വരൂ, നമുക്ക്- തടി കുറയ്‌ക്കാം

കടൽ കലങ്ങി മറിയുന്നത് സശ്രദ്ധം നോക്കിനിൽക്കുമ്പോൾ ദിവസത്തിന്റെ വരവറിയിച്ചുകൊണ്ട് മാനത്തിന്റെ കിഴക്കേ ചെരിവിൽ സൂര്യൻ പ്രത്യക്ഷപ്പെട്ടു. ധ്യാനത്തിലെന്നപോലെ നിമിഷനേരം ശെൽവമണി കണ്ണടച്ച് പ്രാർഥിച്ചുനിന്നു. കണ്ണു തുറന്നപ്പോൾ അന്നാൾവരെ ശ്രദ്ധയിൽപ്പെടാതിരുന്ന ദൃശ്യം ഒരു കരടുപോലെ കണ്ണിൽ കൊണ്ടു. കുറേ തടിയന്മാരുടെ നടത്തവും ഓട്ടവും! കടൽത്തീരത്തെ ഇളക്കിമറിച്ചുകൊണ്ടുള്ള അവരുടെ നടത്തത്തിൽ സൂര്യന്റെ കാഴ്ച മറഞ്ഞു. ഇന്നലെവരെ ഈ ദൃശ്യം തന്റെ കണ്ണിൽപ്പെടാത്തതെന്തേയെന്ന് ശെൽവമണി എന്ന മെഡിക്കൽ സെയിൽസ് ഓഫീസർ ഒരാലോചനയിലാണ്ടു. തടി കുറയ്‌ക്കാനുള്ള മരുന്ന് കമ്പനി പുറത്തിറക്കുന്ന ദിവസമായിരുന്നു അത്. അതുകൊണ്ടായിരിക്കാം ഇന്നലെവരെ ശ്രദ്ധയിൽ പെടാതിരുന്ന തടിയന്മാരുടെ ഓട്ടം ഇന്ന് കണ്ണിലുടക്കിയതെന്ന് അയാൾക്ക് തിരിച്ചറിവുണ്ടായി. എന്തായാലും തന്റെ സൂര്യധ്യാനമാണ് ഈ തടിയന്മാർ കാരണം തടസ്സപ്പെട്ടത്. ആ ദുർനിമിത്തത്തിന്റെ ഭാരമറിഞ്ഞുകൊണ്ട് അയാൾ ടൈ കെട്ടുകയും ഷൂവിലേക്ക് കാൽ നിക്ഷേപിക്കുകയും ബെൽറ്റ് മുറുക്കിക്കെട്ടുകയും കണ്ണാടിയിൽ മുഖം നോക്കി ബാഗും ചുമന്നുകൊണ്ട് ജോലിക്കിറങ്ങുകയും ചെയ്തു.

ചിത്രീകരണം: രാജേന്ദ്രൻ പുല്ലൂർ

രാജേന്ദ്രകുമാർ എന്ന എൻഡോക്രിനോളജിസ്റ്റിനെയാണ് ആദ്യം കാണേണ്ടിയിരുന്നത്. തൈറോയിഡ്/ഹോർമോൺ തകരാറുമൂലം കൂടിയ തടി കുറയ്‌ക്കാനും അനുബന്ധ ആരോഗ്യ പ്രശ്നങ്ങളുമായി ഏറെപ്പേർ അദ്ദേഹത്തെ സമീപിക്കുന്നുണ്ട്. അതിനാൽ അദ്ദേഹമായിരുന്നു ആദ്യ ടാർഗറ്റ് ഡോക്ടർ. തടിയന്മാരേയും തടിച്ചികളേയുംകൊണ്ട് നിറഞ്ഞ ക്ലിനിക്ക് മുറ്റത്ത്‌ താരതമ്യേന തടി കുറഞ്ഞ ശെൽവമണി ഡോക്ടറുടെ വിളി കാത്ത് നിൽപ്പുറപ്പിച്ചു.

അപ്പോഴേക്കും മാനേജരുടെ വാട്സാപ്പ് കാൾ.

