സത്യാനന്തരദേശത്തെ സമകാലികവിശേഷങ്ങൾ

പണ്ടുപണ്ട് ഹരിശ്ചന്ദ്രനും മഹാത്മാഗാന്ധിക്കും ശേഷമുള്ള സത്യാനന്തരകാലത്താണ് ഈ കഥ നടക്കുന്നത്. സത്യാനന്തര ദേശത്തെ സത്യാനന്തര മേധാവി, പ്രജകളെല്ലാം സത്യാനന്തര നിയമങ്ങൾ പാലിക്കണമെന്ന്‌ കർശന നിർദേശങ്ങൾ നൽകിക്കൊണ്ടിരുന്ന കാലത്താണ്, അതിന്‌ വിരുദ്ധമായി സത്യം മാത്രം പറയുന്ന സത്യവ്രതൻ പിച്ചവച്ചു വളർന്നുവന്നത്.

സത്യം മാത്രം പറയുന്നവനെ ശിരച്ഛേദം ചെയ്യുക എന്നതാണ് സത്യാനന്തരദേശത്തെ, ആഭ്യന്തരചട്ടം മൂന്ന് മുപ്പത്തിമൂന്നിൽ പറയുന്നത്. വല്ലപ്പോഴും സത്യം പറയുന്നവന് ചാട്ടവാറു കൊണ്ട് പന്ത്രണ്ടടി. മാസത്തിൽ പത്ത്‌ സത്യമെങ്കിലും പറയുന്നവന് മുക്കാലിയിൽ കെട്ടി മുന്നൂറടി. ഉറക്കത്തിൽ എന്തെങ്കിലും സത്യം വിളിച്ചു പറയുന്നവന് കണ്ണിൽ രണ്ടിലും മുളകുപൊടി.

സത്യാനന്തര സ്‌കൂളുകളിൽ കള്ളം പറയാൻ പ്രത്യേക പരിശീലനം. ഭൂമി പരന്നതാണ്, സൂര്യൻ തണുപ്പു തരുന്നു, ചന്ദ്രന്റെ ഉപരിതലം വെട്ടിത്തിളയ്‌ക്കുന്നു എന്നെല്ലാം ആവർത്തിച്ചു പഠിക്കുന്ന കുട്ടികൾ സത്യാനന്തര പരീക്ഷകളിൽ ഉയർന്ന മാർക്കു നേടി. സത്യാനന്തര ശാസ്ത്രകൃതികളുടെ നൂറ്ററുപത് വാല്യങ്ങൾ പ്രസിദ്ധീകരിച്ച് കൈവണ്ടിയിൽ വലിച്ച് സത്യാനന്തര മേധാവിക്കു മുമ്പിൽ ഹാജരാക്കിയ പന്നിയറ ദാമോദരൻ എന്ന പണ്ഡിതന് കൊട്ടപ്പൂശ്രീ എന്ന പരമപദവി ലഭിച്ചു.

ചിത്രീകരണം: സുനിൽ അശോകപുരം

മേധാവി നുണയനാണ് എന്ന സത്യം പറഞ്ഞ ന്യായാധിപനെ പ്രഭാതസവാരിക്കിടെ വെടിവെച്ചുകൊന്നത് ആരാണെന്നതിന് ഇതുവരെയും ഒരു തുമ്പും കിട്ടിയിട്ടില്ല. ന്യായാധിപനെന്തിന് പ്രഭാതസവാരി നടത്തി എന്നാണ് സത്യാനന്തര ജയതേ എന്ന ആപ്തവാക്യം മുഖമുദ്ര പതിപ്പിച്ച പത്രം ചോദിച്ചത്.

ഒന്നും ഒന്നും കൂട്ടിയാൽ മ്മ്ണി ചെറിയ ഒന്ന് എന്നു പറഞ്ഞ ആരീഫിനാണ് ഏറ്റവും നല്ലതായ നൂറാം റാങ്ക് കിട്ടിയത്. ഒന്നും ഒന്നും രണ്ടല്ലേ എന്നെഴുതിയ ഒരേയൊരു ചെക്കനെ ഡീബാർ ചെയ്ത് സ്കൂളിൽ നിന്ന് പുറത്താക്കി പിണ്ഡം വച്ചു. ഹെഡ്മാഷാണ് ഉച്ചച്ചോറിൽ നിന്ന് ഉരുളയുരുട്ടി പിണ്ഡം വച്ച് മുട്ടു കുത്തിയത്. പിണ്ഡം തിന്നാൻ വരാത്ത കാക്കകളെ തൊട്ടടുത്തുള്ള കോടതി പരിസരത്തു നിന്ന് ഡീബാർ ചെയ്തു. അവറ്റകളെല്ലാം അതിനപ്പുറത്തുള്ള മണിയൻസ് ബാറിൽ ചേക്കേറി.

