരിത്താസ് റെയിൽവേ മേൽപ്പാലം പൂർത്തിയാക്കി. മാന്നാനം പാലത്തിന്റെ പുനർനിർമാണം ആരംഭിച്ചത്‌ തുടങ്ങി എൽഡിഎഫ്‌ സർക്കാർ അതിരമ്പുഴയിൽ നടപ്പാക്കിയ നിരവധിപദ്ധതികളുടെ വികസനക്കരുത്തിലാണ്‌ ജിം അലക്‌സ്‌ ജനവിധി തേടുന്നത്‌. കേരള കോൺഗ്രസ് ജോസഫ് വിഭാഗം ജില്ലാ പ്രസിഡന്റും അഭിഭാഷകനുമായ ജയ്സൺ ജോസഫാണ് യുഡിഎഫ് സ്ഥാനാർഥി. മഹിളാ മോർച്ച ഏറ്റുമാനൂർ മണ്ഡലം സെക്രട്ടറിയായ വിദ്യ വി നായരാണ് ബിജെപി സ്ഥാനാർഥി.