""ഡോക്ടറെ കണ്ടോ?''

""അയാം വെയ്റ്റിങ്...''

""ഡോണ്ട് വേസ്റ്റ് യുവർ ടൈം...''

""ബട്ട് ഹീ ഈസ്...''

""ഡു വാട്ട് ഐ സേ...'' മാനേജരുടെ ഭാവം മാറി. ""ഗോ റ്റു ഡോക്ടർ അൻപുക്കണ്ണൻ...''

""ഹി മേ ആൾസോ ബി ബിസി...''

""ഒബേ മൈ ഓഡർ...''

സംഘടനയുള്ള കാലത്താണെങ്കിൽ മാനേജർ ഇത്രയും ആജ്ഞയെടുത്ത് സംസാരിക്കില്ലായിരുന്നു. രണ്ടു കമ്പനികൾ തമ്മിൽ ലയനം നടന്നതോടെ സംഘടന പിളർന്നു. അത് മാനേജ്മെന്റിന്റെ ആവശ്യവുമായിരുന്നു. തുച്ഛമായ തുകയ്‌ക്ക് സ്വയം പിരിഞ്ഞുപോക്ക് നയം കൊണ്ടുവരികയും അതിന് വഴങ്ങാത്തവരെ ദൂരെദിക്കിലേക്ക് സ്ഥലംമാറ്റുകയും ചെയ്തതോടെ പഴയ സിംഹങ്ങൾ പല്ലുകൊഴിഞ്ഞ് വീട്ടിലിരിപ്പായി. ശേഷിച്ചവരെ തൊഴിലുറപ്പ് സംരക്ഷണമുള്ള മെഡിക്കൽ റെപ്രസെന്റേറ്റീവ് തസ്തികയിൽനിന്നും അതില്ലാത്ത മെഡിക്കൽ സെയിൽസ് ഓഫീസർ എന്ന മാനേജ്മെന്റ് തസ്തികയിലേക്ക് മാറ്റി പാർപ്പിച്ചു. അതോടെ പക്ഷികളുടെ ചിറകു മുറിഞ്ഞു.

""വേറാർ യു നൗ?'' മാനേജർ വീണ്ടും.

""ഓൺ ദ വേ റ്റു ഡോക്ടർ അൻപുക്കണ്ണൻ...''

""കാൾ മി ഓൺ റീച്ചിങ്...''

""ഷുവർ സർ...''

സെയിൽസ് ഓഫീസർമാരായതോടെ മാനേജർമാർക്ക് ഏതു പാതിരായ്‌ക്കും വിളിക്കാമെന്നായി. നോട്ടീസില്ലാതെ ജോലിക്ക് വരാം. ഏത് ഡോക്ടറെ കാണണം എന്ന് തീരുമാനിക്കാം. അടുത്ത മാസം ശമ്പളം കിട്ടണമെങ്കിൽ ഈ മാസം ടാർഗറ്റ് ചെയ്യണമെന്ന് ഭീഷണിപ്പെടുത്താം. കമ്പനിക്ക് തീറെഴുതിക്കൊടുത്തതു പോലെയാണ് ഇപ്പോൾ ജീവിതം.