സത്യാനന്തരദാസൻ തിരുമുൽപ്പാട് എന്ന ബിരുദാനന്തര ബിരുദം സ്വയം സ്വീകരിച്ച മേധാവി സത്യാനന്തരദേശത്തിനെ ദൈവത്തിന്റെ മാത്രം നാട് എന്നു വിശേഷിപ്പിച്ചു. ഏറ്റവും പ്രധാനം ക്ഷേത്രമാണെന്നും അതിലെ വിഗ്രഹമാണെന്നും നാട്ടുകാരെ മുഴുവൻ പഠിപ്പിച്ചു. പണമെല്ലാം ഭണ്ഡാരത്തിൽ എന്ന മുദ്രാവാക്യം നാട്ടിലെങ്ങും എഴുതി വെപ്പിച്ചു. പൂജ, തുലാഭാരം, വില്ലെഴുന്നള്ളിപ്പ്, ഉത്സവം, കൊടിമരം, മുടിമന്ദിരം എന്നെല്ലാം പറഞ്ഞ് പ്രജകളുടെ പണം ഭണ്ഡാര ഗഹ്വരങ്ങളിലേക്ക് ഒഴുകി. ഭണ്ഡാരങ്ങളിൽ നിന്ന് കൈവഴിക്കുഴലുകൾ വഴി പണമെല്ലാം പുഴയായി തിരൂപ്പാടിന്റെ ഭണ്ഡാരക്കടലിലെത്തി.

മേധാവി സത്യാനന്തരദേശത്തെ പള്ളിക്കൂടങ്ങളെയെല്ലാം ലാഭകരമല്ലെന്നു പറഞ്ഞ് പതുക്കെപ്പതുക്കെ പൂട്ടിക്കാൻ തുടങ്ങി. പള്ളിക്കൂടങ്ങളിൽ ചില ഗുരുക്കന്മാരെങ്കിലും സത്യംപറഞ്ഞാലോ? കെട്ടിടങ്ങൾ പലതും ഒഴിഞ്ഞു കിടന്നു. അക്ഷരം പഠിച്ചവർ തലകുനിക്കാൻ മറക്കും. മുഷ്ടി ചുരുട്ടാൻ തുടങ്ങും. അത്യാവശ്യത്തിനുള്ള മരക്കണക്കും നെൽക്കണക്കും തേങ്ങാക്കണക്കുമൊക്കെ പഠിച്ചാൽ മതി. ദേശം ഭരിക്കാൻ പറ്റിയ ഉദ്യോഗസ്ഥരെ അന്യനാട്ടിൽ നിന്നിറക്കുമതി ചെയ്യാം.

ഹരിശ്ചന്ദ്രന്റേയോ മഹാത്മാഗാന്ധിയുടേയോ ഫോട്ടോകൾ തൂക്കിയവർക്ക് വലിയ ശിക്ഷയായിരുന്നു, വിധിച്ചത്. എല്ലാ വീടുകളിലും ഗീബൽസിന്റെ ചിത്രം പ്രദർശിപ്പിക്കണമെന്ന് നിയമം വന്നു. ചിലർ ഗീബൽസ് ഈ വീടിന്റെ നാഥൻ എന്ന് എഴുതി വയ്ക്കുകയും ചെയ്തു.

നട്ടുച്ചയ്ക്ക് ചെങ്കൽകോട്ടയിൽ സ്വാതന്ത്ര്യപതാകയുയർത്തി ഇപ്പോൾ നട്ടപ്പാതിരയല്ലേ എന്ന് മേധാവി ചോദിച്ചപ്പോഴേ പുരുഷാരം ദാ അമ്പിളി മാമാ എന്നും ട്വിങ്കിൾ ട്വിങ്കിൾ ലിറ്റിൽ സ്റ്റാർ എന്നും വിളിച്ചു കൂവി. അച്ചടക്കമുള്ള പ്രജകളെ സൃഷ്ടിക്കാൻ എന്തും ചെയ്യുന്ന മേധാവി അന്നു കൂടിയ പുരുഷാരത്തിന് ഒരു ദിവസത്തെ റേഷൻ സൗജന്യമായി നല്കി. അതു വാങ്ങാൻ റേഷൻ കടയിൽ ചെന്നപ്പോഴാണ് സത്യാനന്തരകാലമല്ലേ അങ്ങേരങ്ങനെ പലതും പറയും എന്ന് കടക്കാരൻ പറഞ്ഞത്.

