ഗ്വാളിയോറിൽ നടുറോഡിൽ യുവതിയെ ലിവ് ഇൻ പങ്കാളി വെടിവച്ചുകൊന്നു

​ഭോപ്പാൽ : മധ്യപ്രദേശ് ഗ്വാളിയോറിൽ നടുറോഡിൽവച്ച് യുവതിയെ ലിവ് ഇൻ പങ്കാളി വെടിവച്ചു കൊലപ്പെടുത്തി. ​ഗ്വാളിയോറിലെ രൂപ് സിങ് സ്റ്റേഡിയത്തിനു മുന്നിൽ വെള്ളി പകലായിരുന്നു സംഭവം. 32കാരിയായ നന്ദിനി കേവാത് ആണ് കൊല്ലപ്പെട്ടത്. നന്ദിനിയുടെ പങ്കാളി അരവിന്ദ് പരിഹാർ (33) ആണ് ഇവരെ കൊലപ്പെടുത്തിയത്. റോഡിൽകൂടി നടന്നുവരികയായിരുന്ന നന്ദിനിയെ തടഞ്ഞുനിർത്തിയ ശേഷം അരവിന്ദ് വെടിയുതിർക്കുകയായിരുന്നു. ഇവർക്കുനേരെ അടുത്തുനിന്ന് അഞ്ചോളം തവണ അരവിന്ദ് വെടിയുതിർത്തതായാണ് ദൃക്സാക്ഷികൾ പറയുന്നത്. വെടിയുതിർത്ത ശേഷം ഇയാൾ നന്ദിനിക്ക് സമീപം തന്നെ നിന്നു. ആളുകൾ ഓടിക്കൂടിയെങ്കിലും തോക്ക് ചൂണ്ടി ഭീഷണിപ്പെടുത്തിയതിനാൽ ആർക്കും സമീപത്തേക്ക് ചെല്ലാൻ സാധിച്ചില്ല.

സിഎസ്പി നാഗേന്ദ്ര സിംഗ് സിക്കർവാറിന്റെ നേതൃത്വത്തിലുള്ള പൊലീസ് സംഘം കണ്ണീർ വാതക ഷെൽ പ്രയോഗിച്ച ശേഷമാണ് പ്രതിയെ കീഴടക്കിയത്. നന്ദിനിയെ ജെഎഎച്ച് ട്രോമ സെന്ററിൽ എത്തിച്ചെങ്കിലും മരിച്ചു. കൊല നടത്താനുപയോ​ഗിച്ച തോക്ക് പിടിച്ചെടുത്തു. ഫോറൻസിക് സംഘം അന്വേഷണം ആരംഭിച്ചു.

കോൺട്രാക്ടറായി ജോലി ചെയ്യുകയായിരുന്നു അരവിന്ദ്. ഇരുവരും വിവാഹബന്ധം വേർപെടുത്തിയ ശേഷമാണ് ഒന്നിച്ചു ജീവിക്കാൻ ആരംഭിച്ചത്. എന്നാൽ അരവിന്ദ് തന്റെ ആദ്യ വിവാഹവും കുട്ടികളെപ്പറ്റിയുള്ള വിവരങ്ങളും മറച്ചുവെച്ചതായി നന്ദിനി ആരോപിച്ചിരുന്നു. അരവിന്ദിനെതിരെ നന്ദിനി ഒന്നിലധികം പരാതികൾ നൽകിയതായി രേഖകൾ പുറത്തുവന്നു. 2024 നവംബറിൽ അരവിന്ദും സുഹൃത്തുക്കളും തന്നെ കൊലപ്പെടുത്താൻ ശ്രമിച്ചെന്നും നന്ദിനി പരാതി നൽകിയിരുന്നു.

അറസ്റ്റിലായെങ്കിലും അരവിന്ദിന് പിന്നീട് ജാമ്യം ലഭിച്ചു. സെപ്തംബർ ആദ്യവും നന്ദിനി അരവിന്ദിനെതിരെ എസ്പിക്ക് പരാതി നൽകിയിരുന്നു. അരവിന്ദും സുഹൃത്ത് പൂജയും തന്റെ മോർഫ് ചെയ്ത വീഡിയോകളും ചിത്രങ്ങളും സോഷ്യൽ മീഡിയയിൽ പ്രചരിപ്പിക്കുകയും അത് തന്റെ കുടുംബത്തിന് അയയ്ക്കുകയും ചെയ്തതായും എതിർത്താൽ കൊല്ലുമെന്ന് ഭീഷണിപ്പെടുത്തിയതായും നന്ദിനി പരാതിയിൽ പറഞ്ഞിരുന്നു. നന്ദിനി 2017ൽ ലിവ് ഇൻ പങ്കാളിയെ കൊലപ്പെടുത്തിയ കേസിൽ ശിക്ഷിക്കപ്പെട്ട് ജയിലിൽ കഴിഞ്ഞിരുന്നു. നാലു വർഷത്തെ തടവിനു ശേഷം 2022ലാണ് ഇവർ പുറത്തിറങ്ങിയത്.