ഡോ. അൻപുക്കണ്ണന്റെ ക്ലിനിക്കിലേക്ക് തിരിയുന്ന വളവിൽ പെട്ടെന്നൊരു ആൾക്കൂട്ടം കണ്ടപ്പോൾ ശെൽവമണി വണ്ടിയുടെ വേഗം കുറച്ചു. ചെന്നൈയിൽ എവിടെ ആൾക്കൂട്ടം കണ്ടാലും അത് ഏതെങ്കിലും സിനിമയുടെ ഷൂട്ടിങ്ങായിരിക്കുമെന്ന് അനുഭവത്തിൽ അയാൾ മനസ്സിലാക്കിയിരുന്നു. നടീനടന്മാരെ നേരിട്ടു കാണാനുള്ള കൗതുകം എന്നും പൊതുജനത്തിനുണ്ട്. ശെൽവമണിക്കുമുണ്ട്. തൽക്കാലം അയാൾ തടി കുറയ്‌ക്കാനുള്ള പുതിയ മരുന്നിനെ മറന്ന് ബൈക്ക് പാതയോരത്ത് പാർക്ക് ചെയ്തു. തിരക്കിലേക്ക് നീങ്ങിയപ്പോഴാ ണറിഞ്ഞത്, അത് സിനിമാ ചിത്രീകരണമല്ല. മാസത്തിൽ പത്തു കിലോവരെ കുറയ്‌ക്കാൻ കെൽപ്പുള്ള ഏതോ വിദേശനിർമിത ഷെയ്ക്ക്‌ വാങ്ങാനുള്ള ആളുകളുടെ ക്യൂവാണ്. ഇതിനു മുമ്പ് ഇത്തരം ആൾവരി മദ്യഷാപ്പുകളിൽ മാത്രമേ കണ്ടിട്ടുള്ളൂ.

ചിത്രീകരണം: രാജേന്ദ്രൻ പുല്ലൂർ

പൊണ്ണത്തടി മനുഷ്യരാശിയെ കാർന്നുതിന്നുന്ന മാരക രോഗാവസ്ഥയാണെന്ന് ലോകാരോഗ്യ സംഘടനയുടെ കണ്ടെത്തലുകൾ നിരത്തി ട്രെയിനിങ് മാനേജർ വിശദമാക്കിയിരുന്നു. ഏതോ ശതമാനക്കണക്കും അയാൾ പറഞ്ഞു. നാടിന്റെ ഭാവിയാരോഗ്യം ഈ രോഗാവസ്ഥയുടെ കൈപ്പിടിയിലായതുകൊണ്ടുകൂടിയാണ് കമ്പനി ഈ മരുന്നിന് ഇത്രമേൽ പ്രാധാന്യം നൽകുന്നത്.

നമ്മളാണ് ഈ മരുന്ന് വിപണിയിൽ ആദ്യമിറക്കുന്നത് എന്ന ഓർമ വേണം. എംഡി പ്രത്യാശയോടെ സംസാരിച്ചു. ഇപ്പോൾ വേരോട്ടം കിട്ടിയാൽ കമ്പനിയുടെ ഭാവി മാർക്കറ്റിൽ സുരക്ഷിതമായിരിക്കും. ഒരർഥത്തിൽ നിങ്ങളുടെ ഭാവികൂടി ഈ മരുന്നിന്റെ വ്യാപാരവിജയത്തിൽ സുരക്ഷിതമായിരിക്കുന്നു. എംഡി സംഗ്രഹിച്ചു.

ഈ മരുന്നിന്റെ ലോഞ്ചിനിടെ കമ്പനി രൂപപ്പെടുത്തിയ കലോറി ഇൻഡക്സ് എന്ന ആപ്പിന്റെ പരിചയപ്പെടുത്തലും നടന്നു. പ്ലേ സ്റ്റോറിൽ പോയി ആർക്കും ഡൗൺലോഡ് ചെയ്യാം. ഒരു ദിവസം ശരീരത്തിനകത്തേക്കും പുറത്തേക്കും പോകുന്ന കലോറിയുടെ കണക്ക് ആപ്പിൽ രേഖപ്പെടുത്തും. കഴിക്കുന്ന ഭക്ഷണത്തിന്റെ അളവിനെക്കുറിച്ചും വ്യായാമത്തെക്കുറിച്ചും അത് നമ്മെ ബോധവാന്മാരാക്കും.

ബൈക്ക് സ്റ്റാർട്ട്‌ ചെയ്തതും ഡോ. രാജേന്ദ്രകുമാറിന്റെ പിഎയുടെ ഫോൺ.

""വേറാർ യു നൗ? ഡോക്ടർ ഈസ് ഫ്രീ...''