സത്യാനന്തര കാലത്ത് സത്യം പറയുന്ന സത്യവ്രതന്റെ കഥയാണല്ലോ നമുക്ക് ഉര ചെയ്യാനുളളത്. സത്യവ്രതന് കളവു പറയാൻ നാക്കു പൊന്തുന്നില്ല. ഉള്ളത് ഉള്ളതു പോലെ പറഞ്ഞുകളയും. സത്യാനന്തരവ്രതൻ എന്നാണ് അച്ഛനമ്മമാർ പേരിട്ടതെങ്കിലും അനന്തരം മായ്ച്ചു കളഞ്ഞ് മകൻ സത്യവ്രതനെന്നാക്കി. മകൻ എപ്പോഴും സത്യം വിളിച്ചു പറയാൻ തുടങ്ങിയപ്പോൾ അച്ഛനമ്മമാർക്കു പേടിയായി. അവനെ പുറത്തിറക്കാതെ അട്ടത്തും പത്തായത്തിലും ഒളിപ്പിച്ചു വളർത്തി. എല്ലാ വീടുകളിലും സത്യാനന്തരസന്ധ്യാനാമം ചൊല്ലുമ്പോൾ സത്യവ്രതൻ സത്യമന്ത്രങ്ങൾ ഉരുവിട്ടു. അപ്പോൾ അയാളുടെ വീട്ടിൽ നിന്നു മാത്രം ത്രിസന്ധ്യാനേരത്ത് റേഡിയോവിൽ നിന്ന് അത്യുച്ചത്തിൽ സത്യാനന്തരസങ്കീർത്തനങ്ങൾ ഉയർന്നു പൊങ്ങി.

ചിത്രീകരണം: സുനിൽ അശോകപുരം

സത്യം, യുക്തി, ശാസ്ത്രം എന്നിവയിലൂന്നിയായിരുന്നു, സത്യവ്രതന്റെ ചിന്തകളെല്ലാം. സത്യമേ പറയാവൂ, ഉള്ളതാണ് സത്യം, യുക്തിചിന്ത വേണം തുടങ്ങിയ സത്യവ്രതന്റെ മുദ്രാവാക്യങ്ങൾ ഇരുട്ടിൽ തിളങ്ങുന്ന അക്ഷരങ്ങളിൽ ചുവരുകളിൽ പതിയാൻ തുടങ്ങി. സത്യം പറയാൻ മുട്ടിയ ആളുകൾ അതു കണ്ട് സന്തോഷിച്ചു. അങ്ങനെ അവരിൽ ചിലർ രഹസ്യമായ സത്യകേന്ദ്രം കണ്ടെത്തി ശിഷ്യപ്പെടാൻ തുടങ്ങി. ഇരുട്ടിൽ ചില കൈത്തിരികൾ മിന്നിമിന്നി സത്യവ്രതന്റെ താവളമായ കാട്ടിലെ ഇടിഞ്ഞുപൊളിഞ്ഞ കൊട്ടാരത്തിലെത്തി. രഹസ്യവാതിലിലൂടെ ഇറങ്ങിയവർ നിലവറയിലെ സുരക്ഷിത കേന്ദ്രത്തിലെത്തി. അച്ഛനമ്മമാരുടെ സങ്കടം കണ്ടാണ് സത്യവ്രതൻ കാട്ടിലെ ഈ അഭയകേന്ദ്രത്തിലേക്ക് താമസം മാറ്റിയത്.

