തമ്പുരാക്കന്മാരെ ‘വഴിതെറ്റിച്ച’ ഇ എം എസും രാവുണ്ണി നായരുടെ അറസ്റ്റും

‘‘എറണാകുളത്ത് പഠിക്കുമ്പോൾ, രാജകുമാരൻ കർശനമായ അച്ചടക്കത്തിൻ കീഴിലായിരുന്നു. അദ്ദേഹം സ്വാതന്ത്ര്യം ആഗ്രഹിച്ചിരുന്നു. മലബാറിലെ ഏറ്റവും ധനികനും, സ്വാധീനശക്തിയുള്ള നമ്പൂതിരിമാരിൽ ഒരാളുമായ ഇ എം ശങ്കരൻ നമ്പൂതിരിപ്പാടിന് ഈ രാജകുമാരനുമായി ബന്ധപ്പെടാൻ കഴിഞ്ഞു. മിക്കവാറും എല്ലാ യുവാക്കളെയും അദ്ദേഹം സ്വാധീനിച്ചു. അവരിൽ പ്രധാനി ഈ തമ്പുരാൻ ആയിരുന്നു. ഈ തമ്പുരാന്റെ ഭാര്യ കൊടുങ്ങല്ലൂർ കൊട്ടാരത്തിലെ കൊച്ചമ്മു തമ്പുരാട്ടിയും ഒരു കമ്യൂണിസ്റ്റ് പ്രവർത്തകയാണ്.’’

രാവുണ്ണി നായർ (ഇടത്ത്‌) ഐ സി പി നമ്പൂതിരിക്കൊപ്പം ‐ ഒരു പിൽക്കാല ചിത്രം

രവിവർമ കുഞ്ഞുണ്ണി തമ്പുരാൻ എന്ന ‘രാജകുമാരനെ’പ്പറ്റി തിരു‐കൊച്ചി ചീഫ് സെക്രട്ടറി കെ ജി മേനോൻ കേന്ദ്ര ആഭ്യന്തരമന്ത്രാലയത്തിന് 1950 ജൂലൈ 24‐ന് അയച്ച കത്തി(D.o.No.4.10304/50/cs.)നൊപ്പം ചേർത്ത തിരു‐കൊച്ചി ഐജിയുടെ റിപ്പോർട്ടിൽ നിന്നാണ് ഈ വരികൾ. കൊച്ചി രാജകുടുംബാംഗങ്ങൾക്കിടയിൽ അപകടകരമാംവിധം കമ്യൂണിസ്റ്റ് സ്വാധീനം വർധിക്കുന്നുവെന്ന കേന്ദ്ര ഇന്റലിജൻസ് ബ്യൂറോയുടെ കണ്ടെത്തൽ കേന്ദ്രമന്ത്രാലയം ചീഫ് സെക്രട്ടറിയെ അറിയിച്ചിരുന്നു. മറുപടിക്കത്തിലാണ്‌ ഈ വിവരങ്ങൾ. കേരളവർമ കേളപ്പൻ തമ്പുരാൻ, കേരളവർമ കൊച്ചനിയൻ തമ്പുരാൻ (ക്യാപ്റ്റൻ), രവിവർമ കുഞ്ഞുണ്ണി തമ്പുരാൻ (പി ആർ) എന്നിവരുടെ പേരുകളും റിപ്പോർട്ടിലുണ്ട്‌.

കമ്യൂണിസ്റ്റ് പാർടിയുടെ ആശയവിനിമയ ചുമതലയുടെ മുഖ്യകണ്ണി(ടെക്)യായിരുന്ന കെ രാവുണ്ണി നായരുടെ അറസ്റ്റിലൂടെയാണ് ഇന്റലിജൻസ് ബ്യൂറോയ്‌ക്ക്‌ വിവരങ്ങൾ ലഭ്യമായത്‌.

കൊൽക്കത്ത തിസീസിനെ തുടർന്ന് പൂർണമായും ഒളിവിലായ കേരളത്തിലെ കമ്യൂണിസ്റ്റ് പാർടിയെ കെ രാവുണ്ണി നായരുടെ അറസ്റ്റ് പിടിച്ചുലച്ചു. ഏറെ രഹസ്യങ്ങളുടെ സൂക്ഷിപ്പുകാരനായിരുന്നു പാർടിയിൽ ‘തമ്പാൻ’ എന്നറിയപ്പെട്ടിരുന്ന അദ്ദേഹം.