ഡോ. രാജേന്ദ്രകുമാറിന്റെ ക്ലിനിക്കിൽ കാലത്ത് കണ്ട തടിയന്മാരുടേയും തടിച്ചികളുടേയും തിരക്കൊഴിഞ്ഞ് ഡോക്ടർ ഫ്രീയായിരിക്കുന്നു. നാലു ദിവസം മുമ്പെടുത്ത അപ്പോയിന്റ്മെന്റാണ്. ഒരു ദിവസം അഞ്ചു കമ്പനി പ്രതിനിധികളെയാണ് ഡോക്ടർ കാണുക. തിരക്കു കുറയുന്ന മുറയ്‌ക്ക് പിഎ വിളിക്കും. ചിലപ്പോൾ മൂന്നും നാലും മണിക്കൂർ കാത്തുനിൽക്കേണ്ടി വരും. ആ സമയം ഉപയോഗപ്പെടുത്താനാണ് താരതമ്യേന തിരക്കു കുറഞ്ഞ ഡോ. അൻപുക്കണ്ണനെ പോയി കണ്ടുവരാൻ മാനേജർ നിർദേശിച്ചത്. അവസാനമിപ്പോൾ രണ്ടു ഡോക്ടർമാർക്കിടയിൽ ഒരു സമയഗർത്തത്തിൽ അകപ്പെട്ടതു പോലെ...

""ഐ വിൽ റീച്ച് ആസ് ഏർളി ആസ് പോസിബിൾ...''

നഗരവഴികളിൽ രാവിലത്തെ അപേക്ഷിച്ച് തിരക്കു കൂടിയിരുന്നു. വാഹനങ്ങളെ വെട്ടിയും മുറിച്ചും ശെൽവമണി ഡോ. രാജേന്ദ്രകുമാറിന്റെ ക്ലിനിക്കിലേക്ക് പാഞ്ഞു.

""ഡോ. അൻപുക്കണ്ണനെ കണ്ടോ?'' മാനേജർ ലൈനിൽ വന്നു. ""വാട്ടീസ് ഹിസ് റിമാർക്സ് എബൗട് ദ ഡ്രഗ്?''

""ഐ വിൽ അപ്ഡേറ്റ് യു... സാർ...'' ശെൽവമണി വണ്ടിവേഗം കൂട്ടി.

ഒബിസിറ്റി ഒരു സാമൂഹ്യപ്രശ്നമായി വളരുന്നതു കൊണ്ടുതന്നെ തടി കുറയ്‌ക്കാനുള്ള ധാരാളം മരുന്നുകളും മറ്റു മുറകളും മാർക്കറ്റിൽ അവതരിക്കും. ട്രെയിനിങ് മാനേജർ മുന്നറിയിപ്പു പോലെ പറഞ്ഞു. ആയുർവേദവും ഒട്ടും പിന്നിലല്ല. അതിനാൽ നിമിഷനേരം പോലും പാഴാക്കാതെ മാർക്കറ്റിൽ ജാഗരൂകരായിരിക്കുക. ഒന്ന് കണ്ണടച്ചാൽ എതിരാളി നമ്മെ വെട്ടിച്ച് കടന്നുകളയും.

തടി കുറയ്‌ക്കാനുള്ള മറ്റൊരു മുറയെക്കുറിച്ചും ട്രെയിനിങ്ങിൽ പരാമർശമുണ്ടായി. മാറിലും വയറിലും തുടകളിലും കെട്ടിയുറപ്പിക്കുന്ന പാഡുകളിലൂടെ വൈദ്യുതരംഗങ്ങൾ കടത്തിവിട്ടും രക്തചംക്രമണം വർധിപ്പിച്ചും തടി കുറയ്‌ക്കുന്ന രീതി. ഒപ്പം ഡയറ്റീഷ്യൻ നിർദേശിക്കുന്ന ഭക്ഷണക്രമവും. മാസത്തിൽ ആറു കിലോ വരെ കുറയ്‌ക്കാമത്രെ. ഈ സമ്പ്രദായത്തിനും പ്രചാരം ഏറിവരുന്നു.

