സെപ്‌തംബർ 15: രേഖകളിലെ നിണച്ചാലുകൾ

‘മലബാറിൽ നിന്നുള്ള ഏറ്റവും ആശ്ചര്യകരമായ ഒരു സംഭവവികാസം’ എന്ന, ആഭ്യന്തര സെക്രട്ടറി റിച്ചാഡ്‌ ടോട്ടൻഹാമിന്റെ ആമുഖക്കുറിപ്പോടെയാണ്‌ ആ ഫയൽ തുടങ്ങുന്നത്‌. മലബാറിൽ സ്വാതന്ത്ര്യപ്രസ്ഥാനത്തെ കുലുക്കിയുണർത്തി വീരോജ്വലമായ സമരപാതയിലേക്ക്‌ വഴിനടത്തിയ 1940 സെപ്‌തംബർ 15‐ന്റെ പ്രക്ഷോഭത്തെപ്പറ്റിയാണ്‌ രേഖ.

1940 സെപ്‌തംബർ 15 സാമ്രാജ്യത്വവിരുദ്ധ ദിനമായി ആചരിക്കാൻ എഐസിസിയാണ്‌ ആഹ്വാനം ചെയ്‌തത്‌. യുദ്ധസാഹചര്യത്തില്‍ സഹകരിക്കാന്‍ കോണ്‍ഗ്രസ് വെച്ച നിർദേശങ്ങൾ അംഗീകരിച്ച്‌ ബ്രിട്ടീഷ് സര്‍ക്കാര്‍ നല്‍കിയ ഉറപ്പ് പാലിക്കാത്തതിനെതിരെയും നേതാക്കളുടെ അറസ്റ്റുകളിൽ പ്രതിഷേധിച്ചുമായിരുന്നു ദിനാചരണം. കെപിസിസിയും ദിനാചരണത്തിനായി പ്രമേയം പാസാക്കി. ഇടതുപക്ഷത്തിനാണ്‌ കെപിസിസി നേതൃത്വം. വലതുവിഭാഗം ജനകീയസമരമാർഗങ്ങൾക്കെതിരുനിൽക്കുന്നു. രഹസ്യപ്രവർത്തനം അതിനകം ആരംഭിച്ചിരുന്ന കമ്യൂണിസ്റ്റ്‌ പാർടിയും ദിനാചരണം വിജയിപ്പിക്കാൻ തീരുമാനിച്ചു. വിലവര്‍ധനവിനെതിരെ അന്നുതന്നെ പ്രതിഷേധിക്കാന്‍ കർഷകസംഘവും ആഹ്വാനം ചെയ്‌തു.

മൊറാഴ എറ്റുമുട്ടലിനെപ്പറ്റി ജില്ലാ മജിസ്‌ട്രേറ്റ്‌ ചീഫ്‌ സെക്രട്ടറിക്കയച്ച ടെലിഗ്രാം

മലബാർ ജില്ലാ കലക്‌ടർ നിരോധന ഉത്തരവിറക്കി. എങ്ങും കനത്ത പൊലീസ്‌ സന്നാഹം. മൊറാഴയിലും തലശ്ശേരിയിലും മട്ടന്നൂരിലും നിരോധനാജ്ഞ ലംഘിച്ച്‌ പ്രതിഷേധ റാലികള്‍ സംഘടിപ്പിച്ചു. തുടർന്നുണ്ടായ സംഭവങ്ങൾ ഭരണാധികാരികളെ അമ്പരപ്പിച്ചു. ടോട്ടൻഹാമിന്റെ ആമുഖത്തോടെ തുടങ്ങുന്ന, ബ്രിട്ടീഷിന്ത്യാ ഗവൺമെന്റിന്റെ ആഭ്യന്തര വകുപ്പിലെ നന്പർ 5/18/ho--‐pol(9) ആയുള്ള ഫയൽ ഈ അങ്കലാപ്പിന്‌ രേഖാമൂലം തെളിവ്‌ നൽകുന്നു.

തലശ്ശേരിയിൽ സഖാക്കള്‍ അബുവും ചാത്തുക്കുട്ടിയും രക്തസാക്ഷികളായി. കേരളത്തിലെ ആദ്യ കമ്യൂണിസ്റ്റ്‌ രക്തസാക്ഷികൾ. മൊറാഴയിൽ ഒരു പൊലീസ്‌ ഇൻസ്‌പെക്ടറും കോൺസ്റ്റബിളും കൊല്ലപ്പെട്ടു. മട്ടന്നൂരിലെ ഏറ്റുമുട്ടലിലും ഒരു പൊലീസുകാരന്‍ വധിക്കപ്പെട്ടു.

മലബാർ ജില്ലാ മജിസ്‌ട്രേറ്റ്‌ മദ്രാസിലേക്ക്‌‌ ചീഫ്‌ സെക്രട്ടറിക്ക്‌ 1940 സെപ്‌തംബർ 17‐ന്‌ അയച്ച റിപ്പോർട്ടിന്റെ പകർപ്പ്‌ ഈ ഫയലിലുണ്ട്‌. ഒപ്പം സംഭവം നടക്കുമ്പോൾ അയച്ച ടെലിഗ്രാമുകളും.

