വെന്പള്ളിയിൽ ഇടഞ്ഞ ആന 
പാപ്പാനെ കുത്തി പരിക്കേൽപ്പിച്ചു

കുറവിലങ്ങാട് ക്ഷേത്രത്തിലെ ഉത്സവ എഴുന്നള്ളത്തിനുശേഷം തിരികെ കൊണ്ടുപോയ ആന ഇടഞ്ഞ്‌ ഒന്നാം പാപ്പാനെ കുത്തിപ്പരിക്കേൽപ്പിച്ചു. ഒന്നാംപാപ്പാൻ ആലുവ മുത്തേടം സ്വദേശി സലിം (42) നാണ് പരിക്കേറ്റത്. തുടയിൽ പരിക്കേറ്റ സലിമിനെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ബുധൻ വൈകിട്ട് 4.30 ഓടെ വെമ്പള്ളി ജങ്‌ഷനുസമീപം എംസി റോഡിലാണ് സംഭവം. ആർപ്പൂക്കര ക്ഷേത്രത്തിലെ ഉത്സവത്തിൽ പങ്കെടുത്ത്‌ മടങ്ങിയ വൈലാശ്ശേരി അർജുനൻ എന്ന ആനയാണ് ഇടഞ്ഞത്. സ്വദേശമായ കോഴിക്കോട് ബാലുശേരിയിലേക്ക് ലോറിയിൽ കൊണ്ടുപോകുന്നതിനിടെ സുരക്ഷയ്‌ക്ക് വച്ച്കെട്ടിയ ഇഴ വെമ്പള്ളിയിൽ എത്തിയപ്പോൾ അഴിഞ്ഞു. ഇത് മുറുക്കാൻ പാപ്പാൻമാർ ആനയെ എംസി റോഡിൽ ഇറക്കി. വാഹനങ്ങളുടെ ശബ്ദംകേട്ട് പരിഭ്രാന്തനായ ആന ബഹളംവച്ച്‌ റോഡരികിലെ പരസ്യബോർഡുകൾ കുത്തിമറിച്ചു. നിയന്ത്രിക്കാനെത്തിയ പാപ്പാൻമാരുടെ നേരെതിരിഞ്ഞ്‌ ഒന്നാം പാപ്പാനായ സലിമിനെ കുത്തുകയായിരുന്നു. എംസി റോഡിൽ നിലയുറപ്പിച്ച ആനയെ മറ്റ് പാപ്പാൻമാർ തളയ്‌ക്കാൻ ശ്രമിച്ചിട്ട് നടക്കാതെ വന്നതോടെ ആർപ്പൂക്കര ക്ഷേത്രത്തിൽനിന്ന്‌ പാപ്പാൻമാരെത്തി. രക്ഷയില്ലാതെ തലയോലപ്പറമ്പ് തിരുപുരം ക്ഷേത്രത്തിലെ ഉത്സവത്തിനെത്തിച്ച ആനകളുടെ പാപ്പാൻമാരും എലഫന്റ്‌ സ്ക്വാഡും, ഫെസ്റ്റിവൽ കോർഡിനേഷൻ കമ്മിറ്റി അംഗങ്ങളും കുറവിലങ്ങാട് പൊലീസും എത്തി രാത്രി 7.15 ഓടെ വടം ഉപയോഗിച്ച് ബന്ധിക്കുകയായിരുന്നു. എംസി റോഡിൽ മണിക്കൂറുകളോളം ഗതാഗതം തടസ്സപ്പെട്ടു.