ഭാരം കുറയ്‌ക്കാനുള്ള മരുന്നു കഴിച്ച് ഒരു ചെറുപ്പക്കാരൻ മരണപ്പെട്ട പ്രാദേശിക അനുഭവം കേരളത്തിൽനിന്നു വന്ന ശശിധരൻ മീറ്റിങ്ങിനിടെ പങ്കുവച്ചു.

ഡോ. രാജേന്ദ്രകുമാറിന്റെ ക്ലിനിക്കിനു മുന്നിലെത്തിയപ്പോൾ സ്ഥലം മാറിപ്പോയോ എന്ന് ഒരു നൊടി ശെൽവമണി അമ്പരന്നു. ആളൊഴിഞ്ഞ പൂരപ്പറമ്പുപോലെ ക്ലിനിക്കിന്റെ ഉമ്മറം ശൂന്യം! കളിക്കിടെ വീണ് കാലൊടിഞ്ഞതിനെത്തുടർന്ന് സ്കൂളിൽനിന്നും ഫോൺ വന്നപ്പോൾ മകനെ കൂട്ടാൻ ഡോക്ടർ സ്കൂളിലേക്ക് തിരിച്ചതാണത്രെ.

സന്ദർശന സമയം അനുവദിച്ചിട്ട് സ്ഥലത്തില്ലാതെ പോയതിന് ശെൽവമണിക്കിട്ട് പിഎ കണക്കിന് കൊടുത്തു. ഒരു മാസത്തേക്ക് ഇനി അപ്പോയിന്റ്മെന്റ് സാധ്യമല്ലെന്ന് താക്കീതും ചെയ്തു.

ഡോ. രാജേന്ദ്രകുമാറിനെ കാണാൻ കച്ച മുറുക്കി നിൽക്കുമ്പോഴാണ് ഡോ. അൻപുക്കണ്ണനെ പോയി കണ്ടുവരാൻ മാനേജർ നിർദേശിച്ചത്. ഏതു ഡോക്ടറെ എപ്പോൾ കാണണം എന്നു തീരുമാനിക്കുന്ന റിമോട്ട്‌ കൺട്രോളറാണ് മാനേജർ. തനിക്ക് തോന്നുന്നതുപോലെ അയാൾ സ്വിച്ച് ഗിയറുകൾ മാറ്റും. നമ്മൾ ചലിച്ചുകൊള്ളണം.

ഡോ. രാജേന്ദ്രകുമാറിനെ തലനാരിഴയ്‌ക്ക് നഷ്ടപ്പെട്ട കാര്യം ബോധിപ്പിച്ചപ്പോൾ മാനേജർ ചൂടായി. അൻപുക്കണ്ണനെ കാണാൻ പോയ നിങ്ങളോട് വീണ്ടും രാജേന്ദ്രകുമാറിലേക്ക് തിരിച്ചുവരാൻ പറഞ്ഞതാര്?

""യു ആർ എ പ്രൊബേഷനർ...'' മാനേജരുടെ ശബ്ദം മാറി. ""നിങ്ങളുടെ കൺഫർമേഷൻ എന്റെ കയ്യിലാണ് എന്ന് ഓർമ വേണം...''

""ഓകെ സാർ...'' ശെൽവമണി ഭയത്തിൽ ആളി. ""ഞാൻ ഇനി എന്തുചെയ്യണം... ആരെ കാണണം...?''

""മീറ്റ് ഡോക്ടർ അംബുജം... റിമംബർ, യു ആർ യെറ്റ് റ്റു ലോഞ്ച് ദ പ്രൊഡക്ട്...''

മറ്റു ജില്ലകളിലെ സെയിൽസ് ഓഫീസർമാർ ലോഞ്ച് കഴിഞ്ഞ് ഇതിനകം പ്രിസ്ക്രിപ്ഷൻ ജനറേറ്റു ചെയ്തു കഴിഞ്ഞു. നേരം ഉച്ചയാവാറായി. ഇനിയും നിങ്ങൾ ഒരു ഡോക്ടറെ പോലും കണ്ടിട്ടില്ല.

