തുടരാൻ തലയാഴം

വൈക്കം

മൂന്ന്‌ പതിറ്റാണ്ടുകളായി ഇടതുപക്ഷത്തിൽ ഉറച്ചുനിൽക്കുന്ന ജില്ലാ പഞ്ചായത്തിലെ ഡിവിഷനാണ്‌ തലയാഴം. അഞ്ചു പഞ്ചായത്തിലായി ആകെ 55 വാർഡുകൾ. നീണ്ടൂർ, കല്ലറ പഞ്ചായത്തുകളിലെ എട്ട്‌ വാർഡുകളും തലയാഴം പഞ്ചായത്തിലെ ഒമ്പതും, ടിവിപുരം, വെച്ചൂർ പഞ്ചായത്തിലെ മുഴുവൻ വാർഡുകളും അടങ്ങുന്നതാണ്‌ ഡിവിഷൻ. എൽഡിഎഫ് സ്ഥാനാർഥിയായി മത്സരിക്കുന്നത് സിപിഐ എം വൈക്കം ഏരിയ കമ്മിറ്റി അംഗം ആനന്ദ്‌ ബാബുവാണ്‌. ഡിവൈഎഫ്ഐ വൈക്കം ബ്ലോക്ക്‌ സെക്രട്ടറിയും ജില്ലാ കമ്മിറ്റി അംഗവുമായ ആനന്ദ്‌ ദേശാഭിമാനി ലേഖകനാണ്‌. എസ്‌എഫ്‌ഐയിലൂടെ വളർന്ന യുവകരുത്ത്‌. നാടിന്‌ സുപരിചിതൻ. രാഷ്ട്രീയ പൊതുപ്രവർത്തന രംഗത്തെ സജീവ സാന്നിധ്യം. ജനങ്ങൾക്കായി സമാനതകളില്ലാത്ത പ്രവർത്തനങ്ങളാണ്‌ ആനന്ദ്‌ നടത്തുന്നത്‌. കോവിഡ്‌, പ്രളയകാലത്ത്‌ മാതൃകപരമായ ഇടപെടലുകൾ നടത്തി. കോവിഡ്‌ ബാധിച്ച്‌ മരിച്ച 25 ലധികം ആളുകളുടെ മൃതദേഹങ്ങളാണ്‌ ആന്ദിന്റെ നേതൃത്വത്തിൽ സംസ്‌കരിച്ചത്‌. കോതമംഗലം കുട്ടമ്പുഴയിലെ ഉറിയംപെട്ടി ഉന്നതിയിലെത്തി പഠനം മുടങ്ങിയ വിദ്യാർഥികൾക്ക്‌ ക്ലാസുകൾ നൽകി. ജനങ്ങൾക്ക്‌ സമൂഹ അടുക്കളവഴി ഭക്ഷണം ഉറപ്പാക്കി. പഠനകാലം മുതൽ നിരവധി സാമൂഹിക പ്രവർത്തനങ്ങൾക്ക്‌ നേതൃത്വം നൽകുന്നു. ഡിവിഷനിൽ എൽഡിഎഫ്‌ പ്രതിനിധി ഹൈമി ബോബിയുടെ നേതൃത്വത്തിൽ നടത്തിയ വികസന മുന്നേറ്റം തുടരാനാണ്‌ എൽഡിഎഫ്‌ ലക്ഷ്യം. അംബേദ്കർ സാംസ്കാരിക നിലയം(40 ലക്ഷം), അയ്യനാട് വയോജന വിശ്രമകേന്ദ്രം(35 ലക്ഷം), അകത്താന്തര ചെമ്പുരുത്ത് റോഡ്(20 ലക്ഷം), കല്ലറ പറവന്തുരുത്ത് ഉദയന്തറ റോഡ്(45 ലക്ഷം), വെച്ചൂർ ഗവ. എച്ച്എസ് സ്മാർട്ട് ക്ലാസ്സ് റൂം(53 ലക്ഷം) തുടങ്ങിയവ നാടിന്റെ മുഖംമാറ്റിയവയാണ്‌. ഡിസിസി സെക്രട്ടറി എം മുരളിയാണ്‌ യുഡിഎഫ്‌ സ്ഥാനാർഥി. ബിജെപി വൈക്കം മണ്ഡലം സെക്രട്ടറി ടി എസ്‌ സജീവാണ്‌ എന്‍ഡിഎ സ്ഥാനാർഥി.