തലശ്ശേരി ജവഹർഘട്ടിലെ പൊലീസ്‌ അതിക്രമത്തെ മജിസ്‌ട്രേറ്റ്‌ വിശദീകരിക്കുന്നതിങ്ങനെ: ജോയിന്റ്‌ മജിസ്‌ട്രേറ്റും പൊലീസും ആദ്യം പ്രാദേശിക കോൺഗ്രസ്‌ ഓഫീസിലെത്തി. നിരോധനം ലംഘിച്ചാലുള്ള ഭവിഷ്യത്തിനെപ്പറ്റി മുന്നറിയിപ്പ്‌ നൽകി. അവർ അതു തള്ളി.

പൊലീസ്‌ സംഘം എത്തിയപ്പോൾ തന്നെ 1300‐ഓളം വരുന്ന ജനക്കൂട്ടം കല്ലേറുതുടങ്ങിയതായാണ്‌ തുടർന്നുപറയുന്നത്‌. ജോയിന്റ്‌ മജിസ്‌ട്രേറ്റിനും ഏറുകിട്ടി. ലാത്തിച്ചാർജിലും ജനങ്ങൾ പിന്മാറിയില്ല. പിരിഞ്ഞില്ലെങ്കിൽ വെടിവയ്‌ക്കുമെന്ന്‌ മലയാളത്തിൽ മുന്നറിയിപ്പ്‌ നൽകി. എന്നാൽ ജനങ്ങൾ കൂടുതൽ വീറോടെ നീങ്ങുന്നതാണ്‌ കണ്ടതെന്ന്‌ രേഖയിലുണ്ട്‌. ‘ഒരു അവസാന മുന്നറിയിപ്പിനു ശേഷം 17 റൗണ്ട്‌ വെടിവെച്ചു. എട്ടുപേർക്ക് പരിക്കേറ്റു. രണ്ടുപേർ മരിച്ചു. മരിച്ചവരിൽ ഒരാൾ അധ്യാപകനും ഒരാൾ ബീഡിത്തൊഴിലാളിയുമാണ്‌’‐ റിപ്പോർട്ടിൽ പറയുന്നു.

1946ൽ ജയിൽമോചിതനായ കെപിആറിനും മറ്റു പ്രതികൾക്കും കോഴിക്കോട്‌ റെയിൽവെ സ്റ്റേഷനിൽ നൽകിയ സ്വീകരണത്തെപ്പറ്റി പീപ്പിൾസ്‌ ഏജിൽ 1946 ജൂലൈ ഏഴിനു വന്ന റിപ്പോർട്ട്‌

മൊറാഴ സംഭവത്തെപ്പറ്റി രേഖ പറയുന്നത്‌ ഇങ്ങനെ:

‘സബ്‌ മജിസ്‌ട്രേറ്റിനോടൊപ്പം യോഗസ്ഥലത്ത്‌ വൈകിട്ട്‌ നാലോടെ പൊലീസെത്തി. വലിയ ആൾക്കൂട്ടമാണ്‌‌ കണ്ടത്‌. യോഗം നിരോധിച്ച കാര്യം വായിച്ചുകേൾപ്പിച്ചശേഷം കൂട്ടത്തിലെ പ്രധാനിയായ കെ പിആർ ഗോപാലൻ നന്പ്യാർക്ക്‌ ഒരു കോപ്പി നൽകി. അഞ്ചുമിനിട്ടിൽ പിരിഞ്ഞുപോകാൻ വളപട്ടണം എസ്‌ഐ ജനക്കൂട്ടത്തോട്‌ ആവശ്യപ്പെട്ടു. എന്നാൽ ഉത്തരവ്‌ തങ്ങൾക്ക്‌ ബാധകമാകില്ല എന്നായിരുന്നു മറുപടി. പിരിഞ്ഞില്ലെങ്കിൽ ബലം പ്രയോഗിക്കുമെന്ന്‌ എസ്‌ഐ മുന്നറിയിപ്പ്‌ നൽകി. ജനക്കൂട്ടം പിരിഞ്ഞില്ല. അവർ രണ്ടുവരിയായി നിരന്നു. ലാത്തിച്ചാർജിന്‌ ഉത്തരവായി. പെട്ടെന്ന്‌ എല്ലാ ഭാഗത്തുനിന്നും ജനക്കൂട്ടം കനത്തതോതിൽ കല്ലെറിഞ്ഞു...തളിപ്പറമ്പ് എസ്‌ഐ റിവോൾവറെടുത്ത്‌ രണ്ടുവട്ടം നിറയൊഴിച്ചു. ഒരാൾ മുറിവേറ്റ്‌ വീണു. കല്ലുകൊണ്ട്‌ എസ്‌ഐയും വീണു.’ മരിച്ചുവീണ സബ് ഇൻസ്‌പെക്ടർ കുട്ടികൃഷ്‌ണമേനോനായിരുന്നു. കോണ്‍സ്റ്റബിള്‍ ഗോപാലന്‍ നമ്പ്യാരും മരിച്ചു. കുട്ടികൃഷ്‌ണമേനോൻ ജനകീയസമരങ്ങളെ ഭീകരമായി അടിച്ചമർത്താൻ വിദഗ്‌ധൻ എന്നു പേരുള്ളയാൾ.