ചിത്രീകരണം: രാജേന്ദ്രൻ പുല്ലൂർ

""ഐ പിറ്റി യു മിസ്റ്റർ ശെൽവം...'' പ്രൊബേഷന്റെ കാര്യം മാനേജർ വീണ്ടും ഓർമിപ്പിച്ചു.

വിവാഹനിശ്ചയം കഴിഞ്ഞു നിൽക്കുന്ന ഈ സമയത്ത് ജോലി നഷ്ടപ്പെടുന്ന കാര്യം ആലോചിക്കാൻകൂടി വയ്യ. ഡോക്ടറെ കണ്ട് എത്രയും വേഗം മരുന്ന് പരിചയപ്പെടുത്തുക എന്ന ദൗത്യവുമായി റിമോട്ട് കൺട്രോളർ വരഞ്ഞിട്ട വഴികളിലൂടെ ശെൽവമണി എന്ന മെഡിക്കൽ സെയിൽസ് ഓഫീസർ ഡോ. അംബുജത്തിന്റെ ആശുപത്രി ലക്ഷ്യമാക്കി നീങ്ങി. മറ്റു ജില്ലകളിൽ ലോഞ്ച് ദിവസംതന്നെ വിൽപ്പനയും നടന്നുകഴിഞ്ഞു എന്ന് മാനേജർ പറയുന്നു. മറ്റു ജില്ലകളെപ്പോലെയല്ല ചെന്നൈ. ഒരു ദിക്കിൽ നിന്ന് മറ്റൊരു ദിക്കിലേക്കെത്തണമെങ്കിൽ വലിയ മെയ്യഭ്യാസം വേണം. മെട്രോ റെയിലിനു വേണ്ടി കുഴിച്ചിട്ടിരിക്കുന്ന റോഡുകൾ/ദിനസരി നിരത്തിൽ പൊട്ടി മുളയ്‌ക്കുന്ന പുതിയ വാഹനങ്ങൾ/പുതിയ ഉദ്യോഗാർഥികൾ/വിദ്യാർഥികൾ/വ്യാപാരികൾ... ഈ സമുദ്രത്തിലൂടെ വേണം ഓരോ ഇഞ്ചും നിരങ്ങി മുന്നേറാൻ. ഡോക്ടറുടെ അപ്പോയിന്റ്മെന്റ് കിട്ടുക എന്നത് മറ്റൊരു ഹിമാലയൻ പ്രയത്നം. മുംബൈയിൽ ഇരുന്നുകൊണ്ട് മാനേജർക്ക് എന്തും പറയാം, എന്തും...

മൗണ്ട് റോഡിലെ ആയിരം വിളക്കിനു സമീപം ആൾക്കൂട്ടം കണ്ടപ്പോൾ വീണ്ടും ഷൂട്ടിങ് വിചാരത്തിലേക്ക് ശെൽവമണിയുടെ മനസ്സ് നീണ്ടു. അടുത്തെത്തിയപ്പോൾ അയാൾ വീണ്ടും കബളിക്കപ്പെട്ടു. രക്തം/മലം/മൂത്രം പരിശോധനയ്‌ക്ക് വന്നവരുടേയും റിസൾട്ട് വാങ്ങാൻ നിൽക്കുന്നവരുടേയും നീണ്ട നിര ഒന്നിനോടൊന്ന് ഒട്ടി ആൾക്കൂട്ടം പോലെയായതാണ്. തടി കുറയ്‌ക്കാനുള്ള മരുന്ന് വെറും തടി കുറയ്‌ക്കൽ മരുന്ന് മാത്രമല്ലെന്ന് ട്രെയിനിങ്ങിനിടെ മെഡിക്കൽ വിഭാഗത്തലവൻ പറഞ്ഞത് ശെൽവമണി ഓർത്തു. ഷുഗർ/പ്രഷർ/കൊളസ്ട്രോൾ/തൈറോയിഡ്/പിസിഒഡി/മൈഗ്രേൻ/കാലുവേദന/ഉപ്പൂറ്റി വേദന/ഫാറ്റി ലിവർ/ഗ്യാസിന്റെ ബുദ്ധിമുട്ട്/നടക്കുമ്പോഴും ഗോവണി കയറുമ്പോഴുമുള്ള അമിത കിതപ്പ്/നടുവേദന/മുട്ടുവേദന/സന്ധിവേദന എന്നിങ്ങനെ പതിനാലോളം നിത്യമാരണങ്ങൾക്കുള്ള പ്രതിവിധിയാണ്. അതുകൊണ്ടുതന്നെ വിൽപ്പന സാധ്യതയും വമ്പിച്ചതാണ്. ഡോക്ടർമാർ ഇതേറ്റെടുത്താൽ കമ്പനിയുടെ മുഖച്ഛായ തന്നെ മാറും.