സത്യവ്രതന്റെ കയ്യക്ഷരത്തിൽ പ്രത്യക്ഷപ്പെട്ട പോസ്റ്ററിൽ ഭടന്മാർക്ക് കീറാൻ കഴിയാതെ ബാക്കിയായ അക്ഷരങ്ങളിൽ നിന്ന് അയാളുടെ ദർശനങ്ങൾ മനസ്സിലാക്കിയ സത്യ എന്ന പെൺകുട്ടി കറങ്ങിത്തിരിഞ്ഞ് അവസാനം ഭൂഗർഭ അറയിലെത്തി സത്യവ്രതനോട് ആശ്രയമഭ്യർത്ഥിച്ചു. അസത്യ എന്നായിരുന്നു മാതാപിതാക്കളിട്ട പേരെങ്കിലും അ മുറിച്ചു കളഞ്ഞാണ് പെൺകുട്ടി പടവുകളിറങ്ങിയത്. താൻ ഇനി സത്യം പറയാത്ത ഉപരിതല ലോകത്തിലേക്കില്ലെന്നും സത്യത്തിനു വേണ്ടി നിലകൊള്ളുന്ന സത്യവ്രതന്റെ ശിഷ്യപദമേ കാംക്ഷിക്കുന്നുള്ളൂവെന്നും അവൾ പ്രഖ്യാപിച്ചു.

സത്യത്തിനു പകരം സത്യാനന്തരദേശത്ത് നുണക്കഥകളും അന്ധവിശ്വാസങ്ങളും ധാരാളമായി പ്രചരിച്ചു. മണ്ടൻ, തൊണ്ടൻ, കുണ്ടൻ, ചുണ്ടൻ തുടങ്ങിയ ദൈവങ്ങൾക്ക് മുക്കിനു മുക്കിന് ക്ഷേത്രങ്ങൾ പണിതു. ക്ഷേത്രങ്ങൾക്കു മുന്നിൽ കൂറ്റൻ ഹുണ്ടികകൾ നിരന്നു. വാഹനങ്ങളിൽ പോകുന്നവർ എറിയുന്ന ചില്ലറനാണയങ്ങൾ പെറുക്കി കുറേയെങ്കിലും ഹുണ്ടികയിലിടാൻ ചില വാല്യക്കാർ എപ്പോഴും സ്വയം കാവൽ നിന്നു.

സത്യാനന്തരദേശം ഭാവനയുടെ വിളനിലമായി. ദൈവങ്ങളുടെ ഉഗ്രശേഷിയെക്കുറിച്ചും അത്ഭുതസിദ്ധികളെക്കുറിച്ചും സകലരും വാചാലരായി. പ്രേതവും പിശാചും കാളിയും കൂളിയും അന്തരീക്ഷത്തിൽ നിറഞ്ഞു നിന്നു. അപ്പോഴാണ് സത്യവ്രതൻ എഴുതിവച്ചത് : ദൈവമില്ല. ദൈവം വെറും കെട്ടുകഥയാണ്. സത്യാനന്തരദേശം ആരാധിക്കുന്ന ദൈവങ്ങളെല്ലാം പുരാണകഥളിലെ വെറും കഥാപാത്രങ്ങൾ മാത്രമാണെന്ന് സത്യവ്രതൻ പറഞ്ഞു.

തേങ്ങയിൽ വെള്ളം നിറക്കുന്നത് ദൈവമാണെന്നും സ്ത്രീകൾ ഗർഭം ധരിക്കുന്നത് ദൈവം കാരണമാണെന്നും വിശ്വസിച്ച ജനങ്ങൾ പരിഭ്രാന്തരായി.

