24 August Saturday

മലയാളം പഠിച്ചിട്ടേ, മലയാള സിനിമയില്‍ അഭിനയിക്കൂ: വിജയ് ദേവരകൊണ്ട

സ്വന്തം ലേഖകൻUpdated: Saturday Jul 13, 2019

രശ്മിക മന്ദാനയും വിജയ് ദേവര കൊണ്ടയും മാധ്യമങ്ങളോട‌് സംസാരിക്കുന്നു

കൊച്ചി> മലയാള സിനിമയിൽ അഭിനയിക്കാൻ താൽപ്പര്യമുണ്ട്, പക്ഷേ, മലയാളം പഠിച്ച ശേഷമേ അഭിനയിക്കുകയുള്ളൂവെന്നും തെലുങ്ക് സൂപ്പർ താരം  വിജയ് ദേവരകൊണ്ട. ജൂലൈ 24ന് റിലീസ് ചെയ്യുന്ന  ‘ഡിയർ കോമ്രേഡി'ന്റെ പ്രചാരണാർഥം കൊച്ചിയിലെത്തിയതായിരുന്നു അദ്ദേഹം. തമിഴ് ശരിക്കറിയാതെയാണ് ‘നോട്ട' എന്ന തമിഴ് ചിത്രത്തിൽ അഭിനയിച്ചത്. പക്ഷേ, വളരെ ബുദ്ധമുട്ടായിരുന്നു. അതിനാൽ മലയാളത്തിൽ അഭിനയിക്കാൻ ആഗ്രഹമുണ്ടെങ്കിലും പഠിച്ച ശേഷം മാത്രമേ ആ സാഹസത്തിന് മുതിരുകയുള്ളൂവെന്ന് അദ്ദേഹം വ്യക്തമാക്കി. ചിത്രത്തിലെ നായികയായ രശ്മിക മന്ദാനയും വിജയ് ദേവര കൊണ്ടയ്‌ക്കൊപ്പം എത്തിയിരുന്നു.



മലയാളം സിനിമയിൽ അഭിനയിക്കാൻ തനിക്ക് അതിയായ ആഗ്രഹമുണ്ടെന്ന് നടി രശ്മിക മന്ദാന പറഞ്ഞു. എല്ലാ മലയാളി ക്രോമ്രേഡ്‌സിനും നമസ്‌കാരം എന്ന് പറഞ്ഞാണ് വിജയ് ദേവരുകൊണ്ട സംസാരിച്ചുതുടങ്ങിയത്.  കോമ്രേഡ് എന്നത് കേരളത്തിലെ ജനപ്രിയ വാക്കാണ്. ഒരാളുടെ ചീത്ത കാലത്തും നല്ല കാലത്തും കൂടെയുണ്ടാകുന്ന, പരാജയത്തിലും വിജയത്തിലും ഒപ്പം നിൽക്കുന്ന, ഒരുമിച്ച് നിന്ന് പോരാടുന്ന സുഹൃത്താണ് കോമ്രേഡ്. തന്റെ പുതിയ ചിത്രമായ ഡിയർ കോമ്രേഡ് പറയുന്നത് അത്തരമൊരു സന്ദേശമാണെന്നും അദ്ദേഹം പറഞ്ഞു. ദുൽഖർ സൽമാൻ തനിക്ക് സഹോദരനെപ്പോലെയാണെന്നും ദുൽഖറിന്റെ ആരാധകനാണെന്നും പറഞ്ഞ വിജയ് ദുൽഖറിനായി ഒരു സർപ്രൈസ് ഒരുക്കിയിട്ടുണ്ടെന്നും പറഞ്ഞു.

തന്റെ സ്വദേശം അതിർത്തി ഗ്രാമമായ കൂർഗിലാണെന്നും അതിനാൽ തന്നെ മലയാളികളായ നിരവധി അയൽക്കാർ തനിക്കുണ്ടെന്നും രശ്മിക മന്ദാന പറഞ്ഞു. കെജിഎഫിനു ശേഷം നാല് തെന്നിന്ത്യൻ ഭാഷകളിൽ ഒരുമിച്ചെത്തുന്ന ചിത്രമാണ് ഡിയർ കോമ്രേഡ്. റിലീസിന് മുന്നോടിയായി ഡിയർ കോമ്രേഡ് മ്യൂസിക് ഫെസ്റ്റിവൽ കലൂർ ഗോകുലം കൺവെൻഷൻ സെന്ററിൽ ശനിയാഴ്ച നടന്നു.


പ്രധാന വാർത്തകൾ
 Top