മനസ്സിൽ പടർന്നുകയറിയ പുതിയ ഊർജത്തിൽ ഡോ. അംബുജത്തിന്റെ ക്ലിനിക്കിനു മുന്നിലെത്തിയപ്പോൾ അവർ പാരീസ് കോർണറിലെ പുതിയ കെട്ടിടത്തിലേക്ക് മാറിയതായി അറിയിപ്പു കണ്ടു. പത്തു ദിവസം മുമ്പ് ഓൺലൈനിൽ എടുത്ത അപ്പോയിന്റ്മെന്റാണ്. ഓൺലൈൻ വ്യവഹാരങ്ങൾ എപ്പോഴും സ്ഥലകാലങ്ങൾക്കതീതമാകയാൽ മാറ്റം അറിയാതെപോയി.

മൗണ്ട് റോഡിൽ നിന്നും പാരീസ് ലക്ഷ്യമാക്കി നീങ്ങുമ്പോൾ തടി കുറയ്‌ക്കാനുള്ള ഒരു അമൂല്യ ഭസ്മവുമായി കുംഭകോണത്തുനിന്നും ഒരു മന്ത്രവാദി ചെന്നൈയിൽ എത്തിയ കാര്യം സഹമുറിയൻ പറഞ്ഞത് ശെൽവമണി ഓർത്തു. ഒരു ദിവസം ഒരു നുള്ള് ഭസ്മം എന്ന കണക്കിൽ തുടർച്ചയായി 21 ദിവസം സേവിച്ചാൽ 21 കിലോ കുറയുമത്രെ. തുടർച്ചയ്ക്ക് ഭംഗം വന്നാൽ തടി കൂടും. ഭസ്മത്തിന്റെ വില കേട്ടപ്പോൾ ഞെട്ടി. എങ്കിലും മന്ത്രവാദിയെ തേടി ദിനവും ആളുകൾ തിരക്കു കൂട്ടുന്നു. അയാൾക്ക് നിത്യമായ ഒരു ക്യാമ്പില്ല എന്നതാണ് ശ്രദ്ധേയമായ വസ്തുത. ഓരോ ദിവസം ഓരോ സ്ഥലത്തായിരിക്കുമത്രെ. ശെൽവമണിക്ക് അയാളെ കാണാൻ കൗതുകം തോന്നി.

ഏറെ നേരമായി മാനേജർ വിളിക്കാത്തതെന്തേ എന്ന് ആ ഓട്ടത്തിനിടയിലും ശെൽവമണി ഓർത്തു. മറ്റു ജില്ലകളിലെ സഹപ്രവർത്തകരുമായി, അല്ലെങ്കിൽ ഹെഡ് ഓഫീസിലെ ആരെങ്കിലുമായും സംവദിക്കുകയാവാം. ഫോൺ വരാത്തേടത്തോളം അത്രയും നിമ്മതി.

You are what you eat.

ചിത്രീകരണം: രാജേന്ദ്രൻ പുല്ലൂർ

പുതുതായി തുടങ്ങിയ ഒരു ന്യൂട്രീഷൻ സ്ഥാപനത്തിന്റെ തലപ്പത്ത് വലിയ അക്ഷരത്തിൽ എഴുതിവച്ചിരിക്കുന്നത് ശെൽവമണിയുടെ ശ്രദ്ധയിൽപെട്ടു. വരൂ, നമുക്ക് തടി കുറയ്‌ക്കാം എന്ന് മൊഴി മാറ്റാവുന്ന ഒരു ഇംഗ്ലീഷ് ടാഗ് ലൈൻ താഴെ.