സംശയമുള്ളവരെ വാദപ്രതിവാദത്തിൽ തോല്പിക്കാൻ സത്യവ്രതനു നേരമുണ്ടായിരുന്നില്ല. എന്നാൽ സത്യവ്രതന്റെ അന്തർഗേഹത്തിലെത്തി കാര്യങ്ങൾ പഠിച്ചവർ രഹസ്യമായി വീട്ടുകാരേയും അയല്ക്കാരേയും നാട്ടുകാരെയും കാര്യങ്ങൾ ബോദ്ധ്യപ്പെടുത്തി. ദൈവം നമ്മുടെ രക്ഷകനാണെങ്കിൽ എന്തിനാണ് നമ്മെ കൊല്ലുന്നത്? ദൈവത്തിന് പണവും പൊന്നും കൈക്കൂലി നല്കി പ്രസാദിപ്പിക്കാൻ അയാളെന്താ സർക്കാരാപ്പീസിലെ ഗുമസ്തനാണോ? ദുഷ്ടന്മാരെ മരണാനന്തരം ദൈവം ശിക്ഷിക്കുമെന്നു പറയുന്നു; എന്നാൽ ദൈവത്തിന് ഭൂമിയിൽ വച്ചു തന്നെ ശിക്ഷിച്ചു കൂടേ? കല്ലിന് ചോര കൊടുക്കാൻ വേണ്ടി എന്തിനാണ് മൃഗങ്ങളെ കൊല്ലുന്നത്? അടിച്ചാൽ പൊട്ടുന്ന കൽപ്രതിമ എങ്ങനെ സർവ്വശക്തനായ ദൈവമാകും? രൂപമില്ലാത്ത ദൈവത്തെ എങ്ങനെ നമുക്കു കാണാൻ കഴിയും? ഭാഷയറിയാത്ത ദൈവം എങ്ങനെ നമ്മുടെ പ്രാർത്ഥന കേൾക്കും? മേലനങ്ങാതെയിരുന്ന്, വിദ്യാഭ്യാസമില്ലാത്തവരെ പറ്റിച്ച് പണമുണ്ടാക്കുന്ന ചില ജാതിക്കാരാണ് ദൈവത്തെയുണ്ടാക്കിയത്. ദൈവത്തിന്റെ പേരും പറഞ്ഞ് അവർ പാവങ്ങളെ പിഴിയുകയാണ്. അമ്പലം വിഴുങ്ങികളായ പൂജാരികൾക്കൊന്നും ദൈവവിശ്വാസമില്ല.

അങ്ങനെ ഇതെല്ലാം കണ്ട് കണ്ണു തുറന്നവർ അമ്പലത്തിൽ പോകാതെയായി. ഹുണ്ടികകൾ കാലിയാകാൻ തുടങ്ങി. പൂജാരിക്കും മേലാവിക്കും കാര്യമായൊന്നും കിട്ടാതെ വന്നു. നിത്യനിദാനപൂജകൾ ചെയ്യാൻ പൂജാരികളെ കിട്ടാതായി. അവന്മാരൊക്കെ വിശപ്പിന്റെ വിളി കേട്ട് ചുമടെടുക്കാനും വണ്ടി വലിക്കാനും വേണ്ടി നഗരങ്ങളുടെ അഴുക്കു ചാലുകൾക്കടുത്തുള്ള ചേരിയിൽ താമസമാക്കി തിരുമേനി നടിച്ചിരുന്ന കാലത്തെയോർത്ത് നെടുവീർപ്പിടാൻ തുടങ്ങി.

ദൈവത്തെ ഒരു മൂലക്കാക്കിയ സത്യവ്രതൻ മതത്തെയും ജാതിയേയും പറ്റി ശിഷ്യരെ ബോധവാന്മാരാക്കി. മനുഷ്യന് മനുഷ്യത്വമാണ് ജാതിയെന്നും ഒരു പുരുഷനും അതേ ഇനത്തിൽപ്പെട്ട സ്ത്രീയും തമ്മിൽ ചേരുമ്പോഴുണ്ടാകുന്ന ശിശുക്കളെല്ലാം ഒറ്റ ജാതിയിൽപ്പെട്ടവരാണെന്നും ജീവശാസ്ത്രത്തിന്റെ വെളിച്ചത്തിൽ സ്ഥാപിച്ചു. കണ്ടാലറിയാത്ത ജാതി എങ്ങനെ പറയാൻ പറ്റും? എല്ലാവരുടെ ഉള്ളിലുമുള്ള ചോരയ്ക്ക് ഒരു നിറമല്ലേ? പിന്നെങ്ങനെ വേറെ വേറെ ജാതികളെന്നു പറയാനാകും? സത്യവ്രതന്റെ ചോദ്യങ്ങളെല്ലാം പതിന്മടങ്ങു ശക്തിയോടെ നാട്ടിലെത്തിക്കാൻ ഒളിച്ചും പാത്തും പതുങ്ങിയും ശിഷ്യന്മാർ നാടെങ്ങും സഞ്ചരിച്ചു. പല ജാതിക്കാരെ പല തട്ടിലാക്കി ഭിന്നിപ്പിച്ചു കൊണ്ടിരുന്ന മേധാവിയുടെ കള്ളക്കളി നാട്ടുകാർക്കു പിടികിട്ടി. എല്ലാ മതവും ഒരേ കള്ളത്തരമാണ് പറഞ്ഞു നടക്കുന്നതെന്നും അവർ മനസ്സിലാക്കി. ശിഷ്യർ ഒരു പടികൂടിക്കടന്ന് "ജാതി വേണ്ട മതം വേണ്ട ദൈവം വേണ്ട ഞങ്ങൾക്ക് " എന്ന മുദ്രാവാക്യം എല്ലാ ചുമരുകളിലും എഴുതിവച്ചു.

