ഹരിയാനയിൽ യോഗ അധ്യാപകനെ ജീവനോടെ കുഴിച്ചുമൂടി

ചണ്ഡീ​ഗഡ് : ഹരിയാനയിൽ യോ​ഗ അധ്യാപകനെ ജീവനോടെ കുഴിച്ചുമൂടി. റോ​ഹ്തക്കിലെ സ്വകാര്യ സർവകലാശാലയിൽ അധ്യാപകനായ ജഗദീപാണ് കൊല്ലപ്പെട്ടത്. ചർഖി ദാദ്രിയിലാണ് സംഭവം. മൂന്ന് മാസം മുമ്പാണ് സംഭവം നടന്നത്. കഴിഞ്ഞ ദിവസമാണ് ജ​ഗദീപിന്റെ മൃതദേഹം കണ്ടെത്തിയത്. ഡിസംബർ 24നാണ് ജ​ഗദീപിനെ കാണാതായത്.

ഭാര്യയുമായി ബന്ധമുണ്ടെന്ന സംശയത്തെത്തുടർന്നാണ് ചർഖി ദാദ്രി സ്വദേശി ജ​ഗദീപിനെ കൊലപ്പെടുത്തിയത്. തട്ടിക്കൊണ്ടുപോയ ശേഷം കയ്യും കാലും കെട്ടി ജ​ഗദീപിനെ വയലിൽ ആഴത്തിലുള്ള കുഴിയെടുത്ത് മൂടുകയായിരുന്നു. കുഴൽക്കിണറിന്റെ ആവശ്യത്തിനായാണെന്നു പറഞ്ഞാണ് കുഴിയെടുക്കാൻ ഒരാളെ സഹായത്തിനു വിളിച്ചത്. ശേഷം ജീവനോടെ ജ​ഗദീപിനെ കുഴിയിലിട്ടു. കാണാതായി പത്ത് ദിവസത്തിനു ശേഷം പൊലീസിൽ പരാതി രജിസ്റ്റർ ചെയ്തിരുന്നു. ജഗദീപിന്റെ ഫോൺ കോളുകൾ പരിശോധിച്ചതിലൂടെയാണ് പ്രതിയിലേക്കെത്തിയത്.