1950 മാർച്ച് ആദ്യമാണ് എറണാകുളം ജില്ലയിലെ അങ്കമാലിക്കടുത്ത കിടങ്ങൂരിലെ ഒളിത്താവളത്തിൽ നിന്ന് പുറത്തെത്തിയ തമ്പാൻ അറസ്റ്റിലാകുന്നത്. മഞ്ചേരി സ്വദേശിയായ ഇദ്ദേഹം നിലമ്പൂർ കോവിലകത്ത് ക്ലർക്കായിരിക്കെയാണ് പാർടിയുമായി ബന്ധപ്പെടുന്നത്. 1950 മാർച്ച് 14‐ന് മദിരാശിയിലെ ഇന്റലിജൻസ് ബ്യൂറോ ഡെപ്യൂട്ടി ഡയറക്ടർ പി വി ഭാസ്‌കരൻ തയ്യാറാക്കിയ രഹസ്യ റിപ്പോർട്ടിൽ (Information No.50, dated 14th March 1950, Part II) രാവുണ്ണി നായരുടെ അറസ്റ്റിലൂടെ ലഭിച്ച വിവരങ്ങളുടെ വിശദാംശങ്ങളുണ്ട്:

രാജകുടുംബാംഗങ്ങളെ ഇ എം എസ്‌ സ്വാധീനിക്കുന്നതായി പറയുന്ന ഐജിയുടെ റിപ്പോർട്ട്‌

‘‘മലബാറിലെ കെ രാവുണ്ണി നായർ നൽകിയ വിവരങ്ങളുടെ അടിസ്ഥാനത്തിൽ ഒരു സ്റ്റെൻ ഗണ്ണും വെടിയുണ്ടകളും കണ്ടെടുത്തതിനു പുറമേ, കമ്യൂണിസ്റ്റുകാർ ഉപയോഗിച്ചിരുന്ന രണ്ട് റോണിയോ മെഷീനുകളും പോലീസ് പിടിച്ചെടുത്തിട്ടുണ്ട്. കൊച്ചിയിലെ തൃപ്പൂണിത്തുറയ്‌ക്കടുത്തുള്ള ഒരു മുല്ലൻ നമ്പൂതിരിപ്പാടിൽ നിന്നാണ് ഒരു മെഷീൻ ലഭിച്ചത്. തൃപ്പൂണിത്തുറയിലും പരിസരത്തുമുള്ള നിരവധി നമ്പൂതിരി യുവാക്കളും കൊച്ചി രാജകുടുംബത്തിലെ ചില അംഗങ്ങളും കമ്യൂണിസ്റ്റ് പാർടിക്ക് സാമ്പത്തികമായും മറ്റ് സഹായങ്ങളും നൽകുന്നുണ്ടെന്ന് വ്യക്തമായി. കൊച്ചി രാജകുടുംബത്തിലെ അംഗങ്ങളിൽ, കേളപ്പൻ രാജ, പി ബി രാജ, കുഞ്ഞുണ്ണി രാജ എന്നിവർ കമ്യൂണിസ്റ്റ് പാർടിയെ സജീവമായി സഹായിക്കുന്നവരാണ്.’’

സംസ്ഥാന സേനയുടെ മുൻ അസിസ്റ്റന്റ് കമാൻഡന്റായിരുന്ന ക്യാപ്റ്റൻ തമ്പുരാനിൽ നിന്നാണ് പാർടിക്ക് തോക്ക് ലഭിച്ചത് എന്ന കണ്ടെത്തലും റിപ്പോർട്ടിലുണ്ട്. ചെങ്ങമനാട് അത്താണിക്കവലയിൽ ചായക്കട നടത്തുകയായിരുന്ന നെടുമ്പാശ്ശേരി കിഴക്കേ മടത്താട്ടു വീട്ടിൽ പ്രഭാകരൻപിള്ളയുടെ ചായക്കടയിലാണ് ഈ തോക്ക് ഒളിപ്പിച്ചുവച്ചിരുന്നതെന്ന് പയ്യപ്പിള്ളി ബാലൻ എഴുതുന്നുണ്ട് (ചിന്ത, 22 ജൂൺ 2012). പ്രഭാകരൻ പിള്ള അറസ്റ്റിലായി. ശിക്ഷിക്കപ്പെട്ടു.