സത്യാനന്തര കാലത്തിന്റെ രണ്ടാംഘട്ടത്തിലാണ് ഏറെക്കാലം വിദേശത്തുണ്ടായിരുന്ന ഒരാൾ കോട്ടും സൂട്ടും പല പല പെട്ടികളുമായി വിമാനത്തിൽ വന്ന് നേരത്തെ കപ്പലിൽ വന്നെത്തിയ ലിമോസിനിൽ കയറി നഗരമദ്ധ്യത്തിൽ പുതുതായി പടുത്തുയർത്തിയ കൊട്ടാരസദൃശമായ ബംഗ്ലാവിലേക്കു വന്നത്. സത്യാനന്തരദേശത്തെ മേധാവി വിമാനത്താവളത്തിൽ നേരിട്ടു ചെന്നാണ് ടിയാനെ സ്വീകരിച്ചത് എന്നത് എല്ലാവരേയും അദ്ഭുതപ്പെടുത്തി. കുറേ ദിവസങ്ങളായി ദേശത്തിലെ പ്രധാന സംസാര വിഷയം അയാളായി. മുതലാളി എന്നാണ് നാട്ടുകാർ അയാളെ വിളിച്ചത്. സത്യകക്ഷിക്കാർ കൗതുകത്തോടെയും ഭീതിയോടെയുമാണ് അയാളെ വീക്ഷിച്ചത്.

മേധാവി, നഗരത്തിൽ ഒഴിഞ്ഞു കിടന്ന സ്കൂൾ കെട്ടിടങ്ങളും ടൗൺ ഹാളും മറ്റു കെട്ടിടങ്ങളും മുതലാളിക്ക് സൗജന്യമായി വിട്ടു കൊടുത്തു. അവിടെ പുതിയ ഓഫീസും ഫാക്റ്ററികളും പരീക്ഷണശാലകളും വന്നു. അതോടെ പുതിയ കണ്ടുപിടുത്തങ്ങളുമുണ്ടായി. കളി കാണും പലക, കണക്കു പെട്ടി, കുത്തു മാന്തു കട്ട തുടങ്ങിയ ഉപകരണങ്ങൾ ധാരാളമായി നിർമ്മിക്കുകയും പുതു പാണന്മാർ അതിന്റെ അദ്ഭുതങ്ങൾ പാടി നടക്കുകയും ചെയ്തു. പലകയിലൂടെ ദിവസവും മേധാവിയെ കാണാം; പ്രസംഗം കേൾക്കാം. കൈ കൊണ്ട് ചെയ്ത പലതും കണക്കുപെട്ടി ഹൈസ്പീഡിൽ ചെയ്യും. പെട്ടിയിലെ വിവരം വച്ചുണ്ടാക്കിയ അടിമയന്ത്രങ്ങളാകട്ടെ, ഒട്ടെല്ലാപണികളും ചെയ്യും. നുണക്കഥകളും നുണച്ചിത്രങ്ങളും നുണച്ചലച്ചിത്രങ്ങളും കുത്തു മാന്തു യന്ത്രത്തിൽ നോക്കിയിരുന്ന് ആളുകൾ വീട്ടിൽ നിന്നിറങ്ങാതായി. മുതലാളി പുതുയന്ത്രങ്ങളുടെ സഹായത്തോട ക്ഷേത്രങ്ങളും പൂജകളും ഹുണ്ടികകളും വിശ്വാസങ്ങളും വിപണിയിലെത്തിച്ചു.