സെപ്‌തംബർ 15-‐ന്റെ മലബാറിലെ പ്രക്ഷോഭം കേന്ദ്ര കോൺഗ്രസ്‌ നേതൃത്വത്തിന്റെ സമനില തെറ്റിച്ചു. പാർടിയാകെ ഇടതുപക്ഷത്തിന്റെ പിടിയിലാകും എന്നവർ ഭയന്നു. കെപിസിസി പിരിച്ചുവിട്ടു. കമ്യൂണിസ്റ്റ്‌ ശക്തികേന്ദ്രങ്ങളിലാകെ പൊലീസ്‌ കൊടുംഭീകരത സൃഷ്‌ടിച്ചു. വീടുകൾ മാത്രമല്ല വായനശാലകളും സ്‌കൂളുകളും പോലും അടിച്ചുതകർത്തു. ജനങ്ങൾ എന്നിട്ടും നേതാക്കളെ സംരക്ഷിച്ചു. പക്ഷേ ഒടുവിൽ 38 പ്രതികളിൽ 33 പേരെയും അറസ്റ്റുചെയ്യാൻ പൊലീസിനായി. ഒളിവിൽ രോഗബാധിതനായ കെ പി ആർ ഗോപാലനെ ഡിസംബറിൽ അറസ്റ്റുചെയ്‌തു.

മലബാറിലെ സപ്‌തംബർ 15 ന്റെ സംഭവങ്ങളെപ്പറ്റി ജില്ലാ മജിസ്‌ട്രേറ്റ്‌ ചീഫ്‌ സെക്രട്ടറിക്കയച്ച കത്തിന്റെ ആദ്യഭാഗം

കെ പി ആറിന്റെ അറസ്റ്റോടെ സമരാവേശത്തിന്‌ വീണ്ടും തീപിടിച്ചു. മൊറാഴക്കേസ് വിചാരണ കൂടുതൽ ജനശ്രദ്ധയാകർഷിച്ചു. പ്രമുഖ അഭിഭാഷകർ നിരന്നു. തലശ്ശേരി സെഷൻസ് കോടതി കെ പി ആറിനും ടി രാഘവൻ നമ്പ്യാർക്കും ഏഴു വർഷം കഠിനതടവും മറ്റു പ്രതികൾക്ക് കുറഞ്ഞ ശിക്ഷയും നൽകി. ബ്രിട്ടീഷ്‌ അധികാരികൾ മദ്രാസ്‌ ഹൈക്കോടതിയിൽ അപ്പീൽ നൽകി. കോടതി കെ പി ആറിന് വധശിക്ഷ വിധിച്ചു. മലബാർ മറ്റൊരു തീവ്രപ്രക്ഷോഭത്തിലേക്ക്‌ കടന്നു. ഇന്ത്യക്കകത്തും പുറത്തും നിന്ന്‌ പ്രതിഷേധം ഉയർന്നു. ഗാന്ധിജി, ജവാഹർലാൽ നെഹ്റു തുടങ്ങിയ നേതാക്കൾ കെ പി ആറിന്റെ ജീവൻ രക്ഷിക്കണമെന്ന് ആവശ്യപ്പെട്ടു. തുടർന്ന് ബ്രിട്ടീഷ് ഗവൺമെന്റിന് വിധി പുനഃപരിശോധിക്കേണ്ടി വന്നു. വധശിക്ഷ ജീവപര്യന്തം തടവാക്കി.

ആഭ്യന്തര സെക്രട്ടറി റിച്ചാഡ്‌ ടോട്ടൻഹാം ഫയലിൽ എഴുതിയ ആമുഖക്കുറിപ്പ്‌

തുടർന്നുള്ള മാസങ്ങളിൽ സമരങ്ങൾ കൂടുതൽ തീവ്രവും ചടുലവുമാകുന്നതാണ്‌ കണ്ടത്‌. കർഷകരും തൊഴിലാളികളും കൂടുതൽ വർഗബോധത്തോടെ അണിചേർന്നു. തലശ്ശേരിയിലെ രക്തസാക്ഷിത്വവും മൊറാഴ കേസിലെ വിധിയും മലബാറിന്റെയും കേരളത്തിന്റെയും രാഷ്‌ട്രീയ ചരിത്രത്തിൽ അങ്ങനെ വഴിത്തിരിവായി. സെപ്‌തംബർ 15 എന്ന തീയതിക്ക്‌ വർഷങ്ങൾ പിന്നിടുന്തോറും തിളക്കമേറുകയും ചെയ്‌തു .