ട്രെയിനിങ് സമയത്ത് അതിഥിയായി വന്ന വെൽനസ്സ് കോച്ചും പറഞ്ഞു.

നിങ്ങൾ കഴിക്കുന്ന ഭക്ഷണമാണ് നിങ്ങൾ.

വിവിധ ഭക്ഷണരീതികൾ അവലംബിക്കുന്നവരുടെ ഉടലളവുകൾ അവർ പ്രൊജക്റ്ററിൽ ഇട്ടു കാണിച്ചു. തന്റെ വാദം ഉറപ്പിച്ചു: You are what you eat.

പെട്ടെന്ന് ശെൽവമണി ഓർത്തു. താനിന്ന് പ്രാതലും ഉച്ചഭക്ഷണവും കഴിച്ചില്ല! കാലത്ത് ഒരു കട്ടൻകാപ്പി കുടിച്ച് ഇറങ്ങിയതാണ്. വിശക്കാത്തതെന്തേ?

ബാഗിനുള്ളിൽ തടി കുറയ്‌ക്കാനുള്ള മരുന്നുപാളികൾ ഏതെങ്കിലും ഡോക്ടറുടെ കൈസ്പർശത്തിനായി വെമ്പൽ കൊണ്ടു. ഏതെങ്കിലും ആമാശയത്തിൽ അണപൊട്ടിയൊലിച്ച് പൊണ്ണത്തടിയെ ഇഞ്ചിഞ്ചായി അലിയിച്ചുകളയുന്നത് സ്വപ്നം കണ്ടു.

വലിയ ശബ്ദത്തോടെ കുറുകെ ഇരമ്പിവന്ന ഒരു മോപ്പഡ് തട്ടി ശെൽവമണിയുടെ ഹോണ്ട ഗ്ലാമർ മറിഞ്ഞു. ബാഗ്‌ തെറിച്ചു. അയാൾ ബൈക്കിനടിയിൽപെട്ട് പുറത്തു വരാൻ കഴിയാതെ ഞെരുങ്ങി. ആൾക്കൂട്ടം ബൈക്കിനടിയിൽനിന്നും അയാളെ ഊരിയെടുത്തു. വലതുകാൽ നിലത്തുറയ്‌ക്കുന്നില്ല. എല്ലു പൊട്ടിയതാവാം. ഏറെ നേരത്തെ ഇടവേളയ്‌ക്കു ശേഷം പോക്കറ്റിൽ മൊബൈൽ ശബ്ദിച്ചു. ആ വേദനയിലും എരടിപ്പൊട്ടിയ കൈ കൊണ്ട് എടുത്തുനോക്കി. നീലച്ചില്ലിൽ Manager എന്ന് തെളിഞ്ഞുകണ്ടു.

എല്ലാവരും കൂടിച്ചേർന്ന് ശെൽവമണിയെ ആശുപത്രിയിൽ ഒപ്പടച്ചു. എക്സറേ ഫലം വന്നപ്പോൾ വലംകാലിൽ പൊട്ടലുണ്ട്. ബാൻഡേജ്/മരുന്നുകൾ എല്ലാം അതിന്റെ ക്രമത്തിൽ നടന്നു.

നേരം സന്ധ്യയായി.

ജനലോരത്തെ കിടക്കയിൽ നിന്നും ഏന്തിനോക്കിയാൽ കടൽ കാണാം. കാലത്ത് കണ്ട അതേ കടൽ. ഇപ്പോഴതിന് മറ്റൊരു മുഖം, മറ്റൊരു ഭാവം.

കടൽത്തീരത്തിലൂടെ തടിയന്മാരും തടിച്ചികളും വേഗത്തിൽ നടക്കുന്നതും ഓടു ന്നതും ശെൽവമണി കണ്ടു.

മാനേജരുടെ ഫോൺവിളി അവിരാമം തുടർന്നുകൊണ്ടിരുന്നു .