ചിത്രീകരണം: സുനിൽ അശോകപുരം

നുണകൾ പ്രചരിപ്പിക്കാൻ യന്ത്രങ്ങളെല്ലാം വലിയ സഹായമാണ് മേധാവിക്ക് ചെയ്തത്. അമ്പലങ്ങളിലും പള്ളികളിലും ആളൊഴുകാൻ ദിവ്യാദ്‌ദുതങ്ങളുടെ പലകപ്പരസ്യങ്ങൾ കൊടുത്തു. കിട്ടിയ ലാഭമെല്ലാം മുതലാളിയും മേധാവിയും പപ്പാതിയാക്കി. പലകയിലൂടെ മേധാവി പ്രഖ്യാപിച്ചു: ഇരുപത്തൊന്നായിരം പണപ്പുരയിലിടൂ.... മാസാമാസം ഇരുപത്തഞ്ചായിരം തിരിച്ചു തരും. കേട്ടപാതി കേൾക്കാത്ത പാതി സ്വയം മണ്ടന്മാരായി മാറിയ പ്രജകൾ പണപ്പുരയിലേക്കോടി. ആയിരം പണത്തിന് ആരാന്റെ മനസ്സു കാണാനുള്ള അദ്ഭുതക്കണ്ണട, ആയുസ്സു നീട്ടിക്കിട്ടാനുള്ള ആയിരത്തഞ്ഞൂറിന്റെ റബ്ബർ റിബ്ബൺ, കഷണ്ടിയിൽ തേച്ചാൽ കാടു പോലെ മുടി കിളുർക്കുന്ന കാട്ടെണ്ണ, ഒറ്റ ഡോസ് കഴിച്ചാൽ പഞ്ചാരയും പൊണ്ണത്തടിയും കുറയ്ക്കുന്ന പതിനായിരത്തിന്റെ മഞ്ഞപ്പൊടി, വയസ്സായവർക്ക് ചെറുപ്പം കിട്ടാൻ ഇരുപതിനായിരത്തിന്റെ മാന്ത്രികലേഹ്യം എന്നിങ്ങനെ പലകപ്പരസ്യങ്ങൾ മേധാവിയുടെയും മുതലാളിയുടേയും ചിത്രങ്ങൾ സഹിതം പ്രത്യക്ഷപ്പെടാൻ തുടങ്ങി. ഇതൊന്നും യഥാർത്ഥത്തിൽ നടക്കാത്ത കാര്യങ്ങളാണെന്ന് ഇരുവരും പറഞ്ഞില്ല. അന്ധവിശ്വാസങ്ങൾ കൊണ്ട് യുക്തി നഷ്ടപ്പെട്ട മാലോകർ പണപ്പുര വഴിയും കണക്കു പെട്ടി വഴിയും പണമയച്ചു തുടങ്ങി. ഭരണകൂടം മാസാമാസം പുറത്തിറക്കുന്ന അറിയിപ്പു പുസ്തകത്തിന്റെ ആരും നോക്കാത്ത ചെറിയൊരു മൂലയിൽ ഭരണകൂടം കൊടുത്ത പരസ്യങ്ങളല്ല, അത് എന്ന്

അച്ചടിച്ചു വച്ചു. പൊതുവെ ആരും വായിക്കാത്ത ഒരു പുസ്തകമായിരുന്നു അത്.

പൂജാരി ജാതി, ഭരണ ജാതി, മുതലാളി ജാതി, കീഴ്ജാതി എന്നിങ്ങനെ നാലു ജാതികളാക്കി പ്രജകളെ തരം തിരിച്ചു. ഒന്നിൽ നിന്ന് മറ്റൊന്നിലേക്ക് മാറാം. പക്ഷേ പൊന്നും വെള്ളിയുമടക്കണം. മുതലാളിക്ക് അഞ്ചു ലക്ഷം, ഭരണജാതിക്ക് പത്തുലക്ഷം, പൂജാരിക്ക് ഇരുപത് എന്നിങ്ങനെ വില പറഞ്ഞു. കീഴ്ജാതിയിലേക്കു മാറുന്നവർക്ക് വെട്ടുകത്തി, കൈക്കോട്ട്, ചൂൽ തുടങ്ങിയ സമ്മാനങ്ങൾ പ്രഖ്യാപിച്ചു. പക്ഷേ അതങ്ങനെ കൊടുക്കേണ്ടി വരാറില്ല.