കമ്യൂണിസ്റ്റ് നേതാവ് ഐ സി പി നമ്പൂതിരിയുടെ ‘വിപ്ലവത്തിൻ്റെ ഉൾതുടിപ്പുകൾ’ എന്ന ആത്മകഥയിൽ രാവുണ്ണി നായരുടെ അറസ്റ്റ് സൃഷ്ടിച്ച പ്രതിസന്ധി വിവരിക്കുന്നുണ്ട്. നെടുമ്പാശേരിക്കടുത്ത് ഒളിവിലുണ്ടായിരുന്ന ഇ എം എസിനെയും കെ സി ജോർജിനെയും കൊൽക്കത്തയ്‌ക്ക്‌ പോകാനായി ബംഗളൂരുവിൽ എത്തിക്കാൻ ഐ സി പിക്ക് ചുമതലയുണ്ടായിരുന്നു. ഇവർക്ക് പോകേണ്ടതിന്റെ തൊട്ടുമുമ്പാണ് രാവുണ്ണി നായർ പിടിയിലാകുന്നത്. അവരുടെ താവളവും യാത്രാറൂട്ടും തമ്പാന് അറിയാം.

പിടിയിലാകുന്നവർ എത്ര മർദനമുണ്ടായാലും ആദ്യ ദിവസങ്ങളിൽ നിർണായക വിവരങ്ങൾ വെളിപ്പെടുത്തരുതെന്ന നിർദേശമുണ്ട്. രാവുണ്ണി നായർ രണ്ടുദിവസം പിടിച്ചുനിന്നേക്കും എന്ന് പാർടി പ്രതീക്ഷിച്ചു. യാത്രാറൂട്ട് മാറ്റിയില്ല.

പാർടിയുടെ ഉറ്റസഹായിയും ഇ എം എസിന്റെ സഹപാഠിയും എസ്റ്റേറ്റ് ഉടമയും വ്യവസായിയുമായ കോയമ്പത്തൂരിലെ പി കെ അലക്‌സാണ്ടറാണ് യാത്രയ്‌ക്ക്‌ സഹായിച്ചത്. തൃശൂരിൽ നിന്ന് കാറിൽ നേതാക്കളെ ഐ സി പി കോയമ്പത്തൂരിൽ എത്തിച്ചു. പിറ്റേന്ന് അലക്‌സാണ്ടർ ഇവരെ കാറിൽ മൈസൂരിലെ താജ് ഹോട്ടലിൽ എത്തിച്ചു.

1950 മാർച്ച് 14ന് മദിരാശിയിലെ ഇന്റലിജൻസ് ബ്യൂറോ ഡെപ്യൂട്ടി ഡയറക്ടർ പി വി ഭാസ്കരൻ തയ്യാറാക്കിയ രഹസ്യറിപ്പോർട്ട്‌

ഐ സി പി എഴുതുന്നു: ‘‘മൈസൂറിൽനിന്ന് അവിടത്തെ എഎസ്‌പി ബംഗ്ലൂർ കന്റോൺമെന്റിലേക്ക് പോകുന്നുണ്ട്. കന്റോൺമെന്റിൽ പോയാലേ നന്നായി മദ്യപിക്കാന് കഴിയൂ. അതിനാണ് എഎസ്‌പിയുടെ പോക്ക്. അലക്‌സാണ്ടർ എഎസ്‌പിയോട് ചോദിച്ചു: ‘എന്റെ രണ്ടാളുകളുണ്ട്, അവർക്ക് ലിഫ്റ്റ് കൊടുക്കാമോ?’ എഎസ്‌പിക്ക് സമ്മതം. ഇ എം എസും കെ സി ജോർജും തലശ്ശേരിക്കാരൻ പത്മനാഭനും ഞാനും അങ്ങനെ എഎസ്‌പിയുടെ കാറിൽ കയറി.’’‐ഒളിവിലിരുന്ന സഖാക്കൾ ‘പൊലീസ് സംരക്ഷണ’യിൽ ബംഗളൂരുവിലെത്തി.

രാവുണ്ണി നായരുടെ അറസ്റ്റോടെ പാർടിയുടെ ഒളിവു സന്നാഹങ്ങളാകെ പൊളിച്ചുപണിയേണ്ട അവസ്ഥ വന്നു. രാവുണ്ണി നായർ പിന്നീട്‌ രാഷ്‌ട്രീയത്തിലുണ്ടായില്ല. കൊട്ടാരത്തിലെ കമ്യൂണിസ്റ്റുകാരായി അറിയപ്പെട്ടവർ പാർടിയുടെ ബഹുജനസമരങ്ങളിലടക്കം തുടർന്നും പങ്കാളികളാകുകയും ചെയ്‌തു.