ചിത്രീകരണം: സുനിൽ അശോകപുരം

സത്യാനന്തര ദേശത്ത് ഫലിതങ്ങൾ നിരോധിച്ചു എന്ന വാർത്ത വലിയ ഞെട്ടലോടെയാണ് ആളുകൾ കേട്ടത്. ഉള്ളത് ഉള്ളതുപോലെ പറയാൻ പറ്റില്ലെങ്കിലും ഫലിതമാക്കിപ്പറഞ്ഞ് ചിരിക്കാമല്ലോ എന്നാണ് ജനം ചിന്തിച്ചിരുന്നത്. ആരെങ്കിലും ചിരിക്കുന്നത് ഭരണകൂടത്തെ പരിഹസിച്ചാകും എന്നു കരുതിയാണത്രേ ഫലിതപരിഹാസാദികൾ നിരോധിച്ചത്. അടുത്തപടി ചിരി നിരോധിക്കും. പിന്നെ കഥ ... കവിത.... നോവൽ.... അവയൊക്കെ സത്യമല്ലാത്തതാകുമ്പോൾ പ്രശ്നമുണ്ടാവില്ല എന്നാണ് കരുതിയിരുന്നത്. എന്നാൽ ആളുകളെ വഴി തെറ്റിക്കാൻ അതൊക്കെ പ്രയോജനപ്പെടും എന്നു ശങ്കിച്ച് പതുക്കെപ്പതുക്കെ നിരോധിക്കാൻ തുടങ്ങി.

ഇതെല്ലാം കണ്ടപ്പോൾ, പ്രജകൾ വിഡ്ഢികളാക്കപ്പെടുമ്പോൾ സത്യവ്രതന് അടങ്ങിയിരിക്കാൻ കഴിഞ്ഞില്ല. സത്യയ്ക്ക് ഭൂഗർഭകേന്ദ്രത്തിന്റെ ചുമതലകൾ കൈമാറി സത്യവ്രതൻ ഉപരിലോകത്തിലേക്കു വന്നു. പിന്നീട് കൊടുങ്കാറ്റടിച്ചതു പോലെയായിരുന്നു എല്ലാം. അസത്യമായതിനെല്ലാമെതിരെ വിരൽ ചൂണ്ടിക്കൊണ്ട് സത്യവ്രതൻ ശബ്ദമുയർത്തി. ഘോരഘോരം പ്രസംഗിച്ചു. നിയമങ്ങൾ ലംഘിച്ചു. പുരുഷാരം അയാളുടെ പിന്നിൽ അണിനിരന്നു. എന്തിനധികം! ഭരണകൂടം ഗൂഢാലോചന നടത്തി. സത്യവ്രതനേയും സംഘത്തേയും കണ്ടാലുടൻ വെടിവച്ചു കൊല്ലാൻ ഉത്തരവായി. അതോടെ സത്യപക്ഷക്കാർ അടങ്ങിയിരിക്കുകയല്ല, തെരുവുകളിലേക്ക് കൂടുതൽ കൂടുതലായി ഇറങ്ങുകയും നുണക്കോട്ടകൾക്കെതിരെ കല്ലെറിയുകയുമാണ് ചെയ്തത്. സത്യത്തിനു

വേണ്ടി ലോകത്താദ്യമായിട്ടായിരുന്നു, ഒരു കലാപം പൊട്ടിപ്പുറപ്പെട്ടത്.

ഒരു സന്ധ്യയിൽ പന്തം കൊളുത്തി പ്രകടനം നയിച്ചു കൊണ്ട് മേധാവിയുടെ ബംഗ്ലാവിലേക്ക് പ്രകടനം നയിക്കുകയായിരുന്നു സത്യവ്രതൻ. എന്നാൽ മേധാവിയേയും ബംഗ്ലാവിനേയും കത്തിക്കാനാണ് സത്യവ്രതന്റെ വരവെന്നും ആളുകൾ വീട്ടിൽ നിന്നു പുറത്തിറങ്ങരുതെന്നും അധികാരികൾ പ്രഖ്യാപിച്ചു.

സൈന്യം ഇരച്ചു വരികയും സത്യവ്രതനെ പോയിന്റ് ബ്ലാങ്കിൽ പരസ്യമായി വെടി വെച്ചു കൊല്ലുകയും ചെയ്തു. തന്റെ ചോര കൊണ്ടു മാത്രമേ ജനതയുടെ കണ്ണു തുറപ്പിക്കാനാവൂ എന്ന് സത്യവ്രതനറിയാമായിരുന്നു... സത്യ അയാളെ യാത്രയാക്കുമ്പോൾ സത്യവ്രതൻ മന്ത്രിച്ചതും അതായിരുന്നു.

ഇനി സത്യയുടെ ഊഴമാണ്. ഈ ചോരക്ക് പകരം ചോദിക്കാൻ, സത്യം പുനഃസ്ഥാപിക്കാൻ, സത്യ ഇനിയുള്ള ദിവസങ്ങളിൽ എന്തൊക്കെ ചെയ്യുമെന്ന് കാണാനിരിക്കുന്നതേയുള്ളൂ.